1*Oromɛ ba *jãmatigi maŋ ba naŋ bĩŋ-yoŋ Tibɛr, uŋ daa bieŋ cĩncieluo baa a ndii‑i belle maŋ nuɔ‑i fɔ̃ŋgũɔ‑i-na, belle fande-na *Pɔ̃se-Pilati yaa waa *Yude yuŋgu-na aa *Erɔdi waa *Galile yuŋ-nu, u mɔlɔ̃‑i Filipu fuɔ waa Iture yuŋ-nu baa Tirakoniti bi yuŋ-nu, Lisaniyasi fuɔ waa Abilɛni yuŋ-nu.
2Ani‑i baa Kayifu‑i ba yaa waa *Diilojigãntaamba yuntaamba‑i. Belle fande'i nuɔ‑i Diiloŋ uŋ caraaya Sakari biɛŋo‑i Nsãa‑i *hĩɛkuraaŋgu-na a piiye baa-yo.
3Uŋ piiye baa-yo dumaaŋo-na, wuɔ tuɔ wuɔra nilɛiŋa maŋ *Yurdɛ̃ kɔtɔnni-na u waŋ baa nuɔmba‑i wuɔ ba nanna ba cilɔbabalaŋo‑i aa ba *batiseŋ ku yaa Diiloŋo ka hur ba ãmbabalma‑i.
4Diiloŋ uŋ puɔraa *Isayi waŋ mamaŋ, ma'i sĩ daama‑i wɛi? Isayi waaŋ-ma wuɔ: «Molo dii tuɔ hohuola hĩɛkuraaŋgu-na wuɔ: ‹Migãaŋ Itieŋo hũmieŋa‑i. Cãaŋ-yaŋ na viinu-yɛi.
5Diiyaanuŋ fonni‑i! Tãnniŋ yeŋ terni maŋ nuɔ‑i baa tãntũnni‑i, na herra-niɛ na saanu-niɛ. Hũmieŋaŋ miɛlãa terni maŋ nuɔ‑i, na viinu-yɛi, aa amaŋ cuolaanu, na diinu-yɛi.
6Nuɔmba‑i hiere ba ka da Diiloŋ uŋ ka kor-ba dumaa.›»
7Nuɔmba bɔi taa ba jo Nsãa tuɔ batiseŋ-ba. Wuɔ tuɔ waŋ baa-ba wuɔ: «Nelbabalaaŋ namaa temma‑i daana‑i, hai juɔ tũnu-nɛi wuɔ da na batiseŋ Diiloŋo siɛ ka gãŋ baa-na?
8Taa na ce kumaŋ faa, ku yaa ka pigãaŋ wuɔ na naana na cilɔbabalaŋo‑i kelkel. Baa na ta na ne wuɔ sĩ *Abiramuŋ yeŋ na bĩncɔiŋo Diiloŋo siɛ ka gãŋ baa-na! Mi tũnu-nɛi, naŋ fiɛ da tãmpĩɛŋa maŋ daaya‑i, Diiloŋo gbãa bir-a ce-ya Abiramu hãayɛ̃lmba namaa fuoŋgu-na.
9Maale nuŋgu saaraa jĩna. Tibiiŋgu maŋ da ku saa maŋ biefɛfɛiŋa, ku jũŋ aa sɛnu.»
10Nuɔŋ baa ta ba yuu-yo wuɔ: «Kufaŋgu terieŋgu-na, i saaya i ce bige‑i?»
11Wuɔ gbɛ̃-ba wuɔ: «Joŋgorbaa-ba hãi da ba waa baa nuɔni maŋ, umaŋ saa da bĩŋkũŋgu ŋ hã-yo u diei, aa niiwuoŋ da ni bi waa baa nuɔni maŋ, umaŋ saa da duɔ wuo ŋ hã-yo.»
12*Nampohũutaamba namba naa bi jo u duɔ ji batiseŋ-ba, bafaŋ baa yuu-yo wuɔ: «Hãalãtie, miɛ i saaya i ce bige‑i?»
