Mak 8:21-38

²¹Pe kin ŋana lenge na, “Taꞌe yip teter jinjame lakai?”

²²Jisas ŋotop lenge jetalah kin yate jere Betsaida pe, lenge miyeꞌ tuweinge syeꞌ yenge miyeꞌ ŋaiye ŋembep tangar yatme kin. Tinge yaname Jisas ŋaiye ka ikil syep kin el unuh.

²³Pe Jisas narpe syep miyeꞌ ŋembep tangar uku pe, tinge hindi yal tas moi. Kin kusyur tuhwaꞌ nal ŋembep kin miꞌe pe, kin nikil syep nanah kin pe, Jisas ŋisilihme na, “Nin tatame na etekeꞌe ŋainde?”

²⁴Miyeꞌ uku ŋembep ŋanah pe, kin ŋanange na, “Hei, ŋam si metekeꞌ lenge miyeꞌ tuweinge. Kom tinge taꞌe lou yale yat kekep.”

²⁵Jisas plihe nikil syep kin nanah ŋembep miyeꞌ uku pe, ŋembep kin nat bwore pe, kin ŋetekeꞌe ŋaiꞌe ŋaiꞌe bwore yirise ŋoworme.

²⁶Jisas nember kin nal yukoh kin pe, kin ŋaname syep erŋeme na, “Yukur na se plihe el oto moi uku, na pakai.”

²⁷Jisas ŋotop lenge jetalah kin yal moi Sisaria Filipai. Tinge yal yaŋah pe, kin ŋisilih lenge jetalah kin na, “Yini ŋam! Lenge miyeꞌ tuweinge yanange nange ŋam lahmende?”

²⁸Pe tinge yiname na, “Syeꞌ yanange nange nin Jon Baptais, o syeꞌ yanange nin Elaija, topoꞌe syeꞌ yanange nange nin profet ende.”

²⁹Jisas ŋisilih lenge na, “O yip, yip yanange ŋam lahmende?” Pe Pita nungwisme na, “Nin Miyeꞌ alaŋatme Krais.”

³⁰Taꞌe luku pe, Jisas syep erŋem lenge bongol na, “Yukur pa yini lenge mitiŋ me ŋam, na pakai.”

³¹Jisas nalaŋatme wusyep nal lenge jetalah kin taꞌe leꞌe. Talah tikin Miyeꞌ ka ikirh mane embere embere lenge miyeꞌ tuweinge pe, lenge miyeꞌ embep, lenge pris ondoh topoꞌe lenge miyeꞌ sande tekeꞌe embere tikin wusyep erŋeme ka yaŋaꞌe teket me kin. Ka yonombe ka ole, kom ŋup hun ka miꞌe pe, ka plihe tuhur orp laip.

³²Jisas ŋana lenge bworerme gondoume miꞌe pe, Pita nambaꞌe Jisas nenge nal tikihe pe, kin ŋihyele.

³³Jisas nimbilme bep nal lenge jetalah kin pe, kin ŋihyele Pita ŋanange na, “El wohme ŋam Satan! Wusyep nin nase mut miyeꞌ nat! Yukur kin nat gande ŋasande tikin Got.”

³⁴Miꞌe pe, Jisas gal lenge mitiŋ lalme topoꞌe lenge jetalah kin lalme yat pe, kin ŋana lenge na, “Lahmende ŋasande ŋaiye ka gunde ŋam pe, ka tule kitikin pe, ka ikirh loutungwarmbe kin gunde ŋam.”

³⁵Tehei kin taꞌe leꞌe, “Ŋaiye lahende ka ŋoiheryembe wahriꞌ kitikin pe, yipihinge bwore kin ka talai. Kut lahmende ŋaiye ka aŋaꞌe laip kin otme ŋam topoꞌe wusyep bwore mise tikin Got pe, ka orp laip nye nyermbe.

³⁶Ŋaiye miyeꞌ ende ka tutume ŋaiꞌe ŋaiꞌe tetehei lalme ŋaiye kekep no, yipihinge bwore kin ka talai pe, ŋaiꞌe ŋaiꞌe luku se ka ungwisme yipihinge kin tuꞌe la?

³⁷Miyeꞌ yukur ka se aŋaꞌe ŋainde kekep eꞌe ŋaiye ka se ungwisme yipihinge bwore kin, pakai.

³⁸Tukwini ŋup pupwa ŋaiye lenge miyeꞌ tuweinge yende niŋ pinip yar topoꞌe yende ŋaiꞌe ŋaiꞌe tetehei pupwa. Lenge miyeꞌ tuweinge ŋaiye tukwini hiꞌme ŋam topoꞌe wusyep ŋam pe, minde ma hiꞌme tinge moto ŋupe ŋaiye Talah tikin Miyeꞌ ka ot topoꞌe Yirise tikin Yai kin topoꞌe lenge walip hlaꞌ yirise.”