1Dule-naibi-itodiid, gege-bar-gugusadgi Bab-Jehováʼse ise-boar gornaid. Bab-Jehováʼye, an bese-gornaid be itoge, wilesagwar-an bese-gornaid bese mosana gadin.
2Bonigan angi-yolenonikile, mer be an-idu dukuo, nue be an-itogo. An bese-gornaile, gwae be an-abin-imako.
3An-ibagande, waayob bergudedaed. An-garmardina, soogi-gummaknaiyob itoleged.
4An-gwage ber nollomakded, gaganyob dinguded, ukuddi bar an itosurgusad.
5An binnasuli-akiginnedbali, an-garmardi daledgusad.
6Noo-negsulidganba-gukudiidyobi, an wargwen itoged. Irmon-neg-ayaraledgangi-gudiidyobi, an wargwen garmakdiid.
7Bar an gabdisulid, sikwi-walagwen-uas-birgi-gudidaedyobi, an gudiid.
8An-isdarmalad bane-bane mesagwar an-imakdimalad, yogasaar an-nug-oichogega an-nug-gadimalad.
9Degisoggu, sooburu an madisunnad. An-ibyanisde, an-gobedba-mesa an gobdisunnad.
10Bab-Dummad, be sabsur-uludedbali, sabsur-an-imaksa gusad. Sabsur-nakwaa be an-imaksagu, be an-barmeted. Deyob be an-wiosad.
11An-ibagande, negsichiledanikiyobi, bato bergudanikid. Gagan-dinguddaedyobi, an guded.
12Bab-Jehová, ar bedina, degisadegu be negsemai guoed. Be-nugdina berguosulid, degisadeguoed.
13Be, Sión-dulemar bendaknonikoed, be-sabgued ega be oyononikoed. Ar a-ibagan bato nagunonikid.
14Anmar-be-maimar, Jerusalén-neggweburbina nue-sogmalad. E-negmar-ayarar-bukwadi, nunmaked-dummad anmarga uked.
15Bela dulemar-yar-baid-baidgi-bukwamaladi, Bab-Jehová-nug-dobe-nanadii gumaloed. Bela-yar-baid-baidgi-reyga-mamaid, Bab-Jehová-e-gangued-yeerdakleged magar-dakmaloed.
16Ar Bab-Jehová, Sión-neg-ayarar-siid gannar soboed, e-gangued-nikad oyononikoed.
17Dule-ibmar-suli-gudimalad-ese-goledi itogoed, dule-ese-wilesagwar-gornaidi itogoed.
18Wagan-danimalad wisgumalaga, we-ibmar narmaklego. Dulemar-gwalulemaloed, Bab-Jehová-nug-odummomalaga, we-ibmar narmaklego.
19Ar Bab-Jehová, dulemar-gales-gorbukwad-itogega, e-neg-islidikid-akale, napneg-naid nue-dakded.
20Bab-Jehová, dulemar-oburgwilegega-galesbukwad-onogegala, napneg-naid nue-dakded.
21Bab-Jehová, dulemar Sión-yargi-e-nug-barsogmalagala, napneg-naid nue-dakded. Jerusalén-neggweburgi e-nug-odummomalagala, napneg-naid nue-dakded.
22Bab-Jehová-nug-odummomalagala, bela we-dulemala danakwaa ambikudmaloed, reymar-negsemamaidi, bela ambikudmaloed.
23An gudiidgine, Bab-Dummad, an-ibe an-niga onollomaksad, an-ibagan osikirmaksad.
24Agala, an ise-wilegar ega sogded: “An-Bab-Dummadye, mer be an-ibe an-ibagan osikirmakye. Bab-Dummad, ar begardina ibagan geg bergued.
25Gebesailaunni, napneg be nasiksad, degi, nibneg-naid be-argangi be nasiksabalid.
26We-napnegdina, berguoed, nibnegmoga bergumogoed. Bedina berguosulid. Igi mormar serguddae, deyobi, bela nibneg, degi, napneg, sergudoed. Mormar-ogwalegeyob be ogwaoed. Mormar-milegeyob be imakoed.
27Bab-Dummad, bedina amba gannar maid, be-ibagan gwen berguosulid.
28Be-nug-odummodimalad-e-mimmigandina, nued-gudii gumaloed. E-waganmala, be-asabinni gudii gumarmogoed.”
