21मिनु “मुल यो मारेइ मरुम्नी?” देंमाक्त।
22येसु नु आ शेंसीबपुकी बेथसैदा जाक्दीम्मा बाक्त। मिनु मुरपुकीमी मिक्च मताइब का चाक्शा “मेको कली थिने” दे पुन्मे बाक्त। मर्कूस ६:५६
23मिनु येसुमी मिक्च मताइब कली गुइमी ग्याइश्शा ङा मिन, कीशा गाउं रे ग्रुंइशा लदा बाक्त। मिनु आ मिक्चीम थुथु पा तोक्शा, आ गुइ आ तारी वोइश्शा “मुल मार मार तवी?” दे हिल्लो पवा बाक्त। यूहन्ना ९:६
24मिनु मेकोमी इर गे कोव़शा “मुरपुकी गाक्शो ताता, तन्न मेको मुरपुकी रवा खोदेंशो तांइसाक्म” देंमाक्त।
25मिनु लेंशा आ गुइ आ मिक्च तारी वोदा बाक्त। मिनु मेकोमी कोव़स ङा कोव़स पा तवा बाक्त।
26मिनु येसुमी “गाउं हेरशा, इ खिं लावो” दे सोइक्ता बाक्त।
27येसु नु आ शेंसीबपुकी सिजरिया फिलिप्पी गे लमा बाक्त। मिनु लांमी गाक्मानु, येसुमी “मुरपुकीमी आं पर्बम मार देंनीमी?” दे हिल्लो पवानु,
28“का निक्शीमी ‘ब्वाक्कुम ख्रुम्शा ग्रुंइब यूहन्ना बाक्माक्त’ देंनीम। का निक्शीमी ‘एलीया बाक्माक्त’ देंनीम। का निक्शीमी ‘परमप्रभु यावे आ लोव़ पाइब का बाक्माक्त’ देंनीम” दे मदमे बाक्त। मर्कूस ६:१५
29मिनु येसुमी “गेपुकी चहिं आं कली सु सुइय्यीनी?” दे हिल्लो पवानु, पत्रुसमी “गे ख्रीस्त बाक्नीनी” देंमाक्त।
30मिनु आ शेंसीब आन कली “एको ख्रीस्त बाक्ब, दे सुइ आन कली मशेंदीन” दे माइक्मी बाक्त। मर्कूस ९:९
31मिनु येसुमी आ शेंसीब आन कली “रागीम जरमेशोमी शुश श्येत जचा माल्ब। जोक्ब तुइक्ब खाल्पा , ठेयब चढ़ेब नु सास्त्रीपुकीमी मेको कली मब्राइनीम, साइक्पाइक्नीम। मिनु बेक्शो आ नित्थ नाक्ती सेंसीब” दे लोव़ मख्रुइक्थु शेंदीमी बाक्त। मर्कूस ४:३१; मर्कूस १०:३२-३४
32मिनु पत्रुसमी येसु कली एर आइक्ची लाइश्शा, हुइक्ता बाक्त।
33मिनु येसु हिरशा, अर्को शेंसीबपुकी गे कोव़शा “ए सैतान, इ कुल मकोंइदी। परमप्रभु यावे आ मिम्शो ममाइ, मुर आन देंशो नेंबाक्ते” दे पत्रुस कली हुइक्ता बाक्त।
34मिनु आ शेंसीबपुकी नु मेकेर देल्शो आन कली ब्रेश्शा “सुमी आं नोले खोइक्चा थुं पाइबा, मेकोमी आंम दला दाक्स पचा प्रोंइशा, श्येत जचा महिंथु, आं नोले खोइय्यील।
35सुमी आंम कली प्रोंइचा माल्बा, मेको जाम्शा लाइब। सुमी आं पर्बम नु परमप्रभु यावे आ लोव़ आ पर्बम आंम कली जिम्मा गेबा, मेको ब्रोंइब। मत्ती १०:१९
36रागी नेल्ल आंम के सेल्ने चाप्ब, तन्न बेक्त हना, मेको मार रिम्शो दुम्बा ङा?
37मारदे हना गे मार गेशा ब्रोंइने चाप्नीनी ङा?
38सुमी हेंथे गाक्ब नु पाप पाइब आन पालामी आं पर्बम नु आं लोव़ आ पर्बम मुर आन कली देंचा मुने पाइबा, मेको आ पर्बम रागीम जरमेशोमी यो आ आफ आ छेङछेङ नु आ स्वर्ग ङा गेय पाइबपुकी नु जाक्मेनु मेको कली तशा मुने पाइब” दे माइक्मी बाक्त। मत्ती १०:३३