Mak 8:21-38

²¹Ka vis keil, “?Mukonek, vensa varei kami mirkileatei veah aneite ten tounah keil enek?”

²²Navong uva en out Betsaeta, meatin keil akur metovar tai mai ven Iesu ka apeahi keke vatokoli.

²³Iesu vuli kat meatin enek ka mulamuni lumea ran meteimal. Evus, mutiv kat meten ka ling hen mul ien ka visi vit, “?Mukave, kokilea kovales etai tounah?”

²⁴Ka meatin enek lele rahiti ka viteni vit, “Nales meatin keil asuval vatiai keil koa amul akaikai.”

²⁵Sakini, Iesu ling ris hen mul en meten. Evus, meatin enek lele va ka lei kilea keke meten mai tahos, lei kilea tounah vasi.

²⁶Evus, Iesu vit koe vit, “Konahatei ris en mari meteimal, ka kika mal varei kiha teim.”

²⁷Evus, Iesu ka onen keil uva en meteimal keil koa amul vesesal en out Sesaria-Pilipae. Ka navong amul semau en sise, vis keil vit, “?Meatin keil aviteni avit inau navi meatin sei?”

²⁸Keil avit kesi avit, “Meatin koa avit keik kovi Sion Baptis. Ka meatin koa mun avit keik kovi provet Ilaetsa. Ka keil koa mun avit keik kovi tai en provet keil telamu.”

²⁹Ka vis ris keil vit, “?Mukave en kami? ?Mimundemi mivit inau navi isei?” Ka Pita mea ka vit, “Keik kovi Mesaea koa Ahi vat kati.”

³⁰Ka Iesu vit koe keil keke anahitentei min meatin keil keke kei vi Mesaea.

³¹En avong enek, Iesu vit leini min meatin teindan elu (12) onen vit, “Natin Meatin hekur mahien imok hehi houlu, ka meatin houlu iseseini: elda keil, asuv keil onen pris keil, ka tiser keil ten mengkatien onen Mosis. Keil u vini. Evus, en avong etel, hemoul eris ran matien.”

³²Kei vit vasin tounah min keil. Ka Pita kur seheni havivi, ka vul kati keke nahitentei mun namukonek.

³³Ka Iesu viles, lei rahit meatin keil onen, ka selus keih min Pita vit, “!Temat, kiha ranau! !Rendemien onom musil rendemien onen meatin keil ten out netan, ka romusiltei rendemien onen Ahi!”

³⁴Evus, Iesu vise meatin keil ral min teindan elu (12) onen umai vituai veni ka vit, “Munak keik tai em vati kovousil inau, kisesein moulien onom, kihous aiveave onom, ka kusil inau.

³⁵Veni munak kihuli kat moulien onom, hevuol ranuk. Ka munak kimaen moulien onom hevuol venau ka ven more longlongien onen Ahi, kikur moulien koa vi anatin.

³⁶?Munak kokur tounah vasi ten out netan, ka moulien onom hevuol, koanek tahos enuk? !Vuo!

³⁷Tounah tovuol kovasani keke kovakur ris moulien onom koa sakras vavus.

³⁸Meatin keil ten avong kosa avilelau en tisaen ka amum tisa houlu ral min tounah ten out netan. Ka munak kimemou enau ka hihiseien keil onak, Natin Meatin emun hememou enuk navong hemai ris hetal min angelo keil onen ka hetal min muohien koa Tamen hesani mini.”