SAN MARCOS 8:21-38

²¹ꞌBa ꞌbatsaꞌen Jesús kitsure: —¿A kje mankjinjínnu?

²²ꞌBa jaskan Jesús ko xutare echu naxinanda Betsaida; ꞌba kio jaꞌechanire jngu xuta ka, ꞌba kisꞌetsꞌare nga ngatatsiko.

²³ꞌBa Jesús kiskjebe ntsja xuta ko, ꞌba ꞌetukajinko naxinando. ꞌBa kitsikaꞌnyi xkun ko ndatiare ꞌba yanere ntsja ꞌba tsiningiyare: —¿A je matsejenri tsajmi?

²⁴ꞌBa xuta ko kiskutsejenndaire, ꞌba kitsu: —Je ꞌbia̱ xuta, tunga joni ya xi setsuma matsejenna̱.

²⁵ꞌBa Jesús yane nganire ntsja xkun, ꞌba xutabiu nda kiskutsejen, ꞌba kuanda, ꞌba je ne nda kuatsejen yejere.

²⁶ꞌBa ꞌbatsaꞌen Jesús ꞌete ndaba, ꞌba kitsure: —Bi nde bitjasꞌenjinni naxinando ngandaꞌe.

²⁷ꞌBa jaskan Jesús ko xutare kiji ngaꞌnde xi tjin Cesarea ña batexuma Felipe. ꞌBa kionga tjenya ndiyo, Jesús tsiningiyare xutare: —¿Jó tsu xuta nga ꞌyá=niña̱ an?

²⁸ꞌBa kui kitsingojo: —Tjin xi tsu nga ji= ni Juan Bautista, ꞌba tjin xi tsu nga ji= ni Elías, ꞌba yakꞌa xi tsu nga jngu ni profeta.

²⁹ꞌBa Jesús tsiningiyare: —Tunga jun, ¿jó mixun nga ꞌyá=niña̱ an? ꞌBa Pedro kitsingojo: —Ji= ni Mesías.

³⁰ꞌBa Jesús ꞌñu ꞌenere nga tuꞌyá ngateꞌere nijmi kibi.

³¹ꞌBa Jesús ꞌetutsꞌinre nga yeꞌere nijmi xutare nga Kiꞌndire Xuta xiꞌiun ne tse kjuanima kjuaꞌaxtiu, ꞌba nga kꞌuaxjengi xuta chingare naxinando, xi ngakure naꞌmi ꞌba xuta chjine kjuatexuma. Kitsure nga kjuinikꞌen, tunga nga kjuaꞌaya nganire xi majánni nixtjin.

³²Kibi nda kitsuyare. ꞌBa kio Pedro kikotꞌaxin Jesús ꞌba ꞌetutsꞌinre nga jatiko.

³³Tunga Jesús kitsikuꞌbeya ꞌba kiskutsejenꞌa xutare, ꞌba jatiko Pedro nga kitsure: —¡Tisentꞌaxin ngatꞌana̱ chanayi!, ngatꞌa bi ninkjin_ri takuin tsajmi xi tseꞌe Naꞌenchana, tu xi tseꞌe xuta ngasunꞌndebi=.

³⁴ꞌBa jaskan Jesús kinchjare xutare ꞌba ko xutankjiun xi tjenngire, ꞌba kitsure: —Tsa ꞌyáñu xi mejénre ku̱an xutana̱, ngatatsichiyajin yojore ꞌba ngataꞌanijin krure ꞌba ngatjandetjenngina̱.

³⁵Ngatꞌa xi mejénre sikꞌangi yojore, sichaja; tunga xi sichaja yojore ngatꞌana̱ an ꞌba ngatꞌare en nda xi tsikꞌangi, kui= xi sikꞌangi.

³⁶¿Jótsaꞌen ku̱achjenre xuta tsa saꞌen ngayéje ngasunꞌndio ꞌba tsa sichaja kjuabenichunre?

³⁷ꞌBa nde ¿jótjin kꞌuechji ngatꞌare kjuabenichunre xuta?

³⁸ꞌBa tsa tjin xi masubare ngatꞌana̱ ꞌba ko ngatꞌare enna̱ ngixkun xuta xi tjin ngandaꞌe, xuta xi bi ntꞌere Naꞌenchana ꞌba xi xuta je, ꞌba=nde Kiꞌndire Xuta xiꞌiun ku̱asubare ngatꞌa tseꞌe kui xutabiu kionga kjuaꞌe ngani nga ko kjuajere Naꞌenre ꞌba ko ankjele tsjere.