Maka 8:21-38

²¹Eseme Yesuye takaso, “Ayo odoo susuga mapoo wo pi goo ee niyo egeiso. Esino bei kasimaga Pelisi odoo sabolo Helodee dibada goo wo habili masi maga ayo hagee takoo niyo gooleedelega osee ka dabala?”

²²Osoloso diba Betesaida mi omapoo peledoboloso, odoo abo oso odoo howo bakadio si Yesu mapoo ido sibadeeso. Eseme diayo Yesu mapoo howoolone egeesee takaso, “Odoo hagee nee deeso sigoloso yo tekepo pe,” diso.

²³Eseme Yesuye o hamamee dili odoo sabolo dulone, yayo odoo howo bakadio si eyo dee mapoo toloso mosobia amaga yo peegoo ido diso. Osoloso Yesuye o howo mapoo makawo pakanuloso, yayo odoo egeeyo howo mapoo sigoloso, Yesuye yimapoo egeesee takaso, “No epedee bi susuga ogolo?”

²⁴Eseme odoo yayo peegoo ogogolone egeesee takaso, “O olo ogoso, esino odoo silesibono medee koo ogo, diba homo masi silesibo,” diso.

²⁵Eseme Yesuye o deeso see odoo howo bakadio si eyo howo mapoo sigeme, olo epedee omapoo o howo tekepo poloso bi ogogolone egeesee takaso, “Bi susuga medee ogo,” diso.

²⁶Yesu odoo howo bakadio si tekepo moodooloso, Yesuye yo tekepo moodoo odoo abo mapoo takelega pagalame, yo mosopoo diye dolone yimapoo takaso, “No duga mosobia kuloduga na di,” diso.

²⁷Yesu o hamamee dili odoo sabolo abaga mosobia koola Kasaliya Pilipi mi mapoo polone, eli domo dulone, Yesuye o hamamee dili odoo dimapoo woosaso, “Edebeeyo a odoo ogu deliyo?”

²⁸Eseme diayo Yesu mapoo nei egeesee takaso, “Odoo aboso taka no Yonee odoo howo sauwidili odoo toloso hogado simi deliso, aboso taka no Ilaisa deliso, osoloso odoo aboso taka no daga hoogoo Godeeyo to tosili odoo deliso.”

²⁹Yesuye dimapoo woosaso, “Niyo a odoo ogu deliyo?” Eseme Pitaye nei egeesee takaso, “No Keliso, Godeeye hudi magoo oso.”

³⁰Eseme Yesuye dimapoo to kitulugu sabolo egeesee takaso, “Odoo mapoo a Keliso Godeeye hudi magoo dee na takeeye!” diso.

³¹Yesu o hamamee dili odoo eligi mimologolone egeesee takaso, “Odoo Holo, a dala toowa bei talaiso, osoloso Yu odoowo wiligi tebisa sabolo, tei moso wiligi tebisa sabolo, tei eligili wiligi tebisa sabolo oso a gowoolaiso. Osoloso edebeeyo a teli mapoo magalaiso, esino beeame bakadio hedepedi eyo kulodu hogabileiso.”

³²Yesuye goo hagee o hamamee dili odoo dimapoo woola yilege pugume, Pitaye yo peegoo ido dileso yimapoo takaso, “No egeesee na takee.”

³³Eseme Yesu o hamamee dili odoo dimapoo bidi puguloso bolone, Pita mapoo egeesee takaso, “Saiten masi, no amaga peegoo di! Nayo egee takoo edebeeyo goolee takoo Godeeye goolee goo koo takoo.”

³⁴Yesu o hamamee dili odoo sabolo osoloso odoo mooloogoodoo gilimadoloso, dimapoo egeesee takaso, “Edebeeyo ama hamamee dadalai gooleega, diba daga eyo goomoga goo susuga peegee. Osoloso eyo talai sabolo dala toowa talai sabolo goo medee moodoloso ama hamamee ka sibe.

³⁵Odoo agayo o gie badeli goodogoloso medee tekepo badalame gooleega, yo gie badeli osugobalaiso. Esino yayo o su eyo goodegelega pogoloso, mo goo maga osoloso to tekepo eyo goo maga edebeeyo yo wolomaga, yo tei gie badeli agalaiso.

³⁶Esiga edebeeyo mi toowa hamapoo bi susuga egee molo o daga, osoloso o gie badeli osugobooga, bi susuga ogoso yo pidileisomo? Haye.

³⁷Esino mi toowa hamapoo o gie badeli osugobooga, ogoo biso gie badeli see ka talaiyo? Gie badeli see talame bi tenelai bi hee mauwe.

³⁸Esiga edebeeyo Godeebolo ebilega pogoloso, goo tokenee osee tomo silesibo epedee beeame hamapoo, edebeeyo o tei too sabolo, osoloso mo to maga, edebeeyo yimapoo dala teneeyaga obulone, o tei too mada magooga, hamamee mo mayo kitulugu gadeepugu sabolo, osoloso o momaiye sabolo sibileso, nei ayo yimapoo waki pileiso.”