MARKUS 8:21-38

²¹Dhali a’di ki o uni gwo mo ki: Dhali ’kona um ki mish gwo ’ban naskina/ mowa?

²²Dhali uni p̱u’dkini Pam Beeṯsayda mo. Dhali ’kwanin tiya suski wathi/ i a’di mo, a’di jin ta’da ja’da/ mo dhali ŋap̱ a’di mo mmota a’di is ki me’d mo be.

²³Dhali a’di ki sus wathi/ jin ta’da ja’da/ ki me’d mo, dhali a’di ki sus a’di ka pije/ ’peni pa mo. Dhali ki a’di ’taḵki manya/ i em piti mo dhali sus a’di ki me’d piti mo tani a’di ki doṯ a’di gwo mo ki: /E mishi toŋ kamu/ p̱ar e mo ’taa?

²⁴Dhali a’di ki hil ’kup̱ ki mis mo dhali o a’di gwo mo ki: Aha/ mishkina ’kwani mo. Hili uni wakina e gi cwa kun iikin mo ’te/.

²⁵Dhali yan’ko’d doḵ/e a’di ki sus a’di ki me’d piti mo dhali kar me’d piti ap̱o/ em piti mo. Dhali a’di hilki’da hil ki dha’k mo dhali wac̱ mo dhali a’di mishki’da ris to ’baar mo eya tente/ mo be.

²⁶Dhala Yesus ki hash a’di bway gu’b piti mo mmo/o gwo mo ki: Dhalku/ ki cic̱ bampa/ mo.

²⁷Dhala Yesus nyaḵ ya ki imanciḵ a’di gwo mo e bampa/ gi Paŋ Kaysariyya mo e Pam P̱ilibbi mo. Dhali e bway tur jin iina uni mo tani a’di ki doṯ imanciḵ a’di gwo gwo mo ki: Ki ’kwani on ki aha/ tana aja mo sa/?

²⁸Dhali kun tiya ki ṯor a’di gwo mo ki: Ka Yohaan jin ta’da manmiiya mii ki yi’de/ mo ti. Dhali kun tiya o ki: Iliyya mo, dhali kun tiya o ki: Jan ṯal ’de/ ’peni imanc̱i gwo ma Arumgimis kadhamo/ mo be.

²⁹Dhali a’di ki thoḵ uni gwo mo ki: Hili idhali um onki aha/ tana aja mo sa/? Buṯerus ki thoḵ a’di gwo mo ki: /E tana Ḵrisṯẖos mo be.

³⁰Dhali a’di ki ḵan uni gwo mo mmodiki ṯor jan ṯal ’deŋ kamu/ gwo gom a’di mo be.

³¹Dhali a’di ṯelki mii ’pen mo dhali ṯor uni gwo mo ki Ya/ gi ’Kwani mina isi ’kosh ka nyor mo gom to ka ris mo dhali mina ’kwaniŋ gwanyjaḵa/ iwaḵ mo dhali igasiis kun can mo dhali iman’kwar to mo, dhali a’di minu ’kosh jwa mo, dhali ’ko’da cim kwara mo tani a’di midi cuyi mis doḵ/e mo be.

³²Dhali a’di o gwo yansan eya thiṯẖin thiṯẖ gana/ mo. Dhala Buṯerus ki bu’th a’di mo dhali ṯel mii ’pen mo mmoḵucur a’di ki gwo mo be.

³³Hili a’di ṯu’kki’da bor mo dhali hil imanciḵ a’di gwo mo tani a’di ki ḵucura Buṯerus ki gwo mo dhali o gwo mo ki: Seṯaan, yaku/ i’ko’di aha/ mmun mo ma. Haali/ /e diki di ki ’ban ma Arumgimis mo hili /e din ka ’ban gi ’kwani mo be.

³⁴Dhali a’di ki yuḵ uni i a’di mo awaambuhany ’kwani nyaḵki imanciḵ a’di gwo mo dhali o uni gwo mo ki: Waḵki/ wathiŋ kamu/ midi yayu/ ibaṯẖ aha/ nsho’k mo tani dhalki a’di non is pitiŋ gana/ mo dhali ’de’k cwany’ciṯẖan dhul piti mo dhali baṯẖ aha/ nsho’k mo.

³⁵Haali/ gom a’diyin jin midi ’taki woṯẖ mondiki/em piti mo tani midi this a’di e mo. Dhali a’diyin jin midi this mondiki/em piti e mo gom gway pem mo tani dhali gom gway gi gwom ’borga/ mo tani midi woṯẖ a’di mo be.

³⁶Haali/ gwo gi wakataye jin nyo/a wathi/ mo waḵki/ a’di midi gam to ’baar mo e mony’cesh mo dhali lo’b mondiki/em piti mii nycine/ mo?

³⁷Haali/ wathi/ midi mish wan mondiki/em piti ’ba/ kata mo?

³⁸Haali/ a’diyin jin mina isi ’theya’the mo gom aha/ mo dhali gom gwom pem mo e bwaman uni gwansan kun tana nyaḵum yil kun ta imanmii miinyc̱al mo dhali imanmii miinthus mo tani Ya/ gi ’Kwani si’da/ a’di mina isi ’theya’the mo gom a’diyin mo ki a’di midi p̱u’du/ mo e monyca gi com mo dhali nyaḵki iman’doyu gwom piti kun ḵogu ilu/ mo be.