Luke 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Ka munia aitam ponimana omo, ka tau veimea ai wava tupwai deina. Me Rom ai tau veimea (o kadi yai sisaV) ana wava Tiberiusi, ka tauna avaha vi‑sisaV ponimana ai yau 15 iakwa. Ka papani Iudea a tau veimea Rom wayahina ana wava Ponitiusi Pilate. Ka papani Galili a tau veimea ana wava Erodi, ka tauna vaneina ana wava Pilipi papani Iturea kadu papani Tarakonitisi veimeyei. Ka papani Abilene a tau veimea ana wava Lisaniasi.

²Ka Anasi kadu Kaiapasi ainua tau vi‑nomu anani. Ka ponimana tanoi nihenina Yaubada yana vona omo Sekaria natuna ana wava Ioni wayahina. Ka tauna papani anata mamaei.

³Wayahina, Ioni udanata ni‑tawanei, omo Daudau Ioridani a papani wayahina, e tomotau tenoke naunau‑wahei, ivona, “Itomi nau‑wawanimi yami dewa goyona uvihahaiei, e avi‑bapitaisoemi, e Yaubada yami goyona na‑nua‑piahi deina.”

⁴Nonova tau apa‑taputapu ana wava Isaia yana buki nihenina ginumi deina, ka Isaia Ioni yana dewa apa‑taputapuei, ivona, “Tau vi‑hone aitam udanata movina ananina vi‑honehone, ivona, ‘Nau‑wawanimi Kauvea ya etawana uvunahi kadu uvo‑vi‑tunutunuhi, ka ya paisewa uvo‑vi‑meani deina!

⁵Nau‑wawanimi avi awa‑haha ataina imamaei uvi‑nau‑vi‑anai nau‑peuna, kadu avi oya o avi atu‑oyaoyana ataina imamaei utana‑yaveni. Ka nau‑wawanimi avi etawana bwagobwagona uvo‑vi‑tunuhi, kadu avi etawana vitana uvo‑vi‑meani.

⁶Iakwa, e tomotau habuhabui ito‑yavuha Yaubada wayahina idueyei!’”

⁷Ka tomotau habuhabui iomomo Ioni wayahina, iuna yai nuanua tauna vi‑bapitaisoei, ka Ioni naunau‑wahei, ivona, “Ia! Taumi tau vitupu, mwata deina! Avaha uanamanei Yaubada ya nua‑goyo kadu ya dewa‑yaiyai inꞌ‑omo, ka ataina yami nuanua dewaia ainua una‑novo‑tawanei, a?

⁸Akanai ka, nau‑wawanimi yami nua‑vinana ahiahina Yaubada uviwavenei yami dewa ahiahina wayahia. Eha uvonavona wayahimia, ‘Itoai Abaraham ya tupua‑nenenehi. Wayahina, vona ahiahina, Yaubada dune‑nuanuaieai.’ Ataina avonemi eha ana pata! Memeanina Yaubada wayahina hanu taina wayahia tauna Abaraham ya tupua‑nenenehi vovoui vevewane‑neiei.

⁹Udune‑vivinimi! Aituhu yami dewa eha ahiahina, tuta eha ani‑hoina na‑iakwa wayahina Yaubada na‑tana‑yavunemi, tomotau ai eha uana ahiahina itana‑yavunei aitamoata deina. Ka Yaubada ai ananata nihenina na‑onemi nꞌ‑anaimi.”

¹⁰Ka yokoia Ioni ivi‑tanaiei, ivona, “Aituhu yam vonana tunuhina, aviani nau‑wawaniai adedewei, e avidoha Yaubada matana?”

¹¹Ka Ioni vona‑nau‑pata, ivona, “Aituhu aviyaivia wayahimia ami kwama ainua, ka aituhu koiaka eha ana kwama, akanai tauna aitam uvenei. O aituhu aviyaivia wayahimia ami maꞌ anani, akanai tau am navovo uvo‑patai.”

¹²Ka takesiV a tau vitue tupwai iomo ai bapitaiso wayahina, ka taui Ioni ivi‑tanaiei, ivona, “Tau Viwavenena, medeina eveimeyeai?”

¹³Ka Ioni ivona, “Nau‑wawanimi takesiV uvivitue takesiV a veimea aitamoata deina, ka eha yami nuanua uboubou hetana.”

¹⁴Ka tau nau‑havia tupwai ivi‑tanaiei, ivona, “Ka itoai medeina ama veimea?” Ka Ioni ivona, “Eha tomotau uvo‑vi‑matautei, e taui yai kina ivenevenemi, ka eha uvitupu‑kavokavovo tomotau wayahia. Ka nau‑wawanimi ami nau‑pata ataina wayahina udewa‑haiawa. Eha tuta tuta unau‑vonuvonu ami nau‑pata wayahina.”

¹⁵Ka tomotau habuhabui Tau Ito‑yavuha yana omana ipotepotei, ka tupwai inuanua‑mwagemwage tauna vivane Ioni.

