Ruka 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Tibeeriusafa Roomma máqannaasa firaa kiapafa (15) qísaukuqara taikásee qíkunni óoqu moodáannai qiku taikásee aukuana máru kamuqoo mi-fasannái Yudeeaa máqannaasa káqikaa kiapafa qaara auqu faqáafa márinau, Poontiusafa moo áuqu Piratoofa márinau, Mi-fasannái Kariree máqannaasa káqikaa kiapafa Eeroodeefa márinau, Itureea máqannaasa faqa Tarakoonitisa máqannaasa faqa misá káqikaa kiapafa Firipina amaráfa Eeroodeena ákaqa márinau, Abireenee máqannaasa káqikaa kiapafa Risaniasafa márinau.

²Yeerusaree máqusai Ánutuna aanáiqikiraqanda Annasafa faqa Kaiafasafa faqa máriqau. Mi-aukuanná Seekariana ámaaku Yoohaneefa káasau aadána maqa maaqaki márufanoo Ánutuna ufa fannoo Yoohaneena áakufufanoo fíndifinoo Yooradanna námmari áfaiqara márusaki óonuree anirée ídanoo Ánutuna ufa faiqí ánaasee qímanniminoo nídanoo qinau.

³Ínneeqa mandá márirana minnísee Ánutufinnai ubeekáifaqa nammári rúma nímaqaanaura miqí másaifanoo Ánutufa ínni mandáinaina minínnisee sía náruannoo.

⁴Yoohaneefa náuraa tamummaqara fasiqa ákara rúmaqoona ufamáu fínoo miqí marínau, mi-tamummaqara fasiqáfa maaqí qímasee ákara rinau. Káasau maqa maaqakiqari faiqí moó maaqí qímasee namméera qídanoo faiqí ánaasee qímannidanoo karaambáiqa ánianínna aanna afisúaqa miná aaná eendaándirana andeeqáa.

⁵Arumukíranaki maqá apaurú quqáina qumbíqaani ámuaqunamu faqa áaqana faqa apaurínanoo afaasáikiani.

⁶Eendaándira aana aiqáma andeeqáa mandáikiranaki ánukamásaina raununukáani miqímasaifaqa aiqáma anaamuru Ánutufa asumu máraanínnana qáfeefaranoo.

⁷Miqí qímasee tamummáqara fasiqa óoqai qímasee ákararinau. Faiqí ánaasee moómoosa uqanna Yoohanee fínnai Yooradana námmari márunnai ooqureeqa nammári márarara óoqu fíqau. Yoohaneefa rúmannimaqararee qímaseenoo misá níkaruqiranara irisée qímannimidanoo qinau, Ínnee ukadiqa faiqinámuara foora Ánutufa náriranara rufíasee ínneeqa mandá oosanakiqari kambaarámasee asúkaki qinée márunnaqoo anirée fee únna qímasee nammári márararee qídee. Ánutuna áanoo irana ínnisaa áqufuaninafa yáfee ínni aaquqímánnimaqáifaqee minakíqari sandée qinée únnaqoo anirée nammári nímirarúnnana mandaaqaídee.

⁸Ínnee maasá Abarahaamana átiuqa márunausa máridee qímasaida Ánutufa asumu márirana káqi qímianífee qímariafanoo, áaqaida miqí qímariafanoo. Ínneeqa mandóosana minnísee andeeqára oosana máraifaqa qáfeeqa ínniara kúqaa naundurá quandárausee qímasee ámiqira saqari qaqamará foora íraidaqee qianáura. Ínnee fífau Abarahaamana áti fee qímariasa, mifá fífau ainaina máridanoo, íriaqa Ánutufa amaná qifanoo máa̱ fífau ooniuqasaaqari faiqikámmafi Abarahaamana átiuqasaa amaná ootúpaqa máriannoo. Ínnee Abarahaamara áti fee qímariana fífau ufa kái qímariafanoo.

⁹Ánutufa saasúnara foora ateekárana dóo rauqísee máridanoo, sía naundurá quandáinausa Ánutufa nárirafa qúsandaannoo aiqámausa saqáriara foora sía ámiqira qaqama íraifanoo ateeká idáki áquannoo.

