San Marcos 8:21-38

²¹Ipare aipo ehi: —¿Ndapesenducua vɨtei vo? —ehi güemimbohe upe.

²²Oyepotase Jesús tecua Betsaida ve, ahe ramoseve voi ogüeru ndasesapɨsoi vahe yuvɨreco chupe ‘epocomi tẽi sese’ oya yuvɨreco.

²³Evocoiyase oipopɨsɨ ndasesapɨsoi vahe seraso co cotɨmi tecua sui. Aheve omondo güendɨ sesa rese, omondo avei opo iharɨve. Ipare oporandu chupe: “¿Eresepia vo mbahe?” ehi.

²⁴Ndasesapɨsoi vahe omahese, aipo ehi: —Asepia ava inungar ɨvɨra oguata vahe yuvɨreco —ehi.

²⁵Evocoiyase omondo iri opo sesa rese. Ipare co mbɨa omahe tuprɨ ité cute, ocuera ité, opacatu mbahe osepia tuprɨ.

²⁶Ichui Jesús omondo sẽtave aipo ehi chupe: —Ereyevɨ iri eme tecuave —ehi.

²⁷Ipare yuvɨraso Jesús güemimbohe reseve ɨvɨ Galilea sui tecua Cesarea cotɨ, Filipo ɨvɨ rese. Perɨ rupi oporandu güemimbohe upe: —¿Mara ehi vo ava oñehe yuvɨreco che rese? —ehi.

²⁸Semimbohe evocoiyase omboyevɨ yuvɨreco chupe: —Amove ava, “Juan Oporoãpiramo vahe” ehi yuvɨreco ndeu; ambuae evocoiyase, “Elías” ehi; ambuae, “Tũpa ñehe mombehusar mboetasa” ehi yuvɨreco ndeu —ehi.

²⁹Evocoiyase oporandu iri güemimbohe upe: —Pe no, ¿ava, “Co secoi” peye ru pe cheu no? —ehi. Pedro evocoiyase aipo ehi chupe: —Nde niha Tũpa Rembiporavo Poropɨ̃sɨrosar ereico —ehi.

³⁰Jesús rumo, “Pemombehui rene que ñepei ava upe” ehi.

³¹Evocoiyase Jesús omboɨpɨ oporombohe: “Che, Ava Rɨquehɨr, che paraɨsu itera, iyavei opacatu judío rerecuareta, pahi rerecuar ɨvate catu vahe iyavei Moisés porocuaita rese oporombohe vahe remiamotarẽhɨ aicora. Ahe avei che yuca ucara yuvɨreco. Acuerayevɨra rumo mbosapɨ arɨ rupi” ehi.

³²Ahe omboyecua tuprɨ ité chupe. Evocoiyase Pedro vɨraso co cotɨmi chupe oñehengata ãgua.

³³Oyemboyere rumo, omahe güemimbohe eta rese, oñehengata Pedro upe aipo ehi: —¡Esɨrɨ che sui, Caruguar! Esepia, nde nandepɨhañemoñetai mbahe Tũpa upendar rese; ava nungar tẽi nde pɨhañemoñeta eico —ehi.

³⁴Evocoiyase Jesús, “Perio” ehi güemimbohe upe, iyavei ambuae ava upe aipo ehi: —Acoi ava oguata pota vahe che rupi, topoi mbahe güemimbotar tẽi aposa sui, iyavei inungar-ra curusu rese ovosɨira viña, toyemoingatu voi che recocuer rese oparaɨsu ãgua iyavei toguata tuprɨ che rupi.

³⁵Esepia, acoi ava güetecuer tẽi raɨsupar, ocañɨ tẽi etera. Acoi ava omocañɨ tẽi vahe rumo güetecuer che recocuer rese, ñehesa ñepɨsɨrosa sui avei, ahe oñepɨsɨrora.

³⁶¿Avɨye ai angahu pĩha ava upe opacatu mbahe ɨvɨ pɨpendar pɨsɨ ãgua tẽi, ahe ae tẽi omocañɨ güecocuer yuvɨreco viña?

³⁷¿Mbovɨ pĩha omondora ava güecocuer repɨrã viña?

³⁸Esepia, acoi ava yuvɨnochi ai vahe che sui iyavei che ñehengagüer sui ava angaipa viyar ndaseco tuprɨi vahe rovai, che avei, Ava Rɨquehɨr, ẽgüe ahera acoi ayevɨse che Ru reco pĩrata porañetesa pɨpe, sembiguai rehɨi ɨva pendar maranehɨ reseve curi —ehi.