1Zacariaspa surin Juan sunyag jircacho caycaptinmi Tayta Diosninsi nergan wilacuyninta wilacunanpä. Say wisanmi Tiberio jutiyog runa emperador César caycargan. Paymi chunca pisga (15) watana lapan nacionpa mandagnin caycargan. Saynöpis Poncio-Pilato gobernador caycargan Judea provinciacho. Herodisnami mandag caycargan Galilea provinciacho. Herodispa wauguin Felipe mandag caycargan Iturea y Traconite nishgancho. Saynömi Lisaniaspis mandag caycargan Abiliniacho. Jerusalenchönami Anaswan Caifás más mandag cüra caycäyargan.
3Saymi Jordán mayu naupancho cag marcacunapa Juan purergan wilacushpan: “Tayta Diosninsi perdonayäshunayquipä jusalicuycunata cacharir bautizacuyay” nir.
4Juan Bautista manarä yuriptinmi Tayta Diosninsipa profëtan Isaías paypita cayno guelgargan: “Sunyag jircachömi juc runa gayacuypa wilaconga: ‘Mandag runa shamuptin chasquicunayquipä nänita pisar puestucuyashgayquino jusalicuycunata cacharir puestucuyay Tayta Diosninsi shamuptin chasquicuyänayquipä.
5Sayno puestucuyay ragracunata pampasagno, jircacunata pampasagno, wicsu nänicunata derechagno y uchcu uchcu nänita pampasagnöpis.
6Saynöpami lapan runacuna tantyacuyanga Tayta Diosninsi salvananpä cashganta.’ ”
7Runacuna bautizacuyänanpä shayämuptinmi Juan nergan: “¡Culebra casta runacuna! ¿Imanirtä gamcuna yarpaycäyanqui jusayog captiquipis Tayta Diosninsi infiernuman mana gaycuyäshunayquipä cashganta?
8Tayta Diosninsi infiernuman mana gaycuyäshunayquipäga jusalicuycunata cacharir pay munashgannöna cawayay. Ama yarpäyaysu Abrahampa castan cayashgalayquipita Tayta Diosninsi salvayäshunayquipä cashganta. Tayta Dios munarga cay rumicunatapis Abrahampa castanman ticrarasinmanmi.
9Mana ali wayog jachacunata chaquipita muturir ninaman gaycushgansinömi Tayta Diosninsega jusalicogcunata infiernuman gaycunanpä listuna caycan.”
10Juan sayno niptinmi runacuna tapuyargan: “Sauraga ¿imatatä rurayäman salvacuyänäpä?”
11Sayno tapuyaptinmi nergan: “Ishcay trucana mödanayog carga jucag cag mödanayquicunata goycuyay mödanaynag cagta. Saynöpis micuyyog carga raquipaycuyay micuyniynag cagta.”
12Saynölami impuestuta cobragcunapis, bautizacunanpä shamur, tapuyargan: “Taytay, nogacunaga ¿imatatä rurayäman salvacuyänäpä?”
13Saymi Juan nergan: “Cobrayänayquipä cashganpita mastaga ama cobrayanquisu.”
14Saynölami tapuyargan soldäducunapis: “Nogacunaga ¿imatatä rurayäman salvacuyänäpä?” Saymi Juan nergan: “Ama pipa guellaynintapis guechuyanquisu. Sayno ama pitapis manacagtaga tumpanquisu. Aruyashgayquipita chasquiyashgalayquiwan contentacuyanqui.”
15Sauraga Cristo cay pasaman shamunanpä cashganta shuyarag runacuna yarpachacuyashpan niyargan: “¿Juansurä Tayta Dios cachamushgan Cristo caycan?” nir.
16Saymi Juan nergan: “Cristoga sayrämi shamonga. Nogaga yaculawanmi gamcunata bautizä. Tayta Diosninsi cachamushgan Cristumi isanga Santu Espirituwan y ninawanpis bautizayäshunquipä. Nogaga manami payno munayyogsu caycä.
17Payga jurquëtan aptashmi caycan trïguta wayrananpä. Nircurmi trïgu cagta churanga wayinman. Y punshan cagtana gayconga imaypis mana upeg ninaman saycho rupananpä.”
18Sayno parlaparmi Juan yachasergan Tayta Diosninsipa wilacuyninta.
