Mareko 8:21-38

²¹Mupie jazawec, “Eme mamana‐ŋeŋic sifu mi fuakac me?”

²²Eme raku Besaida haeo fisipie ŋic tiŋtuŋ moc Jesurao bawarerâ mezi bâuaocte âzâcnembiŋ.

²³Âzâcnepie ŋic tiŋtuŋ menao rorâ hae râpeo bahurâ ʒâŋe‐ticne tâfec ruacnerâ mene qizecnao râehuc wiocnewec, “Wiac moc honekomec?”

²⁴Eme tiŋtuŋzi ʒâŋe firâ muwec, “No ŋic honec‐jopape jâc hawari tinac erâ rac warec eŋgopieŋ.”

²⁵Iŋuc mume Jesu e menezi ʒâŋene bâuame ŋic e ʒâŋene biaŋkeme fiɋaɋackerâ bembeŋko â ʒoricko wiac sasawa hone‐hâmowec.

²⁶Eme Jesuzi sorehuc ʒiŋuc âzâcnewec: “Go haeo mi fehuc mâc ficgao rac.”

²⁷Jesu e motecfâcne rocjopame Kaisarea hae, ŋicwofuŋ Filipozi mume bambiŋ, irec hae pitic ŋerawecko rambiŋ. Hatao rahuc Jesuzi motecfâcne indiŋ‐joparâ muwec, “Ŋic jaŋe nore mo muŋgopieŋ?”

²⁸Indiŋ‐jopame ʒiŋuc âzâcnembiŋ: “Johane Miti Opâ fufuŋke, â gâcne jaŋe Elia, â gâcnezi ine porofete moc, gore iŋuc muŋgopieŋ.”

²⁹Mupie esâic‐joparâ muwec, “Â ŋaŋacne ine nore mo muŋgopieŋ?” Eme Petorozi ʒiŋuc âzâcnewec: “Go Kristo hâcne.”

³⁰Iŋuc mume ŋic gâcne mi mufua‐jareniŋte mic muac sanaŋne ejarewec.

³¹Eme dameŋ ira fuŋkerâ dâŋ ʒiŋuc mufua‐jarewec: “Ŋic Fâri Wâtuŋnezi juku ʒâic serereŋ manaocmu, â soŋaŋ â taha bapa micne â miti qaqazu jaŋe e beherâ qa imac ecneku qapie hâmorâ ʒoaŋ jahec â moc eha fahareocmu.”

³²Dâŋ i mutaniŋkerâ jazawec. Jazame Petorozi bucko hefârerâ qataracnehuc dâŋ fuŋkerâ âzâcnewec.

³³Âzâcneme fotikierâ motec jaŋerao ʒâŋe fihuc Petoro mu tutuc ecnerâ muwec, “Sataŋ go râriec, go dâŋ maŋkekic i Anuture dâŋ mâcne, i ŋicdâŋ.”

³⁴Jesu e ŋic guru sâko jumbiŋ jaŋe â motecfâc‐ticne hefârec‐joparâ ʒiŋuc jazawec: “Ŋic moczi no bâjâpecnuzo murâ maŋ sahac‐ticnere dâŋ râpeckehuc maripoŋ‐ticne hâporâ bâjâpecnuzejec.

³⁵Moc e juju‐ticne sakareme sifuckecneocmu â moc e nore erâ â Biŋebiaŋte erâ qikiŋneme fuacneocmu.

³⁶Moc e mâreŋte wiac sasawa hure‐fâreku kinduŋ bânduŋ bajuhame juju‐ticne omaeme wemo wiac fârine focneocmu?

³⁷Me juju‐ticnere kiwiric wemo wiac rome risiecneocmu?

³⁸Moc e ŋicguru miti qiqikiŋ â hehesicne ʒi jaŋere ŋondeŋko juhuc no nahacnere me miti‐nanere maname mimi gaŋgaŋnehec eocmu, ere Ŋic Fâri Wâtuŋnezi iŋuc jaha Mamac‐ticnere sambâŋ tatamachec â tiri aŋelo jaŋehec fisirâ maname mimi gaŋgaŋnehec eocmu.”