1Bdziṉ dzew, laa Juan psilo pseed miech. Lëë leṉ iz co rac tsiiṉ iz zob meṉ ne lë Tiber nac me rey, rnabey me grë guiedz ne ngab lo zha Roma. Leṉ dze co zob Pilat rnabey me grë guiedz ne ndxie nëz Judé, laa Herod zob rnabey grë guiedz ne ndxie nëz Galilé. Leṉ dze coque zob bets Herod, meṉ ne lë Lip rnabey me grë guiedz ne ndxie nëz Ituré ni nëz Traconit; laa Lisian rnabey grë guiedz ne ndxie nëz Abilin. Zha ne nac zhipxoz nroob zha Israel leṉ dze co, nac Anás ni Caifás. Leṉ dze copaa nagoṉ güeynee Dios lo Juan (xpëëd Zacarí) dan ngan ne no Juan ga.
3Nacne hor co psilo Juan güeyted me grë guiedz ne ndxie ro guiubee Jordán, rnee me lo grë miech co, csaan zho xquieḻntseeb zho gbig zho lo Dios ni chobnis zho, zeeṉa csilaa Dios zho lo grë xtoḻ zho.
4Ga brieequia miṉe bnee Isá, meṉ ne biaad pteed xtiidz Dios, zeeṉe znu pquiaa me: Bii zon miech gaṉle zeeṉe laa tib tsi meṉ zëëb tib dan ngan, rnee me: “Goḻzhixcuaa nëz ne ted meṉ ne rnabey, goḻsaan grë guieḻntseeb ne ruṉ to.
5Zaatne nac leṉ blë, goḻcodzëëw, grë gui glaa, grë gui las, goḻsiaablow. Nëz ne niecw, nëz ne quiaya quiaguiet nac, goḻzhixcuaaw.
6Grëse miech, laa zho gaṉ meṉ ne pxeeḻ Dios ga ziaadsilaa zho.”
7Zeeṉe raṉ Juan laa miech rdziṉ lo me cchoobnis me zho, rnee me lo zho: ―¡Miech ngoopdoḻ, masaque nac to zig nac meeḻ! Naṉ to na lëë, loxaque chobnis to laa to laale lo grë guieḻnëdox ne ziaadyob guiaad.
8Led scada goṉ, none ndzinli gban to zeeṉa glu nlipaa psaan to xquieḻntseeb to. Ni gacniatsde to guiab to, loxaque por nacse to zha xtii Abraham, laa Dios csilaale to; sac gneli naa lo to gaṉle, teḻne gacladz Dios, haxta grë quie zac gnabey me tsaalow miech ne gac zha xtii Abraham.
9Naṉle to gaṉle, grë yag nex ne rquiad nex lo, zeeṉe raṉ zho sca naca, rchug zhow, rzëëg zhow; scadaa nagoṉ sac grë zha ne gband zigne racladz Dios, ib tedlaad zho lo gui; sac rrieequia laa me nzheṉle xquiibyag me, cchug me grë yag ne sca nac.
10Dzigo rnabdiidz zho lo Juan, pe no guṉ zho parne ygaad zho grë guieḻnë co.
11Dzigo rquiab me rnee me lo zho: ―Teḻne quianie to chop lar ne racw to, none gdeed to tiba lo zha ne guieṉd xab; teḻne quianiegaa to ncuaaṉe gow to, none gdeed to palala yquiin zha ne quianieda.
12Wbigaque bla recaudador ne zie chobnis, rnabdiidz zho dieṉ pe guṉ zho.
13Pquiab Juan, rëb Juan lo zho: ―Cuandraa to samiech to, miṉe rieguiaḻse zho quizh zho, miṉ co goḻnab lo zho.
14Ye zla meṉguiib wbig, rnabdiidz zho rëb zho: ―¿Teḻzhe no waa, pe nac miṉe dziuuṉ no? Rquiab Juan rnee Juan lo zho: ―Ndzinli goḻgac, ib ctsebde to samiech to par dieṉ pe gla to lo zho; zha ne peet xtoḻd, ib yquiaaquide to zho ncuaaṉe beeṉd zho. None sac zdoo to dimi ne quiayazh to.
15Nzian grë miech co quiambëznë zho gacnaṉ zho dieṉ pe lëële Meṉ ne bzooblo Dios ga cxeeḻ me nac Juan.
16Dzigo rëb Juan lo zho: ―Tib wrobnisse nu rnedz naa lo to, saṉgue meṉ ne no guiaad ga Espíritu Sant gdeed me lo zha ne gliladz me; ni scagaa zha ne gliladzd me, sonëz me zho zaatne nitlo zho. Ne nligaa meṉ non nac me, teḻ naa peet nond naa, per ni par tib nguṉdziin ne glit lab me ni me, raguiaḻd naa gac naa.
