LUCAS 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Toteco quinotzqui Juan quema Tiberio César yahuiyaya para caxtoli xihuit tanahuatis ipan Roma huan ipan nochi talme cati Roma iaxcahua. Huan Poncio Pilato eltoya gobernador ipan estado Judea, huan Herodes Ántipas ipan estado Galilea. Huan iicni Herodes cati itoca Herodes Felipe II eltoya gobernador ipan estados Iturea huan Traconite. Huan Lisanias eltoya gobernador campa itoca Abilinia.

²Huan Anás huan teipa Caifás eltoyaj huejhueyi totajtzitzi. Huan ipan ni tonali Toteco quinotzqui Juan, itelpoca Zacarías, huan quimacac icamanal para tayolmelahuas quema yaya itztoya ipan nopa huactoc tali campa amo teno eli.

³Huajca Juan pejqui nejnemi campa hueli ipan nopa tali nechca hueyat Jordán, huan tepohuilijtinemiyaya icamanal Toteco. Quinilhuiyaya masehualme ma moyolpataca, huan ma quicahuaca inintajtacolhua huan ma mocuaaltica para Toteco quintapojpolhuis.

⁴Cati Juan quichihuayaya quitamiltiyaya cati nopa tajtolpanextijquet Isaías huejcajquiya quiijcuilo para Juan quichihuasquía. Isaías quiijto: “Masehualme quicaquise se cati camanaltis chicahuac ipan nopa huactoc tali campa amo teno eli. Quiijtos: ‘Xijcualtalica amoyolo pampa hualas Tohueyiteco. Xijsencahuaca huan xijxitahuaca iojhui para ipan nemis.

⁵Xijtemitica nochi campa taostotic. Xijsepanoca campa tafiero, huan xijxitahuaca nochi ojhuijhuijcoli, huan xicalaxoca nochi talcojcomoli.

⁶Pampa hualas yaya cati Toteco Dios techtitanilijtoc para techmaquixtis ten totajtacolhua, huan nochi masehualme quiitase.’ ” Quej nopa quiijcuilo Isaías huejcajquiya.

⁷Huan miyaqui masehualme ajsiyayaj campa Juan para ma quincuaalti, huan yaya quinilhuiyaya: ―Ancohuame. ¿Ajquiya amechilhuijtoc para Toteco amo amechtatzacuiltis teipa sinta anmocuaaltise?

⁸Amo quej nopa. Monequi xijchihuaca cati cuali para nochi quimatise sinta nelía ya anmoyolpatatoque huan anquicajtejtoque amotajtacolhua. Amo ximoilhuica para amo teno amechajsis pampa aniteipan ixhuihua tohuejcapan tata Abraham, pampa Toteco hueli quincuepas ni teme iteipan ixhuihua Abraham sinta quinequi quichihuas.

⁹Quej tacame quitzontequij cuame cati amo temacaj inintajca huan quitatíaj, Toteco nojquiya ya itztoc para amechtzontamiltis huan amechcuamajcahuas ipan tit.

¹⁰Huan nopa masehualme quitatzintoquilijque: ―Huajca, ¿taya monequi tijchihuase?

¹¹Huajca Juan quinilhui: ―Xijchihuaca cati cuali. Cati quipiya ome iyoyo ma quimaca se cati amo teno quipiya. Huan cati quipiya tacualisti nojquiya ma temajmaca.

¹²Huan nojquiya hualajque para mocuaaltise sequinoc tacame cati tainamaj impuesto, huan nochi masehualme quimatque para tahuel tacajcayahuaj, huan nopa tainamani quitatzintoquilijque: ―Tamachtijquet, ¿taya monequi tijchihuase tojuanti?

¹³Huajca Juan quinilhui: ―San xiquininamaca masehualme cati quiijtohua nopa tanahuatili.

¹⁴Huan hualajtoyaj sequij soldados cati quitatzintoquilijque: ―Huan tojuanti, ¿taya monequi tijchihuase? Huajca Juan quinilhui: ―Amo xiquinchihualtica masehualme ma amechtamajmacaca. Amo aqui xijtelhuica ica cati amo nelía melahuac huan xipaquica san ica cati anquitanij.

¹⁵Huan amo molinijque nopa masehualme cati itztoyaj nopona. Nochi san quichiyayayaj huan moyolilhuiyayaj sinta huelis Juan eliyaya nopa Cristo cati Toteco quitencajqui techtitanilisquía.

¹⁶Huajca Juan quinilhui nochi nopa masehualme: ―Na nimechcuaaltía san ica at, pero yaya cati hualas teipa quipiyas más chicahualisti que na. Ya nimechilhuijtoc ten ya. Amo nicaxilía para nijtequipanos, yon amo para nijquixtilis itecac. Yaya amechmacas sequij amojuanti Itonal Toteco huan sequinoc amechtatzacuiltis ica tit.