¹⁶Wayahina Ioni vonei, ivona, “Yauke daudaua avi‑bapitaisoemi. Ka aitam onoto muniua omomoi, ka tauna vi‑bapitaisoemi dewa ainua wayahia, vivane Nuana Ahihinata wayahina, ka kadu ai ananata wayahina. Ka tauna bagibagi‑tawaneu deina. Eha nau‑wawaniu aena anꞌ ae‑yapayapa a manawa ayavuhi, iuna tauna ananina, ka yauke kikitu.

¹⁷Ka onoto‑nana yana ipea witiV na‑yueyue, e uana imaumaua. Ka munia, tauna uana ahiahi na‑totohi yanꞌ anana nihenina, ka hainina ai ananata‑vavaha nihenina na‑tunui.”

¹⁸Ka Ioni tomotau naunau‑wahei vona habuhabuna ka tunina tunina wayahia, ka Vaneana Ahiahina naunau‑waheyei.

¹⁹Kate Ioni KiniV Erodi yapoyapoi, iuna Erodi avaha vaneina awana ai wava Erodiasa awa‑nemei ka tavine‑tamanei, ka Ioni kadu Erodi ya goyona tunina tunina haehaeyei.

²⁰Ka aitam auyewa Erodi Ioni poyꞌ‑avini, e manua yohona nihenina boui. Ka dewana wayahina Erodi tauna ya dewa goyona vo‑vi‑natei.

²¹Ka tuta tanoi wayahina, tutana Ioni ni‑awana ka paipaisewa, tauna yoko habuhabui vi‑bapitaisoei. Ka munia, kadu Iesu omo wayahina, e Ioni kadu Iesu vi‑bapitaisoei. Ka Iesu Yaubada wayahina viama, ka wahuma am‑waei,

²²ka Nuana Ahihinata opu‑me Iesu wayahina aitam bunebune deina. Ka aitam movi wahuma wayahina Iesu vonei, ivona, “Wamke Natu‑hoiu adune‑nuanuaiem, ka wayahim adewa‑haiawa ananina.”

²³Ka tutana Iesu a ponimana ai yau 30 vaniahei, tauna ya paisewa tomotau wayahia vi‑putu. Ka tomotau habuhabui ivitumahana‑kavokavovo vivane tauna amana Iosepa. Ka Iosepa amana Eli

²⁴ka Eli amana Matati ka Matati amana Levi ka Levi amana Meliki ka Meliki amana Ianai ka Ianai amana Iosepa.

²⁵Ka Iosepa amana Matatiasi ka Matatiasi amana Amosa ka Amosa amana Nahum ka Nahum amana Esili ka Esili amana Nagai.

²⁶Ka Nagai amana Maati ka Maati amana Matatiasi ka Matatiasi amana Semeini ka Semeini amana Ioseki ka Ioseki amana Ioda.

²⁷Ka Ioda amana Ioanani ka Ioanani amana Resa ka Resa amana Serubabela ka Serubabela amana Sealitieli ka Sealitieli amana Neri.

²⁸Ka Neri amana Meliki ka Meliki amana Adi ka Adi amana Kosam ka Kosam amana Elimadam ka Elimadam amana Eri.

²⁹Eri amana Iosua ka Iosua amana Elieseri ka Elieseri amana Iorim ka Iorim amana Matati ka Matati amana Levi.

³⁰Ka Levi amana Simeoni ka Simeoni amana Iuda ka Iuda amana Iosepa ka Iosepa amana Ionam ka Ionam amana Eliakim.

³¹Ka Eliakim amana Melea ka Melea amana Mena ka Mena amana Matata ka Matata amana Natani ka Natani amana Davida.

³²Ka Davida amana Iese ka Iese amana Obedi ka Obedi amana Boasa ka Boasa amana Salimoni ka Salimoni amana Nasoni.

³³Ka Nasoni amana Aminadaba ka Aminadaba amana Adamini ka Adamini amana Arani ka Arani amana Esironi ka Esironi amana Peresi ka Peresi amana Iuda.

³⁴Ka Iuda amana Iakobo ka Iakobo amana Isaki ka Isaki amana Abaraham ka Abaraham amana Tera ka Tera amana Naori.

³⁵Ka Naori amana Seruge ka Seruge amana Reu ka Reu amana Pelegi ka Pelegi amana Eberi ka Eberi amana Sela.

³⁶Ka Sela amana Kainani ka Kainani amana Arapakisadi ka Arapakisadi amana Semi ka Semi amana Noa ka Noa amana Lameki.

³⁷Ka Lameki amana Metusela ka Metusela amana Enoki ka Enoki amana Iaredi ka Iaredi amana Mahalaleli ka Mahalaleli amana Kenani.

³⁸Ka Kenani amana Enosi ka Enosi amana Seti ka Seti amana Adam ka Adam amana Yaubada.