¹⁰Faiqí ánaasee Yoohaneena aaquqíra ufa iriséeqa qiqau.

¹¹Óo Yoohanee maasá aní ufara náqi fee ianáuree qufanoo Yoohaneefa qímanniminoo qinau, qaara siuta faqáafa siuta síaina moó ámia nárana faqaafa rainásee nárana síaina ámia.

¹²Roomma máqannaa takísa munnimma máree maríasa faqa Yoohaneefa márunnai aniréeqa irámiriqau, óo ufasáa rakísirafa maasá náqi fee ianáuree qufanoo Yoohaneefa qinau.

¹³Ínnee andeeqásee takísa munnimmá kai máraaqa sía qúmmuarirana ootúpamásee máraaqa.

¹⁴Miqí qímasee qímannimisoofaqa Roomma máqannaa sundíauqa anirée irámiriqau, maasá faqa náqi fee ianáuree anée maasára nánee fee qinnáree qufanoo Yoohaneefa qinau, Ínnee sía áanóo iranannai moosá munnimma qúmmuariaqa, sía únnufannai kóotamasee moosá munnimma aina qúmmuariaqa. Ínneeqa saika ákiqara feefaurú marasée sía minára mandá ufa qímasee ninunú ruaqa. Minára amana fée qímasee nifaaqa quqáaqa.

¹⁵Faiqí ánaasee moómoosa Isaraee máqannaasa Yoohaneenara iriséeqa qiqau, óoqai Ánutuna tamummáqara fasiqauqa Ánutuna ásauku mundírafa kambíqaannoommifoo qímaqoofa mifée qímasee misá naundurá uqéeraqau.

¹⁶Yoohaneefa minára iriséenoo qímanniminoo qinau, qinée fífau nammárinnai ínni rúmannimaqaidaqa, moó fannoo firaaqóo qiní úriqararafa ániannoo, náqimasee fee qinée miná dadaaqianáuree. Qinée fífau ainainará foora márianaura, mifá káaqa úridaqaaqaramásee úriqararafa máriannoo. Mifá Ánutuna maraqunannái faqa idánnai faqa rúmannimaqaannoo.

¹⁷Maraqunannái rúmannimaqarafa faqa kudimakírana qaanínna idánnai rúmannimaqarafa faqa minára oofáafana anoona faqa ánaaqmaara faqa kíkiqa úsidanoo. Mifá faiqí ánaasee oofáafanara foora ásaukunnoo utitíqa máseenoo ánaaqmaara fúaqa áquseenoo ánoona mara máaqaki quqéenoo ánaaqmaara idá firaafa sía dimbéemari idanaki áraannoo.

¹⁸Yoohaneefa ámiqira fasaasa ufa faiqí ánaasee qímannimidanoo óosana óosana úfannai misá fuki faakí qímarinau, Ánutuna ufamáu fuaqéera qímannimimárinau.

¹⁹Kariree máqa maaqaki káqikaa kiapafa Eeroodeefa narí ákaqa ánaaqa miná áuqu Eeroodiasa námmarina úmmuara maraséenoo óosana óosana mandainaina faqa máree marínau. Yoohaneefa Eeroodiasa námmarina mároonara qáoo qufanoo Eeroodeefa narí mandáinaina óosana fannoo úriqaroonara Yoohaneena rumbáranaki quqánau.

²¹Yoohaneefa káqi máru aukuana faiqí ánaasee moómoosa nammári máreesoofanoo Yísufa faqa aniroofanoo Yoohaneefa miná faqa nammáriki mara kéeqaseenoo Yísufa nammárikiqari fíndifinoo innaaru qímarufanoo innaarúna rakéemafufanoo Ánutuna náaquqara andeeqara maraquna fannoo nakipurúnaikámmafinoo Yísunasaa áqufufanoo innaarúnaindari ufa moó kambíqeenoo qinau. Anée qiní qímuqusímarianna qímaakufa máriananoo firaaqóo aníara dídidanoo.

²³Yísufa (30) qiní qíku qísauku taikásee moo fásiqa ásaukuqara taikásee aukuana maraséenoo narí saika óosana áranau. Aiqáma fasiqa ánaasee sía miná óosana írirai minára Yooseefaana ámaaku fee qímariqau. Yooseefaafa Eerina ámaaku márinau.