19Saynöpis runacunata Juan nergan: “Wauguin Felipipa warminta suwapar rey Herodes jusalicush. Saynölami más jusatapis payga ruraycan.”
20Sayno parlaycashganta musyarmi Juanta prësu sariycasir Herodes wichgasergan carcilman. Sayno wichgasirmi más jusayog ricacush.
21Carcilman Juan manarä yaycurmi runacunata bautizaycaptin Jesuspis chargan bautizacunanpä. Bautizacurcur Tayta Diosta manacuycaptinmi ciëlo quichacascamorgan.
22Saychömi Jesusman Santu Espíritu urämorgan palomano. Saymi ciëlupita wiyacämorgan Tayta Dios cayno nimushgan: “Gamga cuyay surëmi canqui. Noga munashgäno lapanta cumpliptiquimi cushish caycä.”
23Quimsa chunca (30) watayognöna caycar bautizacurcurmi Jesús wilacur galaycorgan Tayta Diosninsipa wilacuyninta. Jesuspäga runacuna yarpäyargan Josëpa surin cashgantami. Josënami Elïpa surin cargan.
24Elïmi cargan Matatpa surin. Matatmi cargan Levïpa surin. Levïmi cargan Melquipa surin. Melquimi cargan Janapa surin. Janami cargan Josëpa surin.
25Josëmi cargan Matatiaspa surin. Matatiasmi cargan Amospa surin. Amosmi cargan Nahumpa surin. Nahummi cargan Eslipa surin. Eslimi cargan Nagaipa surin.
26Nagaimi cargan Maatpa surin. Maatmi cargan Matatiaspa surin. Matatiasmi cargan Semeipa surin. Semeimi cargan Josëpa surin. Josëmi cargan Judäpa surin.
27Judämi cargan Joanapa surin. Joanami cargan Resapa surin. Resami cargan Zorobabelpa surin. Zorobabelmi cargan Salatielpa surin. Salatielmi cargan Neripa surin.
28Nerimi cargan Melquipa surin. Melquimi cargan Adipa surin. Adimi cargan Cosampa surin. Cosammi cargan Elmodampa surin. Elmodammi cargan Erpa surin.
29Ermi cargan Josuëpa surin. Josuëmi cargan Eliezerpa surin. Eliezermi cargan Jorimpa surin. Jorimmi cargan Matatpa surin.
30Matatmi cargan Levïpa surin. Levïmi cargan Simeonpa surin. Simeonmi cargan Judäpa surin. Judämi cargan Josëpa surin. Josëmi cargan Jonanpa surin. Jonanmi cargan Eliaquimpa surin.
31Eliaquimmi cargan Meleapa surin. Meleami cargan Mainanpa surin. Mainanmi cargan Matatapa surin. Matatami cargan Natanpa surin.
32Natanmi cargan Davidpa surin. Davidmi cargan Isaïpa surin. Isaïmi cargan Obedpa surin. Obedmi cargan Boozpa surin. Boozmi cargan Salmonpa surin. Salmonmi cargan Naasonpa surin.
33Naasonmi cargan Aminadabpa surin. Aminadabmi cargan Arampa surin. Arammi cargan Esrompa surin. Esrommi cargan Farespa surin. Faresmi cargan Judäpa surin.
34Judämi cargan Jacobpa surin. Jacobmi cargan Isaacpa surin. Isaacmi cargan Abrahampa surin. Abrahammi cargan Tarëpa surin. Tarëmi cargan Nacorpa surin.
35Nacormi cargan Serugpa surin. Serugmi cargan Ragaupa surin. Ragaumi cargan Pelegpa surin. Pelegmi cargan Heberpa surin. Hebermi cargan Salapa surin.
36Salami cargan Cainanpa surin. Cainanmi cargan Arfaxadpa surin. Arfaxadmi cargan Sempa surin. Semmi cargan Noëpa surin. Noëmi cargan Lamecpa surin.
37Lamecmi cargan Matusalenpa surin. Matusalenmi cargan Enocpa surin. Enocmi cargan Jaredpa surin. Jaredmi cargan Mahalaleelpa surin. Mahalaleelmi cargan Cainanpa surin.
38Cainanmi cargan Enospa surin. Enosmi cargan Setpa surin. Setmi cargan Adanpa surin. Y Adanmi cargan Tayta Diosninsi camashgan.
