Marcos 8:21-38

²¹Minikagi si Jesus, “Aw wedà niyo iyan kelibeli, nepela a so wedà niyo pa kelebeti se inikagi ko gina diyà kenyo.”

²²Nayan, dimoton si Jesus aw menge tinoledaan din te Bitsayda. Doen menge otaw nengibing te otaw bota doton ki Jesus, aw nemoyò dan te pemàdan din sikandin amon kegolian.

²³Minawid si Jesus te belad te otaw bota, aw inagak din doton te lowà te lonsod. Penga niyan, migsawol sikandin te ngingi diyà te mata te bota, aw nemaed kandin, aw mig-insà, “Doen lay den kinità nikaw?”

²⁴Timengteng se otaw aw minikagi, “Ee. Meneng kenà metaen so iling te lawa te kayo se bawa te otaw kinità ko migpanaw-panaw.”

²⁵Todà nemaed si Jesus te mata din. Penga niyan, ontò timengteng se otaw sìyan aw kinità din se otaw ontò metaen, so migkèpiya den se mata din.

²⁶Penga niyan, impeolì sikandin i Jesus, kagi din, “Ikà eg-apit pengkey doton te lonsod.”

²⁷Nayan, dimeleg si Jesus aw menge tinoledaan din pesalo doton te lonsod te Sesarya Filipos. Peg-ipanaw dan, mig-insà si Jesus diyà kandan, kagi din, “Eden lay se kagi te kedita te otaw tepad kanak? Sinu a lay ekon?”

²⁸Timaba dan, “Doen menge otaw eg-ikagi te sikona si Juan Memonyagay. Doen heman eg-ikagi te sikona si Elias. Doen heman eg-ikagi te sikona se doma telekeliwat te kagi te Timanem gebii.”

²⁹Mig-insà si Jesus, “Meneng eden lay se kenyo aneng-aneng tepad kanak? Sinu a lay?” Timaba si Pedro, kagi din, “Sikona se Misiyas insogò te Timanem dini kenami.”

³⁰Penga niyan, migpunù si Jesus te keilangan eked dan indani diyà te doma otaw tepad kandin.

³¹Nayan, migtoladà si Jesus diyà te menge tinoledaan din aw eden se metoman domateng diyà kandin Timanem Migpekeotaw. Ontò sikandin elegen, aw kuluwan sikandin te menge obanen te Judiyo aw menge pengolo te simbahan aw menenoladà te punù ingkeliwat i Moises. Metoman sikandin imetayan, meneng penga niyan te telo se aldaw, meantay sikandin lekat te nematay.

³²Ontò nebangal se intoladà din kandan. Penga niyan, migpedapag si Pedro diyà ki Jesus, aw minikagi diyà kandin te eked kepakay aw metoman iyan domateng diyà kandin.

³³Meneng timengteng si Jesus diyà te menge tinoledaan din aw ontò minikagi diyà ki Pedro, kagi din, “Kesayo ka lekat kanak. Iling ka ki Satanas, so kenà lekat te Timanem se ibeg no sìyan, meneng lekat iyan te aneng-aneng nikaw.”

³⁴Penga niyan, tinawal i Jesus se menge tinoledaan din sipat kedita te doma otaw netipon kidoen. Minikagi sikandin, “Aw meibeg se otaw tomaking kanak, keilangan megsagda sikandin te ibeg te pedowan din, aw tomayod te kelimahan te kelikit te aldaw pengkey imetayan sikandin, aw keilangan ontò tomaking kanak.

³⁵Pengkey ibeg te otaw megkelayat se omol din dini te keneyonan, meneng kunù din gayed matay. Meneng aw mepakay diyà te otaw pengkey imetayan sikandin tandà te pegtaking din kanak aw pegtoladà din te Mèpiya Indan tepad kanak, begayan sikandin te kaling pedowan wedad temanan.

³⁶So simpana tig-epoen te otaw se kedakel te keneyonan, aw penga niyan matay sikandin aw ipelumun doton te kilot, wedad ontong din,

³⁷so eked kebeyadi se kaling pedowan wedad temanan.

³⁸Aw eked ikagi se otaw te sikandin se sakop ko, aw eked heman tolò te kagi ko meneng tomaking te otaw nelegeb te salà egtinàyog te Timanem, yan se otaw eked ko heman ikegihi te sikandin se sakop ko te peglikò ko. Siak se Timanem Migpekeotaw, aw lomikò a pa dini tekingan te kelangkaw te Amay ko aw sipat menge anghil te Timanem.”