Make 8:21-38

²¹Dopa leaminopa baame dokaita lamaiyoo, “Nyakama masetala naelyamiakape?” lea-pyaa.

²²Dokopa dupa Betesaita yuu dokonya epeami-pyaa. Epeaminopa endakali dupame akali lenge monda mende baa kateamo ongonya laminao ipupala baame watandena leami-pyaa.

²³Jisasame akali lenge monda doko kii nyepala yuu taono yakane doko yakinatala kii minao mendasale pea-pyaa. Pupala baame akali dokonya lenge dolaponya sopokali tasinya pisetala, baanya kingi dolapome baa minia-pyaa. Dopa petala, “Embame opale mende kandelepe?” lao baa pisia-pyaa.

²⁴Dopa leamopa baa lenge talyetala, “Nambame endakali dupa kandelyo. Dupa ita mendapua kaita paele pipiminopa kandelyona,” lea-pyaa.

²⁵Dokopa Jisasame akali dokonya lenge dolapo deaka kingimi minia-pyaa. Dopa piamopa akali dokome kandokondape pyoo kandea-pyaa. Baanya lenge dee auu pyoo tapala baame dupa pitaka auu pyoo kandea-pyaa.

²⁶Dopa piamopa Jisasame akali doko andaka pena latala lao pituu, “Emba yuu taono yakane dokonya napupi,” lea-pyaa.

²⁷Jisasapi baanya disaipele dupapi Sisatia Pilipae yuu dokonya yuu taono yakane dupanya peami-pyaa. Pao pituu Jisasame baanya disaipele dupa pisoo, “Endakali dupame namba kandao apina lengemape?” lea-pyaa.

²⁸Dopa leamopa dupame yanu pyao, “Yangimi emba kandao Jone Kaimbu Pingi dokona lengema. Yangimi Ilainjana lengema. Yangimi potopesa dupanya mendena lengemana,” leami-pyaa.

²⁹Dopa leaminopa Jisasame dokaita pisoo, “Dopaka doko, nyakamame namba kandao apina lengemape?” lea-pyaa. Dopa leamopa Pitame yanu pyao, “Emba Kataisa dokona,” lea-pyaa.

³⁰Dopa leamopa Jisasame dokaita kyoto joo lamaiyoo, “Nyakamame namba dokona lao endakali mendaipi mende lamaiya nayalapapena,” lea-pyaa.

³¹Jisasame baanya disaipele dupa panao lamaiyoo, “Endakalinya Ikiningi dokome tanda longo lao napenge. Isingi akalipi, pitisa mupapi, mana setapae masingi akalipi dupame baa daa latala pyao kumasetami. Dopa petataminopa koto teponya baa dee sakatatana,” lea-pyaa.

³²Jisasame pii dutupa panao lea-pyaa. Dopa leamopa Pitame baa laminao umbisale pupala pyalanya lea-pyaa.

³³Dopa leamoaka doko, baame kapilyetala baanya disaipele dupa kandatala Pita pyalanya lao, “Satane, emba nao puu! Embame Gotenya masingi doko masala naenya endakalinya masingi doko masilinona,” lea-pyaa.

³⁴Dopa latala baame endakali kambu dokopi baanya disaipele dupapi epena lea-pyaa. Epena latala dokaita lamaiyoo, “Endakali mendeme namba watao payatoo lao masetamo kandao doko, baame baa tange kame setala baanya ita poko doko nyoo soo namba watao paena.

³⁵Endakali mendeme baa tange isoo auu pyoo katapu laka lao masetamo kandao doko, baa alu pita. Dopaka doko, endakali mendeme nambapa Wai Pii Epe dokopa lao masetala baa tange kame setamo kandao doko, baa auu pyoo katata.

³⁶Doko, endakali mendeme yuunya oapi dupa pitaka nyoo setao katapala baa koyatamo kandao doko, oapi dupa pitakame aipa petala baa nisetape?

³⁷Dee aki mendeme baa tange kapa pao kii tamao nyepengepe?

³⁸Endakali kepo kolenge koo pingi palelyamino dupanya mendeme nambapi nambanya piipi dupanya elya kayatamo kandao doko, Endakalinya Ikiningi doko Takangenya tii pipae dokonya tambetambe enjele etete epe dupa-pipa tole ipatamo dokopa baame apata endakali doko kandao elya kayatana,” Jisasame lea-pyaa.