1Iro mwonen hayou songui pe yimah ta Sisar Tiperiyus, iro king tahu kol masih hutora pahandra kol namandran masih kene Rom, ara Pontiyus Pailat iro pohon para kol namandran hape Yutiya, pe Herot iro pohon para kol namandran hape Kaliliy, pe nalin Pilip, ara iro pohon para kol namandran hape Yituraya pe Trakonitis, pe Lisaniyas, ara iro pohon para kol namandran hape Apilene.
2Annas hilu Kayapas ara hilu pris hilhohin ta hu pris masih kene. Pe tandrohongan ara, nongna Ngindrai, ara isa kili Yohanes noru Sekarayah iro kol ndrohoyin.
3Pe Yohanes irikai irakayani hu kol masih huro pakeh Ndran Yortan, pe iro pohowe nongan para hu ndramat karapaiwani ndriyahu pe kawiri paptais para Ngindrai kitali hu pakut mwomwan tahu.
4Tehe pwayan kinpwai pwen ita puk ta poropet Yisayah, ipa toro: “Ngasa mbulukoyu hamou ita yoh iyau kol ndrohoyin, ita pa, ‘Karamwaniyani saya Yapan, pe kasani meresayan kiro mwonen.
5Pe karatulungi hu pwenten masih, pe kataluwe hu ngondron pe pahayi masih ara hu kasapwan. Pe hu sai mepo humakaiye, ara karamwaniyani hu pe hu koro mwonen, pe hu sai mepo humasusuwat, ara karalohori hu pe hu kameh.
6Pe hu ndramat para kol pwan masih, andre hu kanime mbulya Ngindrai para kisopwat worou.’ ”
7Pwen Yohanes ipwai iya kili hu ndramat soyon mepo husa kili yiy para kisumuluwani hu ara, ara ipa, “Wawu ndraye hu mwat mapairahu! Hiyeh kinpomwanye kinsa kili wawu pe apakawop kaya mawen ndrinalokuh ta Yapan mepo itapo isa?
8Pe kapa wawu kantapaiwani ndriya wawu ndrokonan, pwen kultuwayi wawu kipwaingani kaipisa wawu tehen aliy i. Pe wawu mbuna akahaterena wawu, pe akapa, ‘Apraham ara tumbu yowu.’ Yo upwai isa kili wawu tehe, iyau kili hu pat aripo, Ngindrai ilahiy para kimbusi hu karayah hu tumbu Apraham.
9Pe semen kapereu, ara kinna pwen ita ndroiyi kei yi, pe hu kei masih mepo hu konhoppwai hiyan pwi, ara andre katihihu kaya pwan pe kapiyani hu kaya nondriya mwan.”
10Pe hu ndramat soyon huro ara, husok yiy, hupa, “Pwen pe yowu po andre kambus tehen tapeh ara?”
11Pwen Yohanes isomwi hu, ipa, “Yiy mepo suluyan malmou, ara kiyki hamou kiyata hiyeh mepo suluyan pwi, pe hiyeh mepo anandrinan soyon, ara kimbusiy tehen aliy i.”
12Pe yihu ndramat hayah para poya takis, ara husa yi para kawiri paptais. Pe husok yiy, hupa, “Ndramat para hinonou, yowu andre kambus tehen tapeh?”
13Pwen Yohanes ipwai iya kili hu, ipa, “Wawu kambulte sombule pat kiya weneyan o, pe mbuna kiramwaitiniy tehe wawu ngara koropo.”
14Pwen hu ndram hayah husike yiy, hupa, “Pe yowu andre kambus tehen tapeh?” Pe isomwi hu, ipa, “Wawu mbuna akarakekeyani hu ndramat pe kawiri sombule pat tahu. Pe wawu mbuna akaiki hu ndramat kiya nongan o mwaihei, para akawiri sombule pat kiyau kili hu. Akalohonganiy tehe kenne wawu mepo wawu tora wiriy, ara ilahi wawu.”
15Pe hu ndramat masih huro longe pe huro sohe, ara huro lohonge soyon iro ndriyahu, pe huro pa, “Matisan Yohanes ara Kristus, ndre?”
16Pwen Yohanes isomwi hu masih, ipa, “Yo urupo sumuluwani wawu iya ndran. Hapeko ndramat hamou pwoke tan pwokeyan pe iho hin kili yo, ara andre kisa, pe yo ara kunlahiy para kulombuli malkeye hatna pwelekan pwi. Yiy andre kisumuluwani wawu kiya Mwoiwan Haiyan pe kiya mwan.
