San Marcos 8:21-38

²¹Gazeꞌ nu nam rab mi dey: ―¿A walab gaal gabee wagyet lag ruꞌ der cuen? ―nam.

²²Gazeꞌ nu bruꞌñam Betsaida. Zeꞌ bruꞌña nu dey tub mbecy lo caꞌ lom. Mnishbaa dey lom nu gal yaam yu.

²³Orzeꞌ bduꞌ yaam yaa mbecy lo caꞌ zeꞌ. Gua num yu par ruꞌ gyedz. Orzeꞌ pcoom nis yeñ mi urloy nunu gul yaam yu. Gazeꞌ nu bdugyiꞌm loy ben a rzac yu mas ñuu ga.

²⁴Gazeꞌ nu brugyiꞌ rgüiiy. Orzeꞌ nay rab yum: ―Ya̱ rzaca̱ mbecy gal na yag nay rded yu ―nay.

²⁵Bdaabaꞌ yaam urloy. Orzeꞌ mbi la bgüiiy. Orzeꞌ byac yu nunu byanap la rzac yu dela coz.

²⁶Gazeꞌ nu bzuu nez mi yu gyay yuꞌy. Orzeꞌ nam rab mi yu: ―Cueꞌ chuꞌr lat gyedz ii ―nam.

²⁷Despuees orzeꞌ bruu Jesuuz Galilea za num de yu nu rsyaꞌ lom par de gyedz nu yuꞌ lo yu ni Cesarea ni Filipo. Nez zam bdugyiꞌm lo de yu nu rsyaꞌ lom. Orzeꞌ nam rab mi dey: ―¿Cyu rnii mbecy nu nac ya̱? ―nam.

²⁸Orzeꞌ na dey: ―Yuꞌ mbecy rniiy nu ru Waa nu briib nis mbecy. Zeꞌ yuꞌ gaꞌ dey rniiy nu ru Elías. Zeꞌ yuꞌ gaꞌ dey rniiy nu ru tub yu nu guꞌ gulas nu mnii por cuen ni Ñgyoozh ―na dey.

²⁹Orzeꞌ nam rab mi dey: ―Zeꞌ de ru, ¿cyu rnii der nu naca̱? ―nam. Orzeꞌ na Bed rab yum: ―Ru nac ru Mesías, biñ nu ca lo cuen nu co mbañ de mbecy ―nay.

³⁰Orzeꞌ Jesuuz mniim lo dey nu cueꞌ niiy lo ni tub la mbecy cyu nac mi.

³¹Gazeꞌ nu brugyiꞌ rlyuum ni dey nu ub mi, biñ nu byac mbecy, rlagy ñi gzac mi zañ lo coz deet. Nunu de yu bel ni de mbecy Israeel, nu de uz zub lo, nu de yu nu rlyuu leey ni Ñgyoozh, de yu zeꞌ rlagy ñi neꞌ dey mi. Nunu rlagy ñi nu cut dey mi. Tees nañ chon dzi gyabañ mi.

³²Orzeꞌ naal la mniim de coz zeꞌ. Orzeꞌ Bed gua nu reñ yum. Gazeꞌ nu mniiy lom nu cueꞌ ni niim.

³³Tees Jesuuz bish cyam bgüiim lo de yu nu rsyaꞌ lom. Orzeꞌ fert mniim lo Bed. Orzeꞌ nam: ―¡Bruu chu lo̱ ii nuras! Gun shcab nir wasaap ñi shcab ni Ñgyoozh, sinu shcab nir, ndeꞌ shcab ni mbecy ziꞌl ―nam.

³⁴Orzeꞌ bredz mi dela mbecy nu de yu nu rsyaꞌ lom. Orzeꞌ nam rab mi dey: ―Benu ca na mbecy rlagy yu gac yu mbecy nu rsyaꞌ lo, orzeꞌ rlagy ñi cueꞌ gyicy cuen yu coz nu rlagy ub yu. Nunu rlagy ñi shet ic yu nu gzac ziy nu nac ya̱. Orzeꞌ rlagy ñi gyicy yu gal nu rlagya̱.

³⁵Gun yu nu rlagy co nap ub, yu zeꞌ gnit loy. Tees yu nu nit lo nu nac ya̱, nunu nu nac riidz nu sac nu bruu lo Ñgyoozh, yu zeꞌ yu nu rishli gruu mbañ.

³⁶Gun ¿la rusub ni mbecy benu gyicy yu gan dela coz nu yuꞌ gyishlombecy tees lardooy duneꞌñ?

³⁷Nunu ¿la coz gac cyish mbecy nu gyad lardooy?

³⁸Tees cyu ziꞌl mbecy nu gat lo nu nac ya̱ nunu gat lo gaꞌy nu nac de riidz nu rne̱e̱ lo rgüii la mbecy nu wagyicy paa ni Ñgyoozh nunu de mbecy cyi nu yuꞌ na, orzeꞌ niꞌ ya̱, biñ nu byac mbecy, gat lo̱ nu nac de yu zeꞌ ornu shuub dzi nu yapa̱ nu gyel lily ni uza̱ gal nu de anc yon ―nam.