MAAKU 8:21-38

²¹Ben à bèńnɛ: Ai tia a dↄ̃roo?

²²Kɛ̀ aↄ̃ kà Bɛtɛsaida, ben wà mↄ̀nɛ vĩ̀ao wà wɛ́ɛ kɛ̀a à ↄ kɛa.

²³Ben à vĩ̀a pì kũ̀ a ↄↄa à bↄ̀o wɛ́tɛ kpɛɛ. À lóu sù à wɛ́ɛa à ↄ kɛ̀a, ben à à là à bè: Nɛ́ɛ guu eeↄ́?

²⁴Ben gↄ̃gbɛ̃ pì a wɛ́ɛ sɛ̀ musu à bè: Mɛ́ɛ gbɛ̃nↄ ee lán línↄ bà aↄ̃ↄe táa oo.

²⁵Ben Yesu ɛ̀ara à ↄ kɛ̀ à wɛ́ɛa dↄ. Kɛ̀ gↄ̃gbɛ̃ pì wɛ́ɛ kɛ̀ biibii, ben à wɛ́ɛ wɛ̃̀ èe pↄ́ píngi ee sa wásawasa.

²⁶Ben Yesu à gbàrɛ à tá bɛ à bè: Ǹton bↄɛ lakutu guuro.

²⁷Kɛ̀ Yesu e gaa kↄ̃n a ìbanↄ Sizarea Filipi lakutunↄ guu, ben à a ìbanↄ là zɛ́ guu à bè: Dén gbɛ̃nↄ è be má dɛ à ũu?

²⁸Aↄ̃ wèàla wà bè: Gbɛ̃kenↄ è be Yaaya Batisikɛrimɛ, gbɛ̃kenↄ è be Ilia, gbɛ̃kenↄ è be dↄ annabi yãanↄ doken n ũ.

²⁹Ben à ń lá à bè: Apinↄ sↄ̃, dén eè be má dɛ à ũu? Pita wèàla à bè: Mɛsayan n ũ.

³⁰Ben Yesu ń swã sùkãńnɛ lɛ aↄ̃ton yã pì o gbɛ̃ke maro.

³¹Ben à nà yãdannɛnaa à bè: Séde Gbɛ̃ntee Nɛ́ wɛ́ɛtãmma e maamaa, gbɛ̃nsinↄ kↄ̃n sa'orikinↄ kↄ̃n ludayãdannɛrinↄ é gízi, weé à dɛ, à gurↄ aagↄ̃dee zĩ eé fɛɛ.

³²À yã pì òńnɛ wásawasa, ben Pita gàao kpado, èe giinɛ.

³³Kɛ̀ Yesu lìɛ à a ìbanↄ gwà, ben à pàta Pitaa à bè: Ǹ gumɛ gwe Setãn! N laasuu nɛ́ Luda pↄ́nlo, gbɛ̃ntee pↄ́mɛ.

³⁴Beee gbɛra Yesu parii sìsiazi kↄ̃n a ìbanↄ à bèńnɛ: Tó gbɛ̃ yezi à kɛ ma ìba ũ, séde à gí a zĩnda wɛ̃̀ndizi à a líkpansɛ́ à tɛ́omazi.

³⁵Gbɛ̃ kɛ̀ yezi àgↄ̃ a wɛ̃̀ndi kũna é korazi. Gbɛ̃ kɛ̀ gì a wɛ̃̀ndizi ma yãnzi kↄ̃n ma baaru yão sↄ̃, adee égↄ̃ wɛ̃̀ndi vĩ.

³⁶Tó gbɛ̃ gↄ̃̀ anduna vĩ píngi, tó à kòra a wɛ̃̀ndizi, bↄ́ àren à vĩi?

³⁷Bↄ́n gbɛ̃ntee é e à a wɛ̃̀ndi lendee kpáo?

³⁸Tó gbɛ̃ mapi kↄ̃n ma yãnↄ wí dɛ̀ tↄ̃ↄrigbɛ̃ durunde ludanaanɛkɛrisaideenↄ tɛ́, Gbɛ̃ntee Nɛ́ é adee wí dɛ gurↄↄ kɛ̀ eé su a De gakui guu kↄ̃n à malaikanↄ.