1Wamba Kapomane Isingi Akali Mupa Taipitiasa lenge dokome Loma yuu doko pitaka ee kana kingi ita mende-kisa dee yuungi dupa isoo kateamopa, akali Pondiasa Pailate lenge doko yuu Jutia dokonya kapomane andake katea-pyaa. Gii dokopaka akali Etote lenge dokome yuu potopinja yakane Galili dokonya kapomanenya isingi akali katea-pyaa. Etotenya kaiminingi Pilipa lenge dokome yuu potopinja yakane Itutiapa Tekonaitasapa dolapo isoo katea-pyaa. Akali Laisaniasa lenge dokome yuu potopinja yakane Apilini doko isoo katea-pyaa.
2Akali Anasa lenge dokopa Kayapasa lenge dokopa dolapo pitisa mupa kateambiaka-pyaa. Gii dokopa akali Sakataya ikiningi Jone lenge doko endakali napalenge yuu mendasa katea-pyaa. Baame pii lao katena lao Goteme baa pupu lasiamopa, Joneme endaki Jotane duu dokonya yuu singi dupa pitakanya pupala endakali dupa lamaiyoo, “Goteme nyakamanya koo pingi yanu dupa kunanya nepekena lao nyakama mona kapilyetala kaimbu nyalapape!” lao lamaiyoo katea-pyaa.
4Dopa lao katatana lao potopesa Aisayame baanya pepa dokonya dapa lao pyaanya setea-pyaa: “Endakali napalenge yuu mendasa akali mendeme katapala wii lao, ‘Kamongonya kaitini doko depa lanya setakamaiyepape! Baanya kaitini dupa tolasakamaiyepape!
5Yuu manda andakepi yakanepi dupa amao tanapala yuu yuli dupa kitumalapa! Kaitini uanga pipae dupa pitaka tolasetala kana nengenenge katapae singi kaitini dupa pyoo wasalapa!
6Dokopa Goteme endakali dupa pyoo nyalanya kalai pingi doko endakali pitakame kandatamina,’” dopa lao pepa pyapae sia-pyaa.
7Dokonya endakali tata longo dupa Joneme kaimbu pyekena lao ipata piaminopa, baame dokaita lamaiyoo, “Nyakama kanopato pambeanya mandipae dupa, apimi nyakama Goteme kapa pao imbu kayata doko langipumosa paka kayao wandyalanya epelyamipi?
8Nyakama mona kapilyetala endakali mona kapilyetae dupame mana miningimali pyoo minalapape! Nyakamame nyakama tangenya mona dokome, ‘Apotakame naimanya takangena,’ lao masala nayalapape. Kana silyamo datupa Goteme kapa pao Apotakamenya wane jina lapyalina lao nambame nyakama langilyo.
9Uaa doko ita tengenya depa latae sepelyamo. Dii epe manja naenge ita doko pitaka pokanya setapala itatenya soo yangatana,” lea-pyaa.
10Dopa leamopa endakali limbatae peteamino dupame lao pituu, “Dopa tamo doko naimame aipa piamape?” lao piseta piami-pyaa.
11Pisiaminopa baame dokaitanya pii yanu pyakamaiyoo, “Endakali mende yonge pee lapoma pyoo katatamopa endakali mende napyoo katatamo kandao doko, pyoo katatamo dokome mende maina! Endakali mende nee nao katatamopa, mende nanao katatamo doko mainakana!” lea-pyaa.
12Dee takisa nyingi akali mendapua kaimbu pyekena lao ipupala dupame baa lamaiyoo, “Mana Lenge Akali, naimame aipa pimape?” leami-pyaa.
13Dopa leaminopa baame dupa lamaiyoo, “Nyakamame takisa doko kapomaneme mana seteamoli pyoo nyepala dee mendapua konda pyoo nyala nayalapape!” lea-pyaa.
14Dee yanda singi amii mendapuame ipupala baa pisoo, “Naimame aipa pimape?” leamiaka-pyaa. Dopa leaminopa baame dupa lamaiyoo, “Nyakamame endakali dupa pyalanya pyoo oapi dupa pake joo nyakamaiya nayalapape! Nyakamame endakali mendenya munipi oapi mende nyakamaiyanya sambo kosa lao paka pisala nayalapape! Dee nyakamame nyakamanya yole nyingi dupa kapana lao masalapapena,” lea-pyaa.
15Joneme dopa lao kateamopa endakali dupa pitakame longo lao masetala Jone doko Kataisa taa aipape lao masiami-pyaa.
16Dopa lao masiaminopa Joneme dupa pitaka lamaiyoo, “Nambame nyakama endakimi kaimbu pyekelyoaka doko, akali mende epelyamo dokonya pupu lapae dokome nambanya pupu lapae doko ita miningi. Baanya moko pee pingi kende dolapo tata lakamaipenge namba epe daa. Baame ipupala Oli Sipitisapa itatepa dolapome nyakamanya kaimbu pyakatana,” lea-pyaa.
