SAN MARCOS 8:21-38

²¹Tuhme ra̱hn ye ri ye ihyan chahn: ―Me ¿ta̱ca̱ che hua renahn ne?

²²Ura che nda̱ Dihvo vo nduco ihyan apóstol yahn ye ya̱n Betsaida ne, nda̱ a̱ma o ihyan na̱n ye, nda ye a̱ma sa̱hn na̱n ve, ne chica ye Dihvo vo che cuaconahn ta̱h ye sa̱hn, din ye che ndoyahn se.

²³Tuhme cheta̱h ye ta̱h sa̱hn na̱n ve me, quenda ye sa̱hn cua̱hn chihto ya̱n. Nahn ye nunedan ye ndutina̱n se, ne tumerune ye sa̱hn ndete che a ro na̱n se.

²⁴Sa̱hn min ne, ndihchero se cua̱hn chihto na̱n se, ne ra̱hn se ri se ihyan: ―A ri ro ná̱n ihyan che vatechica ye. Ate nduhca̱ che ro ya̱hn rahte, tihca̱ ro ye.

²⁵Nahn ta̱h ye ndutina̱n se ta̱ma yune, ne ndeta̱hno a chi ro na̱n ndah se.

²⁶Tuhme ndedechuh ye sa̱hn cua̱hn ndeva̱co se, ne ra̱hn ye ri ye sa̱hn: ―Hua conda ya̱n tih, nde hua cahme nduco nde a̱ma ihyan sih ta̱ca̱ chi che ndoyehn.

²⁷Chihno min ne, quenda Dihvo vo ihyan apóstol yahn ye, cuahn ye nduco vih na̱n ya̱n ca̱hya cua̱hn chihto ya̱n Cesarea de Filipo. Cuahn che chenun ye yune ne, tumerune ye ihyan chahn: ―¿Duh u, ra̱hn ihyan ne?

²⁸Ndahconan ihyan chahn yahn ye: ―A̱ma o ihyan ne, ra̱hn ye te ndih ne, Jua̱n Bautista. Ta̱ma te o ye ne, ra̱hn ye te ndih ne, Elías. Ta̱ma te o ye ne, ra̱hn ye te ndih ne, a̱ma cha ihyan profeta.

²⁹Tuhme tumerune ye ihyan chahn: ―Me nchuhn, ¿deh ra̱hn ne yáhn ne? Ndahconan Pedro, ne ra̱hn ye ri ye ihyan: ―A ndih che a va ca̱de che chi ne ndedevahn ne ihyan iyehnse.

³⁰Ate ra̱hn Dihvo vo ri ye ihyan chahn che hua ca̱hma ye chemin nduco nde a̱ma ihyan.

³¹Tuhme ca̱h cuande Dihvo vo ihyan apóstol yahn ye, ne ra̱hn ye: ―U che rinducó nducoya̱ca ihyan ne, va che a̱ma chuhríhn. Intiyahn ma̱n, chidocuya̱n ndina̱n ma̱n, sa̱hn devano ley che dirun Moisés ma̱n ne, co ta̱n se nducó, ne ca̱hno se u. Ate cuihno ino ro ne, va che ntuché va̱n tena̱hn.

³²Nduco chemin ne, ca̱h cuande ndah Dihvo vo ihyan chahn nduhca̱ che cuahno co ye. Tuhme quenda Pedro ihyan a̱ma la̱do, ne ya̱hve ye ihyan ca̱va che hua ca̱h yune ye che tihca̱ cuahno co ye.

³³Ate chaconan Dihvo vo ndihchero ye ihyan apóstol chena̱hn, ne chihya ye Pedro: ―Di ne, ¡nduhca̱ chundah, di! ¡Cuehn a̱ma la̱do! ¡Hua din vahche yáhn!, te di ne, ihyan iyehnse di, nde hua renehn che nahn Dendiohs.

³⁴Ura min ne, cah Dihvo vo ihyan apóstol ma̱n, ihyan che chenun nduco ye ma̱n, ne ra̱hn ye ri ye ihyan: ―Adecoduhno ihyan che nahn conduco ye u ne, va che ca̱hcoma̱n ye vedeyeno yahn ma̱n ye. Hua co che dendudo no conduco ye u, te va che ca̱hco menda̱hn ye ihyan ca̱va che conduco ye u, andahre conahn ya̱h ye na̱n a̱ma cruz ca̱vá.

³⁵Tihca̱, te adecoduno ihyan che hua nahn ca̱hco menda̱hn ye ihyan ca̱va che conduco ye u ne, va che conda ye. Me adecoduhno ihyan che conduco ye u numacuahn chedave yahn ye ne, hua dehve din yahn andahre ca̱hno sa̱hn nunde ihyan yahn che ritahno ye u ma̱n, ndudo ndah yáhn ma̱n, te ndevahn ye.

³⁶Andahre nedin da̱ma ihyan nducuahn vedecuihca che va iyehnse, ate ¿dehra cochihve yahn ye ndete che va che conda ye?,

³⁷te hua cochihve vedecuihca na̱n Dendiohs ca̱va che ndevahn ihyan.

³⁸Tihca̱, te adecoduhno ihyan che co cuihna̱n ye ca̱va u ma̱n, ca̱va ndudo yáhn ma̱n, na̱n ihyan nunde che rahcota̱hn ye yahn Dendiohs ne, namin u che rinducó nducoya̱ca ihyan ne, co cuihná̱n ca̱va ye ro che numacuahn vederihquentiyon yahn Chidá ndá̱ nduco ángel ndah.