13Wuɔ gbɛ̃ bafamba‑i wuɔ: «Nuɔmbaŋ saaya ba ta ba pã kumaŋ ba hã-na, baa na ta na hũu na cor kufaŋgu‑i.»
14Sorosibaa-ba namba yuu-yo wuɔ: «Aa miɛ fuɔ, i saaya i ce bige‑i?» Wuɔ gbɛ̃ bafamba‑i wuɔ: «Baa na ta na du nuɔmba‑i na hũu ba gbeiŋa‑i. Taa na yii baa na cufaluŋgu yaa yoŋ.»
15Diiloŋ uŋ pãa nuŋgu‑i wuɔ u ka saaŋ *Koŋkortieŋo maŋ, nuɔmba taa ba niya u jomma‑i. Baŋ juɔ da Nsãa‑i ba da niɛ sĩ u yaa‑i.
16Nsãa wuɔ gbɛ̃-ba wuɔ: «Muɔmi batiseŋ-na baa hũmma yoŋ, ŋga unaa jo dii, u fɔ̃ŋgũɔ jĩɛnya mɛi wuoŋo‑i, mɛi saa piɛra u natãaŋgu‑i. Fuɔ ka batiseŋ-na baa *Diiloŋ-Yalle baa dãamu.
17Kɔkɔruɔŋgu dii u naŋga-na. U ka pe u dĩmma‑i. Duɔ ji pe-ma tĩ hiere torre-na, u ka kũɔl belle‑i dii-de inɔŋgɔ̃-na aa sɛnu fuoru‑i baa dãamu. Dãamu fammu sa dĩŋ dede.»
18Nsãa taa u dii nelma bɔi nuɔmba tũnni-na, a ce dumaaŋo-na u taa u waŋ *Neldɔdɔlma‑i baa-ba.
19Erɔdi wuɔ hũyãa u mɔlɔ̃ ciɛŋo a dii-yo. Ba taa ba bĩ ciɛŋo‑i Erodiyadi. Aa naa tiraa ce wɛima bɔi ma saa fa. U yaa waa nellentieŋo‑i Galile‑i-na. Nsãa wuɔ fulnu-yuɔ wuɔ u maacemma saa fa.
20Wuɔ ce baa bel Nsãa‑i dii-yo kaso, a migãaŋ tuɔ naara kunaŋgu u cãlmuɔ‑i-na.
21Nuɔmba‑i hiere ba kãa ka *batiseŋ. Baŋ taa ba batiseŋ huɔŋgu-na, Yesu wuɔ bi kã ba ka batiseŋ-yo. Baŋ baatiseŋ-yo tĩ, wuɔ tuɔ cãrã Diiloŋo‑i. Dɔrɔ wuɔ puur.
22*Diiloŋ-Yalle hel koŋhuruŋ temma jo ji diire-yuɔ. Baa nu molo piiye dɔrɔ‑i-na wuɔ: «Mi Biɛŋo yaa nuɔŋo‑i, ŋ maama sa suɔ aa dɔlnu-miɛ; nuɔnɛi fĩɛŋ mi huɔŋga‑i.»
23Yesuŋ duɔŋ u maacemma‑i huɔŋgu maŋ nuɔ‑i, u waa baa bieŋ komorre baa cĩnciel temma. Nuɔmba taa ba jɔguɔŋ wuɔ Yosɛfu biɛŋo. Yosɛfu to‑i ba taa ba bĩ-yo Eli.
24Eli to‑i ba taa ba bĩ-yo Mata. Mata to‑i ba taa ba bĩ-yo Levi. Levi to‑i ba taa ba bĩ-yo Mɛlki. Mɛlki to‑i ba taa ba bĩ-yo Yanai. Yanai to‑i ba taa ba bi bĩ-yo Yosɛfu.