¹⁷Yaya quiniyocatalis masehualme cati iaxcahua ica inijuanti cati amo. Quena, Toteco quichihuas quej se tacat cati quitequihuía itaajacapehuilol para quiyejyectis trigo. Quinhuicas masehualme cati iaxcahua quej se tacat quitalis itrigo ipan icuacalhua. Huan nopa sequinoc masehualme quintatis ipan tit cati amo quema sehuis quej se tacat quitatis itasolo trigo.

¹⁸Quej nopa, Juan quinyolmelajqui nochi nopa masehualme miyac tamanti quema quincamanalhuiyaya ten icamanal Toteco.

¹⁹Huan teipa Juan quitelhui Gobernador Herodes Ántipas pampa mocuili ihuejpol cati itoca Herodías para elis isihua. Herodías eliyaya isihua iicni cati itoca eliyaya Herodes Felipe II. Nojquiya Juan quitelhui Herodes Ántipas ica sequinoc tamanti cati fiero quichihuayaya.

²⁰Huajca nopa Gobernador Herodes Ántipas noja más fiero quichijqui huan quitzajqui Juan.

²¹Pero quema ayemo quitzactoyaj Juan, quincuaaltiyaya miyaqui masehualme, huan Jesús nojquiya hualajqui campa itztoya huan mocuaalti. Huan ipan nopa talojtzi quema mocuaaltiyaya, Jesús motatajtiyaya huan tapojqui ilhuicac,

²²huan hualtemoc Itonal Toteco ipan ya. Huan Itonal Toteco nesiyaya quej se paloma. Huan Toteco Dios camanaltic ten ilhuicac huan quiilhui Jesús: ―Ta tiNocone cati nimitzicnelía huan nipaqui miyac ica cati tijchihua.

²³Huan Jesús quipixtoya se treinta xihuit quema quipehualti itequi huan pejqui nentinemi para tepohuilis icamanal Toteco. Huan masehualme moilhuiyayaj para eliyaya icone José. Huan José eliyaya icone Elí,

²⁴cati eliyaya icone Matat, cati eliyaya icone Leví, cati eliyaya icone Melqui, cati eliyaya icone Jana, cati eliyaya icone José,

²⁵cati eliyaya icone Matatías, cati eliyaya icone Amós, cati eliyaya icone Nahúm, cati eliyaya icone Esli, cati eliyaya icone Nagai,

²⁶cati eliyaya icone Maat, cati eliyaya icone Matatías, cati eliyaya icone Semei, cati eliyaya icone José, cati eliyaya icone Judá,

²⁷cati eliyaya icone Joana, cati eliyaya icone Resa, cati eliyaya icone Zorobabel, cati eliyaya icone Salatiel, cati eliyaya icone Neri,

²⁸cati eliyaya icone Melqui, cati eliyaya icone Adi, cati eliyaya icone Cosam, cati eliyaya icone Elmodam, cati eliyaya icone Er,

²⁹cati eliyaya icone Josué, cati eliyaya icone Eliezer, cati eliyaya icone Jorim, cati eliyaya icone Matat,

³⁰cati eliyaya icone Leví, cati eliyaya icone Simeón, cati eliyaya icone Judá, cati eliyaya icone José, cati eliyaya icone Jonán, cati eliyaya icone Eliaquim,

³¹cati eliyaya icone Melea, cati eliyaya icone Mainán, cati eliyaya icone Matata, cati eliyaya icone Natán,

³²cati eliyaya icone David, cati eliyaya icone Isaí, cati eliyaya icone Obed, cati eliyaya icone Booz, cati eliyaya icone Salmón, cati eliyaya icone Naasón,

³³cati eliyaya icone Aminadab, cati eliyaya icone Aram, cati eliyaya icone Esrom, cati eliyaya icone Fares, cati eliyaya icone Judá,

³⁴cati eliyaya icone Jacob, cati eliyaya icone Isaac, cati eliyaya icone Abraham, cati eliyaya icone Taré, cati eliyaya icone Nacor,

³⁵cati eliyaya icone Serug, cati eliyaya icone Ragau, cati eliyaya icone Peleg, cati eliyaya icone Heber, cati eliyaya icone Sala,

³⁶cati eliyaya icone Cainán, cati eliyaya icone Arfaxad, cati eliyaya icone Sem, cati eliyaya icone Noé, cati eliyaya icone Lamec,

³⁷cati eliyaya icone Matusalén, cati eliyaya icone Enoc, cati eliyaya icone Jared, cati eliyaya icone Mahalaleel, cati eliyaya icone Cainán,

³⁸cati eliyaya icone Enós, cati eliyaya icone Set, cati eliyaya icone Adán, cati eliyaya icone Toteco Dios.