Luk 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Mzli kc Taebirizs tqngini-ngrde king kxetu r Rom, kzdung kz gavzna x king nzmnclzbzng bade. Kzdq nidr Pcntizs Paelzt nide gavzna ngr Judiz. Kzdq mou Herot Antipas nide king kx aclvele Gzlili. X mzle Herot, Filip, nide king kx aclvele Provins kcng Itiria x Trakonaetis. X kzdq mou Laesanias nide king kc tqaclvele Abilin Provins.

²Mzli lcde Anas nidr mz Kaefzs nidr Nardr Pris. Mz yiz kranzpnu-esz'-nrade-nzlvqn (15) kx King Taebirizs aclve-ngrde nrlc, natq Gct vzm mz Jon, mrlx Sxkaraezs, mrkc lzke.

³Mz nzlxngiti-krbz Jon natq Gct, sc tqvz-ngalepe-ngrde nrlar LueJodzn mz nzryapwx-krbzle mz leplz. Rpibzle kx, “Kx tqrpiamu kx Gct naipqpxbzle alwx ngrmu, natekqtramu nqmq nr drtwrmu x nawrkxtramu.”

⁴Krlc atutrle natq Profet Asaea mz nzrpi-krde kx, “Natq kzdq ncblo kx natqde etu mz nzryapwx-krbzle mz leplz lzke. Natq lcde rpibzle kx, ‘Oliqtiamu nabzmu mz nzvz-krm Kxetu Gct. Atubqtibzmu lrpzki kx nangi nyzde na-apule nzoliqtikr leplz lrpzki kx navzkim king.

⁵Nabzlwa nayrngilvztio, newz x me yrulrtingr namnzpz'. Me ngaluti ngr lrpzki na-atubqti, x me vzo mz lrpzki nayrngilvztio.

⁶Murde leplz amrlx namclr Mevalu kc tqatwzlr-ngrm Gct!’”

⁷Zbo ngr leplz nzyrkrpxmqng mz Jon mz nzawrkxtr-krdeng nidr. Mz drtwrde kx trmrlzu, sc tqrpipebzle mz kzdung nidr kx, “Nimu kxdrka'-ngrng! Tqpokiamu! ?Neke rpibz bamu nzwrkxtrngr na-ayrbqpxle nimu mz nzayrplapxkr Gct kc navzm?

⁸Nzwrkxtrtx-ngrpwz esz'-krde trna-arlapxleu nimu, a' na-aleamu da kx na-aelwapx-ngrde kx tekqtrpeamu nqmq nr drtwrmu kxtrka. X bzkq rpiamu mz drtwrmu kx, ‘Rlapxpekr murde Ebraam ngi melrmqgr. X nigr angidr leplz kx mcpx Gct.’ Murde napi-pnzbo bamu kx nzmu trnavz-nqblqwamuu lrpzki r Gct mz nzarlapx-krde leplz, krlzle nzbatr-krbzle doa neng Ebraam nzvzpx-krmleng mz rlpz lcng, mz nzatutr-krde da kx esalz-ngrbzle bade.

⁹Gct apule ncblo kx twzle akes scde x oliqtile nzrlakitiongr nounc x rtctxlz-ngrde mz nyr, murde trnzpapx-ngrdru nradr kxmrlz. Sa tqoliqtile mzli ka nzangc-krde leplz mz nyr ngr nzayrplapxngr, nidr kcng nqmq krdr trtubqu x nzpxtxpx-ngrdr nztekqtr-krdrle.”

¹⁰Zbz leplz kcng nzveabzng mz Jon, nzrpibzlr kx, “?Nike nawaipekr?”

¹¹Rpibzle kx, “Kxrngisc nzkq kxli nakabzle kzdq mz kx trpnzngr scde nzkq. X kxrnginan dakxnzng narka-ngrde.”

¹²Kzdung mrlx kcng tzatakqting takes nzvz-kzpqng mz nzawrkxtrngr nidr. Zbz sc tzrpipebzlr kx, “Kxakrlz! ?E nike nawaikr?”

¹³Rpibz Jon kx, “Takes kx otibzmu mz leplz, bzkq myaszlzle narncbr kc tqyrlq gzpman ngr Rom naxpe ncblo kxesz'.”

¹⁴Kzdung ncblo ngr vea nzvea-kzpzng, nzrpibzle kx, “?X nigr x? ?Nike nawaikr?” Rpibzle kx, “Bzkq amwxlramu leplz mz nzrka-krbzlr bamu trau. X bzkq pokiatitramung. A' naesapxngr drtwrmu trau kx nzxpe-ngrmu.”

¹⁵Leplz amrlx tzobqtipxlr nzvz-krm Kxnzmcpx, x kx nzmcpelr kc Jon drtwrdr kc tzaotrpebzlr kx, “Mwx Kxnzmcpx nide kape.”

¹⁶Krlztitrpebz Jon nzaotikr drtwrdr kc, sc tqrpipebzle badr kx, “Awrkxtrx nimu mz lue. A' kzdq la ncblo navzm mz nibrnge, kc tqmyaszlzle ninge. X trtakitrpwc'u nzwztr-ngrbz bade, kxmule-esz' nzryokaepxngr nqvi lr sadol ngr nanycde. Na-awrkxtrle nimu mz Mqngrkxtr x nyr ngr nzalqngingr.