17Pe yiy iya ndrohonoku ponokuleya wit pe imbultuwe suweleya pwan tan ita niman para kisuwali pwisi wit kiya mawen, pe andre kimbultani sangi wit, kiya nondriya kaisowan. Hapeko pwisi wit, ara andre kitimwiy kiya mwan mepo kinoho mat pwi masih.”
18Pe Yohanes ara ipohowe nongan soyon handra-handra yi, para kirakelehani ndriya hu ndramat. Pe ipohowe nongan hiyan, iya kili hu yi.
19Yohanes ara ngara kipomate Herot, pohon para kol namandran hape Kaliliy, kiya hu melit mwomwan ngara kimbusiy. Pwen ipomate Herot paiwe, iya mwomwan mepo imbusi iya kili Herotiyas, paratesah, Herot iwiri Herotiyas iya nambuyun, hapeko Herotiyas ara yiy nambuyu nalin.
20Pwen pe Herot iposura hu mwomwan mepo kinmbusiy pwen kinna, ara iyki Yohanes iya nondriya kou i.
21Iro mwonen hu ndramat masih huro wiri paptais, Yohanes isumuluwani Yesu yi. Pe Yesu iro tohun manau, pwen kol paingan yang ara ite,
22pe Mwoiwan Haiyan isa pwan mwensen tehe nombuwe pai hamou, pe iya ndrita Yesu. Pe ngasa mbulukoyu hamou iyau kol paingan yang isa, ara ipa, “Wou ara Noru, pe ndriyo imbuluhi wou. Yo upwes satam namandran iya.”
23Pwen Yesu hayou tan ara iho tehe matingui, pe irandroiyi mbulyan. Pe yihu pa ndre yiy ara noru Yosep, pe Yosep ara noru Heli,
24pe Heli ara noru Mattat, pe Mattat ara noru Lepi, pe Lepi ara noru Melki, pe Melki ara noru Yannai, pe Yannai ara noru Yosep,
25pe Yosep ara noru Mattatiyas, pe Mattatiyas ara noru Amos, pe Amos ara noru Nahum, pe Nahum ara noru Esli, pe Esli ara noru Nangai,
26pe Nangai ara noru Maat, pe Maat ara noru Mattatiyas, pe Mattatiyas ara noru Semeyin, pe Semeyin ara noru Yosek, pe Yosek ara noru Yota,
27pe Yota ara noru Yowanan, pe Yowanan ara noru Resa, pe Resa ara noru Seruppapel, pe Seruppapel ara noru Seyaltiyel, pe Seyaltiyel ara noru Neri,
28pe Neri ara noru Melki, pe Melki ara noru Atti, pe Atti ara noru Kosam, pe Kosam ara noru Elmatam, pe Elmatam ara noru Er,
29pe Er ara noru Yosuwa, pe Yosuwa ara noru Eliyeser, pe Eliyeser ara noru Yorim, pe Yorim ara noru Mattat, pe Mattat ara noru Lepi,
30pe Lepi ara noru Simeyon, pe Simeyon ara noru Yutah, pe Yutah ara noru Yosep, pe Yosep ara noru Yonam, pe Yonam ara noru Eliyakim,
31pe Eliyakim ara noru Meleya, pe Meleya ara noru Menna, pe Menna ara noru Mattata, pe Mattata ara noru Natan, pe Natan ara noru Tepit,
32pe Tepit ara noru Yessi, pe Yessi ara noru Opet, pe Opet ara noru Powas, pe Powas ara noru Salmon, pe Salmon ara noru Nahson,
33pe Nahson ara noru Amminatap, pe Amminatap ara noru (Atmin), (pe Atmin ara noru Arni,) pe (Arni) ara noru Hesron, pe Hesron ara noru Peres, pe Peres ara noru Yutah,
34pe Yutah ara noru Yakop, pe Yakop ara noru Yisak, pe Yisak ara noru Apraham, pe Apraham ara noru Terah, pe Terah ara noru Nahor,
35pe Nahor ara noru Seruk, pe Seruk ara noru Reu, pe Reu ara noru Pelek, pe Pelek ara noru Eper, pe Eper ara noru Selah,
36pe Selah ara noru Kayinan, pe Kayinan ara noru Arpaksat, pe Arpaksat ara noru Sem, pe Sem ara noru Nowah, pe Nowah ara noru Lamek,
37pe Lamek ara noru Metuselah, pe Metuselah ara noru Enok, pe Enok ara noru Yaret, pe Yaret ara noru Mahalalel, pe Mahalalel ara noru Kenan,
38pe Kenan ara noru Enos, pe Enos ara noru Set, pe Set ara noru Atam, pe Atam ara noru Ngindrai.
