Maka 8:21-38

²¹Motong la Yesu iwete pang di nen, “Ngan nga yelei a le lomim galanga pitiao nga?”

²²Yesu iye di galiunu tina ngan tila pombe Betsaida, motong la di tooltool pattu tikaua tool atu yo matan kis in a timan pang ye Yesu. Timan, motong la tiwete panga, inbe timangmang ye be itara baene lo ye tool tani a be nen ngan matana dook mata.

²³Le nga Yesu itoko tool tani yo matan kis in baene, inbe idede a yaru tidu ke diki ke malala tani in. Motong la ikoronai ngoonoo ilo ye tool tani in matana, inbe itara baene lo pono. Inbe itoru nen, “Kumata so sa lapau, too?”

²⁴Ngan tool tani in matana pang ete, inbe iwete nen, “E, akamata di tooltool tipa, bong igalanga tiap, dawa ben kai ila be iman nga.”

²⁵Tina iwete nen nga, le Yesu itara baene mulu lo ye tool tani in matana. Ngan le matana irere le dook mata, inbe ikamata so le imot iken mallangana.

²⁶Motong la Yesu iwete panga nen, “Kin kupa le kulo malala lono be, bong kupa so le kudi rumu kiong.”

²⁷Yesu iye di galiunu titoo dada a tilo pang ye malala kapala yo iken potai pang ye malala mai Sisaria Pilipai i. Ngan tipa dada go, inbe itor di galiunu tina nen, “Ai, di tooltool tiwete be au i sei?”

²⁸Ngan tiyei ne, “Di tooltool kapala tiwete be ong in Yowan yo irriu di tooltool i, inbe kapala ngan tiwete be ong in Ilia. Inbe di tooltool kapala ngan tiwete be ong in Maro koonoo atu yo ke mukot nga.”

²⁹Motong la Yesu itor di mulu nen, “Ngan ang nga, kawete be au i sei?” Ngan Pita iraua betanga ki nen, “Ong in Kirisi, tool yo Maro ipootoo be si ipamulu di tooltool ki ye so dook tiap yo be igarung di i.”

³⁰Motong la Yesu iso lodi be kin tiwete nini pang tool sa be.

³¹Motong la Yesu imadit a ipatomonai di galiunu tina nen, “Tool Moolmool Ke Maro ole isolo moonoo le masngana alunu kaiye. Inbe di tooltool maimai kidi Yuda tiye di tooltool maimai ke paroranga so pang Maro, inbe di pannoongoo ke ger ke Maro ole tiwala muridi panga inbe tiraumate le imata. Bong ole iken ye ke ru, lo ngan be ye tol ki ngan ole imadit mulu ye ni ke matenge.”

³²Yesu iwete pang di a ipagalanga lodi ye betanga i, motong la Pita ikauu a yaru leu tila manga mooloo kasin, inbe ipasak panga a be ilele ye betanga yo iweta i.

³³Bong Yesu ilalele a matana pang ye di galiunu kapala, inbe ipasak pang Pita. Iyei ne, “Satan, kukoo yau a kudu ke murik. Betanga yo kuwete nga, ngan kutoo Maro lono tiap, bong kutoo di tooltool ke tana lodi.”

³⁴Motong la ikiu di tooltool malala mai tina ngan tiye di galiunu man tigaua, inbe iwete pang di nen, “Kumata tool atu lono be man itoo au nga, ngan ya taunu irautoo le du iyepe lopo, inbe ikooroo kai palasingi ki a itoo au.

³⁵Yesoo, sei tool yo lono mai san ye yepongo ki ke tana i mai mata a iparama i, in ole ilene. Bong sei tool yo lono mai san ye yepongo ki ke tana i tiap, inbe iraia tinini le imot pau be iyei urata ke bingi dook mata kiau i, in ole ikaua yepongo dook mata yo taukan motingi i.

³⁶Inbe kumata tool atu be iyau balingi matana matana le imot ke tana i panga, lo ngan be imata a ila nga, ngan ole balingi tina ngan iloni belei?

³⁷Too, soo so dook mata ke be tool sa ikauu pang Maro a be nen ngan iraukolo yepongo ki yo ilene in ye i? So siap!

³⁸Di tooltool yo nookoot tiyepe nga, ngan tikapsap ye dada yo dook tiap nga, inbe tiwala muridi pau a tiyei dawa ben garup yo idada nintooroo la iyei bauk i. Ngan la kumata tool atu be moomoonoo yau, inbe ye betanga kiau le ipataukala ye di tooltool tina ngan matadi nga, ngan ye kene yo be Tool Moolmool ke Maro imulu a isi ye i, in ole moomoonoo ye tool tani lapau. Ya in ole iye di bangabangana ke Maro yo ipootoo di panga ya taunu nga, ngan tisi inbe ole ipatnaia Tamana nunngana yo maiyoko in mallangana a di tooltool tikamata, bong ye kene tani ole moomoonoo ye di tooltool yo muku ngan moomoodi ye nga.”