17Laa me guiaad zig tib zha ne rbeeguizh zhobxtil, sac zha co, rlozhse rbeeguizh zho zhob rgotsow zhow, laa paj rlaaḻ zho lo gui, ga reca. Per gui ne gzëëg grë paj ne guiadbee me ga, gdziṉd dze guiuuw.
18Sca rnee me lo zho, par guieṉ zho zha nac Xtiidz Dios.
19Tib vuelt haxta lo rey Herod goctox me, sac lëëque Herodí, wnaa ne nac tsieel bets Herod nonie Herod; grë guieḻntseeb ne quiayuṉ Herod, blisqui mew.
20Per laa ne nion Herod diidz, leḻ beeṉ me stib guieḻntseeb, bnabey me bgaa Juan bio Juan ladzguiib.
21Leṉ dze ne nochoobnis Juan miech ga, tib dzew laa Jesús bdziṉ lo Juan ga, ye me bnab cchoobnis Juan me. Blozhse brobnis me, laa me quiazodiidznie Dios, tibaque zeeṉe bzhial zhan gbaa,
22laa meṉ ne nac Espíritu Sant biet, rlu me zig rlu tib palom, laa me bdziṉ guic Jesús, hor co blu zëëb tib tsi meṉ co nëz gbaa, rnee me: ―Xin, rleynie naa luu goṉ, nziuu luu lo naa.
23Gaḻptsii iz rap Jesús, laa me psilo xtsiiṉ me pseed me miech. Zha ne ruṉbey me, rzoob zho xpëëd José nac me,
24José co goc xpëëd Elí, Elí goc xpëëd Matat, Matat goc xpëëd Leví, Leví goc xpëëd Melqui, Melqui goc xpëëd Jan, Jan goc xpëëd José,
25José goc xpëëd Matatí, Matatí goc xpëëd Amós, Amós goc xpëëd Nahúm, Nahúm goc xpëëd Esli, Esli goc xpëëd Nagai,
26Nagai goc xpëëd Maat, Maat goc xpëëd Matatí, Matatí goc xpëëd Semei, Semei goc xpëëd José, José goc xpëëd Judá,
27Judá goc xpëëd Joan, Joan goc xpëëd Resa, Resa goc xpëëd Zorobabel Zorobabel goc xpëëd Salatiel, Salatiel goc xpëëd Neri,
28Neri goc xpëëd Melqui, Melqui goc xpëëd Adi, Adi goc xpëëd Cosam, Cosam goc xpëëd Lmodam, Lmodam goc xpëëd Er,
29Er goc xpëëd Josué, Josué goc xpëëd Liezer, Liezer goc xpëëd Jorim, Jorim goc xpëëd Matat,
30Matat goc xpëëd Leví, Leví goc xpëëd Simeón, Simeón goc xpëëd Judá, Judá goc xpëëd José, José goc xpëëd Jonán, Jonán goc xpëëd Liaquim,
31Liaquim goc xpëëd Melé, Melé goc xpëëd Mainán, Mainán goc xpëëd Matata, Matata goc xpëëd Natán,
32Natán goc xpëëd David, David goc xpëëd Isaí, Isaí goc xpëëd Obed, Obed goc xpëëd Booz, Booz goc xpëëd Salmon, Salmóngoc xpëëd Naasón,
33Naasón goc xpëëd Minadab, Minadab goc xpëëd Aram, Aram goc xpëëd Srom, Srom goc xpëëd Far, Far goc xpëëd Judá
34Judá goc xpëëd Jacob, Jacob goc xpëëd Isaac, Isaac goc xpëëd Abraham, Abraham goc xpëëd Taré, Taré goc xpëëd Nacor,
35Nacor goc xpëëd Serug, Serug goc xpëëd Ragau, Ragau goc xpëëd Peleg, Peleg goc xpëëd Heber, Heber goc xpëëd Sala,
36Sala goc xpëëd Cainán, Cainán goc xpëëd Rfaxad, Rfaxad goc xpëëd Sem, Sem goc xpëëd Noé, Noé goc xpëëd Lamec,
37Lamec goc xpëëd Matusalén, Matusalén goc xpëëd Enoc, Enoc goc xpëëd Jared Jared goc xpëëd Mahalaleel, Mahalaleel goc xpëëd Cainán,
38Cainán goc xpëëd Enós, Enós goc xpëëd Set, Set goc xpëëd Adán. Adán goc zig tib xpëëd Dios.