17“Baame baanya yati doko minao wiisa angi imbupi pyasoo silyamo dupa pitaka yapapala angi dupa baanya nee setenge anda dokonya setata. Imbu dupa ita konjala naenge dokonya soo yangatana,” lea-pyaa.
18Dopa latala endakali dupa mona sakatasakamaiyanya Wai Pii Epe tenge longo dupa waipa soo lamaiyoo katea-pyaa.
19Yuu mende yuu potopinja yakane isingi akali Etote lenge dokome baanya kaimininginya etanenge Etotiasa lenge doko tondao nyepala mana koo waka mendapua miniamosa Joneme endakali dupa lamaiyoo, “Baame kopeta pilyamona,” lao mana lamaiya-pyaa.
20Dopa leamopa Etoteme baanya mana koo miniamo dupa pitakanya waipa soo Jone doko anjingi anda dokonya anjetae palena lea-pyaa.
21Yuu mende Joneme endakali epeamino dupa pitakanya kaimbu doko pyakamaiyoo pituu, Jisasanya kaimbu pyakamaiyaka-pyaa. Jisasame kaimbu doko nyepala loma soo katemopa kaiti doko saa papa laloo pia-pyaa.
22Dopa piamopa Oli Sipitisa doko yaka maileo joo Jisasa-kisa epeamopa, pii mende kaitinya katao leamo dokome lao pituu, “Emba nambanya Ikiningi mona setenge dokona, nambame emba kandao mona epe palyingina,” lea-pyaa.
23Jisasa baa ee kana kingi ita tepomapi mende katapala baanya kalai tee pyao pyaanya pia-pyaa. Dokopa endakali dupame baa kandao Josepe ikiningina lao masiami-pyaa. Josepe baa Ilai ikiningi.
24Ilai baa Matate ikiningi. Matate baa Lipai ikiningi. Lipai baa Melekai ikiningi. Melekai baa Janai ikiningi. Janai baa Josepe ikiningi.
25Josepe baa Matatayasa ikiningi. Matatayasa baa Emosa ikiningi. Emosa baa Neame ikiningi. Neame baa Esalai ikiningi. Esalai baa Nakai ikiningi.
26Nakai baa Meata ikiningi. Meata baa Matatayasa ikiningi. Matatayasa baa Semene ikiningi. Semene baa Joseke ikiningi. Joseke baa Jota ikiningi.
27Jota baa Joanane ikiningi. Joanane baa Lesa ikiningi. Lesa baa Setapapele ikiningi. Setapapele baa Siatiele ikiningi. Siatiele baa Netai ikiningi.
28Netai baa Melekai ikiningi. Melekai baa Atai ikiningi. Atai baa Kosame ikiningi. Kosame baa Elemetame ikiningi. Elemetame baa Ea ikiningi.
29Ea baa Josua ikiningi. Josua baa Eliase ikiningi. Eliase baa Jotimi ikiningi. Jotimi baa Matate ikiningi. Matate baa Lipai ikiningi.
30Lipai baa Simione ikiningi. Simione baa Juta ikiningi. Juta baa Josepe ikiningi. Josepe baa Joname ikiningi. Joname baa Elayakimi ikiningi.
31Elayakimi baa Melia ikiningi. Melia baa Mena ikiningi. Mena baa Matata ikiningi. Matata baa Netane ikiningi. Netane baa Dapiti ikiningi.
32Dapiti baa Jesi ikiningi. Jesi baa Opeta ikiningi. Opeta baa Boasa ikiningi. Boasa baa Sila ikiningi. Sila baa Nasone ikiningi.
33Nasone baa Aminatape ikiningi. Aminatape baa Atamina ikiningi. Atamina baa Ani ikiningi. Ani baa Esotone ikiningi. Esotone baa Petesa ikiningi. Petesa baa Juta ikiningi.
34Juta baa Jekope ikiningi. Jekope baa Aisake ikiningi. Aisake baa Apotakame ikiningi. Apotakame baa Teta ikiningi. Teta baa Neo ikiningi.
35Neo baa Setaka ikiningi. Setaka baa Liu ikiningi. Liu baa Peleke ikiningi. Peleke baa Ipa ikiningi. Ipa baa Sila ikiningi.
36Sila baa Kenana ikiningi. Kenana baa Apasata ikiningi. Apasata baa Sema ikiningi. Sema baa Noa ikiningi. Noa baa Lemeke ikiningi.
37Lemeke baa Metusala ikiningi. Metusala baa Inoko ikiningi. Inoko baa Jeteta ikiningi. Jeteta baa Malalili ikiningi. Malalili baa Kenana ikiningi.
38Kenana baa Inosa ikiningi. Inosa baa Sete ikiningi. Sete baa Atame ikiningi. Atame baa Gote ikiningi.