¹⁷Mz nzvz-krmle sa napipxle kx leplz nztubqng o trtingr. X nakapxmle leplz kxnzmrlzng mz leplz kxnztrkang, x sc tqamnc-angidrpeleng Heven. A' leplz kxnztrkang sa na-angcpeleng mz nyr kx ngc alo.”

¹⁸Mz natq kxkqlu mou, rngidrlvz-ngrbzle da mz leplz lcng, mz nzryapwxpx-krbzle badr kxmu Gct nzarlapx-krde leplz.

¹⁹X Jon lclvz-kzpzle King Herot Antipas mz da kxkqlu kxtrka kx aletile. X tqrpipebzle kx natekqtrle nqmq nr drtwrde. Murde krnalz mzlede, drtqde Herodizs, tqyrlztibzle. A' mzlede lc sc tqlube.

²⁰Zbz king Herot ale-moule kc da kx trkatxpxbz mz nzngyatikr drtwrde Jon, murde tqlclvzbz Jon nqmq krde kcng tqtrka. Atwzlr-ngrbzle kcng ncblo ngr vea, sc tzadwatrpelr Jon mz presin.

²¹X kzdq zbq mzli kc Jon trvztrka-ngrde mz presin, mz nibr leplz amrlx nzwrkxtr-krdr, Jiszs kc tqwrkxtrpe kz. X mzli kc tqkrka'-ngrpwzle, Heven nzlvxpx,

²²x Mqngrkxtr vzom bade mz nrkrdrtq kx apule nran. X kzdq natq rpiomle Heven, rpile kx, “Nim Mrlxnge Kxnzmrlzti. X abrtzlvz-zlwzx nim.”

²³Mwx yiz ngr Jiszs nzpnu-tqpe (30) mzli kc tqabzo-ngrde nzwz-krde. Nzpnzkr drtwr leplz le ngi mrlx Josip. Josip ngi mrlx Heli.

²⁴Heli ngi mrlx Matat. Matat ngi mrlx Livae. Livae ngi mrlx Malakai. Malakai ngi mrlx Janai. Janai ngi mrlx Josip.

²⁵Josip ngi mrlx Matataeas. Matataeas ngi mrlx Emos. Emos ngi mrlx Naham. Naham ngi mrlx Esli. Esli ngi mrlx Nagae.

²⁶Nagae ngi mrlx Maat. Maat ngi mrlx Matataeas. Matataeas ngi mrlx Semen. Semen ngi mrlx Josxk. Josxk ngi mrlx Joda.

²⁷Joda ngi mrlx Joanzn. Joanzn ngi mrlx Resz. Resz ngi mrlx Serubabel. Serubabel ngi mrlx Seltiel. Seltiel ngi mrlx Nerae.

²⁸Nerae ngi mrlx Mxlki. Mxlki ngi mrlx Adae. Adae ngi mrlx Kosam. Kosam ngi mrlx Elmadam. Elmadam ngi mrlx Er.

²⁹Er ngi mrlx Josua. Josua ngi mrlx Eliesa. Eliesa ngi mrlx Jorim. Jorim ngi mrlx Matat. Matat ngi mrlx Livae.

³⁰Livae ngi mrlx Simion. Simion ngi mrlx Judz. Judz ngi mrlx Josip. Josip ngi mrlx Jonam. Jonam ngi mrlx Eliakim.

³¹Eliakim ngi mrlx Melea. Melea ngi mrlx Mena. Mena ngi mrlx Matata. Matata ngi mrlx Neitzn. Neitzn ngi mrlx King Devet.

³²King Devet ngi mrlx Jesi. Jesi ngi mrlx Obed. Obed ngi mrlx Boas. Boas ngi mrlx Salmon. Salmon ngi mrlx Nason.

³³Nason ngi mrlx Aminadab. Aminadab ngi mrlx Admin. Admin ngi mrlx Arnae. Arnae ngi mrlx Hesron. Hesron ngi mrlx Peres. Peres ngi mrlx Judz.

³⁴Judz ngi mrlx Jekop. Jekop ngi mrlx Aesak. Aesak ngi mrlx Ebraam. Ebraam ngi mrlx Tera. Tera ngi mrlx Neor.

³⁵Neor ngi mrlx Seruk. Seruk ngi mrlx Reu. Reu ngi mrlx Pelek. Pelek ngi mrlx Ebr. Ebr ngi mrlx Sela.

³⁶Sela ngi mrlx Kainzn. Kainzn ngi mrlx Arpaksat. Arpaksat ngi mrlx Sem. Sem ngi mrlx Noa. Noa ngi mrlx Lamxk.

³⁷Lamxk ngi mrlx Mxtusxla. Mxtusxla ngi mrlx Inck. Inck ngi mrlx Jarxt. Jarxt ngi mrlx Maalalil. Maalalil ngi mrlx Kenzn.

³⁸Kenzn ngi mrlx Enos. Enos ngi mrlx Set. Set ngi mrlx Adzm. Adzm wzngr Gct.