25Yosɛfu faŋo to‑i ba taa ba bĩ-yo Matatiyasi. Matatiyasi to‑i ba taa ba bĩ-yo Amɔsi. Amɔsi to‑i ba taa ba bĩ-yo Nahɔmu. Nahɔmu to‑i ba taa ba bĩ-yo Ɛsili. Ɛsili to‑i ba taa ba bĩ-yo Nagai.
26Nagai to‑i ba taa ba bĩ-yo Maatĩŋo. Maatĩŋ to‑i ba taa ba bi bĩ-yo Matatiyasi. Matatiyasi faŋo to‑i ba taa ba bĩ-yo Semiɛ. Semiɛ to‑i ba taa ba bĩ-yo Yosɛki. Yosɛki to‑i ba taa ba bĩ-yo Yoda.
27Yoda to‑i ba taa ba bĩ-yo Yohana. Yohana to‑i ba taa ba bĩ-yo Eresa. Eresa to‑i ba taa ba bĩ-yo Sorobabɛl. Sorobabɛl to‑i ba taa ba bĩ-yo Salatiɛl. Salatiɛl to‑i ba taa ba bĩ-yo Neri.
28Neri to‑i ba taa ba bi bĩ-yo Mɛlki. Mɛlki faŋo to‑i ba taa ba bĩ-yo Adi. Adi to‑i ba taa ba bĩ-yo Kosamu. Kosamu to‑i ba taa ba bĩ-yo Ɛlmadamu. Ɛlmadamu to‑i ba taa ba bĩ-yo Ɛr.
29Ɛr to‑i ba taa ba bi bĩ-yo Yesu. Yesu faŋo to‑i ba taa ba bĩ-yo Eliesɛr. Eliesɛr to‑i ba taa ba bĩ-yo Yorimu. Yorimu to‑i ba taa ba bi bĩ-yo Mata. Mata faŋo to‑i ba taa ba bi bĩ-yo Levi.
30Levi faŋo to‑i ba taa ba bĩ-yo Siminyɔ. Siminyɔ to‑i ba taa ba bĩ-yo Yuda. Yuda to‑i ba taa ba bi bĩ-yo Yosɛfu. Yosɛfu faŋo to‑i ba taa ba bĩ-yo Yonamu. Yonamu to‑i ba taa ba bĩ-yo Eliyakimu.
31Eliyakimu to‑i ba taa ba bĩ-yo Meleya. Meleya to‑i ba taa ba bĩ-yo Mena. Mena to‑i ba taa ba bĩ-yo Matata. Matata to‑i ba taa ba bĩ-yo Natamu. Natamu to yaa *Davidi.
32Davidi to yaa Yese. Yese to yaa Yobɛdi. Yobɛdi to yaa Bosi. Bosi to yaa Sala. Sala to yaa Nasɔ̃.
33Nasɔ̃ to yaa Aminadabu. Aminadabu to yaa Adimɛ. Adimɛ to yaa Arni. Arni to yaa Esirɔmu. Esirɔmu to yaa Perɛsi. Perɛsi to yaa *Yuda.
34Yuda faŋo to yaa *Yakɔbu. Yakɔbu to yaa *Isaki. Isaki to yaa *Abiramu. Abiramu to yaa Tera. Tera to yaa Nahɔr.
35Nahɔr to yaa Seruge. Seruge to yaa Erehu. Erehu to yaa Pelɛgi. Pelɛgi to yaa Ebɛr. Ebɛr to yaa Sala.
36Sala faŋo to yaa Kanamu. Kanamu to yaa Arpasadi. Arpasadi to yaa Sɛmu. Sɛmu to yaa *Nowe. Nowe to yaa Lemɛki.
37Lemɛki to yaa Matusalɛmu. Matusalɛmu to yaa Enɔki. Enɔki to yaa Yerɛdi. Yerɛdi to yaa Maleleyɛl. Maleleyɛl to yaa Kenamu.
38Kenamu to yaa Enɔsi. Enɔsi to yaa Sɛti. Sɛti to yaa Adãma. Diiloŋ uŋ hielaa miwaaŋo‑i u maa Adãma faŋo yaa jĩna.