²⁴Eerifa Matatana ámaaku márinau. Matatafa Reefina ámaaku márinau. Reefifa Meerakina ámaaku márinau. Meerakifa Yanaina ámaaku márinau. Yanaifa moó Yooseefaana ámaaku márinau. Yooseefaafa Matataiasana ámaaku márinau. Matataiasafa Amoosana ámaaku márinau. Amoosafa Naqummana ámaaku márinau. Naqummafa Eesirina ámaaku márinau. Eesirifa Nakaina ámaaku márinau. Nakaifa Maatana ámaaku márinau. Maatafa moó Matataiasana ámaaku márinau. Matataiasafa Seemeena ámaaku márinau. Seemeenafa Yooseekana ámaaku márinau. Yooseekafa Yoodana ámaaku márinau. Yoodafa Yooannana ámaaku márinau.

²⁷Yooannafa Reesana ámaaku márinau. Reesafa Seerubabeerana ámaaku márinau. Seerubabeerafa Seearatieerana ámaaku márinau. Seearatieerafa Neerina ámaaku márinau.

²⁸Neerifa Meerakina ámaaku márinau. Meerakifa Adina ámaaku márinau. Adifa Koosamana ámaaku márinau. Koosamafa Eeramadamana ámaaku márinau.

²⁹Eeramadamafa Yoosuana amarána ámaaku márinau. Yoosuafa Eerieeseerana ámaaku márinau. Eerieeseerafa Yoorimana ámaaku márinau. Yoorimafa Matatana amarána ámaaku márinau. Matatafa Reefina amarána ámaaku márinau. Reefifa Simeeoona amarána ámaaku márinau.

³⁰Simeeoonafa Yudana amarána ámaaku márinau. Yudafa Yooseefaana amarána ámaaku márinau. Yooseefaafa Yoonamana ámaaku márinau. Yoonamafa Eeriakimana ámaaku márinau.

³¹Eeriakimafa Meereeana ámaaku márinau. Meereeanafa Meennana ámaaku márinau. Meennafa moó Matatana ámaaku márinau. Matatafa Natannana ámaaku márinau. Natannafa Dafidina ámaaku márinau.

³²Dafidifa Yeeseena ámaaku márinau. Yeeseefa Oobeedana ámaaku márinau. Oobeedafa Booasina ámaaku márinau. Booasifa Seeraana amarána ámaaku márinau. Seeraafa Naasoona ámaaku márinau. Naasoofa Aminadabana ámaaku márinau. Aminadabafa Adimina ámaaku márinau.

³³Adiminafa Aranina ámaaku márinau. Aranifa Qeesaroona ámaaku márinau. Qeesaroofa Peereesana ámaaku márinau. Peereesafa Yudana ámaaku márinau.

³⁴Yudafa Yakooboona ámaaku márinau. Yakooboofa Isakeena ámaaku márinau. Isakeefa Abarahaamana ámaaku márinau. Abarahaamafa Teeraana ámaaku márinau. Teeraafa Naqoorana ámaaku márinau. Naqoorafa Seerukana ámaaku márinau.

³⁵Seerukafa Reeuna ámaaku márinau. Reeufa Peereekana ámaaku márinau. Peereekanafa Eebeerana ámaaku márinau. Eebeerafa Seeraana ámaaku márinau. Seeraafa Kainnana amarána ámaaku márinau.

³⁶Kainnafa Arafadana ámaaku márinau. Arafadafa Seemana ámaaku márinau. Seemanafa Nooana ámaaku márinau. Nooafa Rameekana amarána ámaaku márinau. Rameekafa Meetuseerana ámaaku márinau.

³⁷Meetuseerafa Eenookana ámaaku márinau. Eenookafa Yareedana ámaaku márinau. Yareedafa Maqarareena ámaaku márinau. Maqarareefa moó Kainnana ámaaku márinau. Kainnafa Eenoosana ámaaku márinau.

³⁸Eenoosafa Seetana ámaaku márinau. Seetafa Adamana ámaaku márinau. Adamafa Ánutuna ámaaku márinau. (Ánutufa narí kambíqarafa márinau.)