LUCAS 3

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Toteco quinotzqui Juan quema Tiberio César yohuiyaya para caxtoli xihuitl tlanahuatis ipan Roma huan ipan nochi tlalme catli Roma iaxcahua. Huan Poncio Pilato eltoya gobernador ipan estado Judea, huan Herodes Ántipas ipan estado Galilea. Huan iicni Herodes catli itoca Herodes Felipe II eltoya gobernador ipan estados Iturea huan Traconite. Huan Lisanias eltoya gobernador campa itoca Abilinia.

²Huan Anás huan teipa Caifás eltoyaj huejhueyi totajtzitzi. Huan ipan ni tonali Toteco quinotzqui Juan, itelpoca Zacarías, huan quimacac icamanal para tlayolmelahuas quema yaya itztoya ipan nopa huactoc tlali campa amo tleno eli.

³Huajca Juan pejqui nejnemi campa hueli ipan nopa tlali nechca hueyatl Jordán huan tlacamanalhuijtinemiyaya icamanal Toteco. Quinilhuiyaya masehualme ma moyolpatlaca, huan ma quicahuaca inintlajtlacolhua huan ma mocuaaltica para Toteco quintlapojpolhuis.

⁴Catli Juan quichihuayaya quitlamilti catli nopa tlajtol pannextijquetl Isaías huejcajya quiijcuilo para Juan quichihuas. Isaías quiijto: “Masehualme quicaquise se catli camanaltis chicahuac ipan nopa huactoc tlali campa amo tleno eli. Quiijtos: ‘Xijcualtlalica amoyolo pampa hualas Tohueyiteco. Xijsencahuaca huan xijxitlahuaca iojhui para ipan nemis.

⁵Xijtemitica nochi campa tlaostotic. Xijsepanoca campa tlafiero, huan xijxitlahuaca nochi ojhuijhuijcoli, huan xicalaxoca nochi tlalcojcomoli.

⁶Pampa hualas yaya catli Toteco Dios techtitlanilijtoc para techmaquixtis tlen totlajtlacolhua, huan nochi masehualme quiitase.’ ” Quej nopa quiijcuilo Isaías huejcajya.

⁷Huan miyaqui masehualme ajsiyayaj campa Juan para ma quincuaalti, huan yaya quinilhuiyaya: ―Ancohuame. ¿Ajqueya anmechilhuijtoc para Toteco amo anmechtlatzacuiltis teipa sintla anmocuaaltise?

⁸Amo quej nopa. Monequi xijchihuaca catli cuali para nochi quimatise sintla nelía ya anmoyolpatlatoque huan anquicajtejtoque amotlajtlacolhua. Amo ximoilhuica para amo tleno anmechajsis pampa aniteipa ixhuihua tohuejcapan tata Abraham, pampa Toteco hueli quincuepas ni teme iteipa ixhuihua Abraham sintla quinequi quichihuas.

⁹Quen tlacame quitzontequij cuame catli amo temacaj inintlajca huan quintlatíaj, Toteco nojquiya ya itztoc para anmechtzontlamiltis huan anmechcuamajcahuas ipan tlitl.

¹⁰Huan nopa masehualme quitlatzintoquilijque: ―Huajca, ¿tlaque monequi tijchihuase?

¹¹Huajca Juan quinilhui: ―Xijchihuaca catli cuali. Aqui quipiya ome iyoyo ma quimaca se catli amo tleno quipiya. Huan catli quipiya tlacualistli nojquiya ma temajmaca.

¹²Huan nojquiya hualajque para mocuaaltise sequinoc tlacame catli tlainamaj impuesto. Nochi quimatque para tlainamani tlahuel tlacajcayahuaj. Huan nopa tlainamani quitlatzintoquilijque: ―Tlamachtijquetl, ¿tlaque monequi tijchihuase tojuanti?

¹³Huajca Juan quinilhui: ―San xiquininamaca masehualme catli quiijtohua tlanahuatili.

¹⁴Huan hualajtoyaj sequin soldados catli quitlatzintoquilijque: ―Huan tojuanti, ¿tlaque monequi tijchihuase? Huajca Juan quinilhui: ―Amo xiquinfuerzajhuica masehualme ma anmechtlamajmacaca. Amo aqui xijtelhuica ica catli amo neli huan xipaquica san ica catli anquitlanij.

¹⁵Huan amo molinijque nopa masehualme catli itztoyaj nepa. Nochi san quichiyayayaj huan monejnehuiliyayaj sintla huelis Juan elqui nopa Cristo catli Toteco quitencahuili techtitlanilisquía.

¹⁶Huajca Juan quinilhui nochi nopa masehualme: ―Na nimechcuaaltía san ica atl, pero yaya catli hualas teipa quipiyas más chicahualistli que na. Ya nimechilhuijtoc tlen ya. Amo nicaxilía para nijtequipanos, niyon amo quinamiqui para nijquixtilis itecac. Yaya anmechmacas sequin amojuanti Itonal Toteco huan sequinoc anmechtlatzacuiltis ica tlitl.

¹⁷Yaya quiniyocatlalis masehualme catli iaxcahua ica inijuanti catli amo. Quena, Toteco quichihuas quen se tlacatl catli quitequihuía itlaajacapehuilol para quiyejyectis trigo. Quinhuicas masehualme catli iaxcahua quen se tlacatl quitlalis itrigo ipan icuacalhua. Huan nopa sequinoc masehualme quintlatis ipan tlitl catli amo quema sehuis quen se tlacatl quitlatis itlasolo trigo.

¹⁸Quej nopa, Juan quinyolmelajqui nochi nopa masehualme miyac tlamantli quema quincamanalhuiyaya icamanal Toteco.

¹⁹Huan teipa Juan quitelhui Gobernador Herodes Ántipas pampa mocuili ihuejpol catli itoca Herodías para elis isihua. Herodías eliyaya isihua iicni catli itoca eliyaya Herodes Felipe II. Nojquiya Juan quitelhui Herodes Ántipas ica sequinoc tlamantli catli fiero quichihuayaya.

²⁰Huajca nopa Gobernador Herodes Ántipas noja más fiero quichijqui huan quitzajqui Juan.

²¹Pero quema ayamo quitzactoyaj Juan, quincuaaltiyaya miyaqui masehualme, huan Jesús nojquiya hualajqui campa itztoya huan mocuaalti. Huan ipan nopa tlatoctzi quema mocuaaltiyaya, Jesús motlatlajtiyaya huan tlapojqui ilhuicac.

²²Huan hualtemoc Itonal Toteco ipan ya. Huan Itonal Toteco nesiyaya quen se paloma. Huan Toteco Dios camanaltic tlen ilhuicac huan quiilhui Jesús: ―Ta tiNocone catli nimitzicnelía huan nipaqui miyac ica catli tijchihua.

²³Huan Jesús quipixtoya se treinta xihuitl quema quipehualti itequi huan pejqui nentinemi para tepohuilis icamanal Toteco. Huan masehualme moilhuiyayaj para eliyaya icone José. Huan José eliyaya icone Elí,

²⁴catli eliyaya icone Matat, catli eliyaya icone Leví, catli eliyaya icone Melqui, catli eliyaya icone Jana, catli eliyaya icone José,

²⁵catli eliyaya icone Matatías, catli eliyaya icone Amós, catli eliyaya icone Nahúm, catli eliyaya icone Esli, catli eliyaya icone Nagai,

²⁶catli eliyaya icone Maat, catli eliyaya icone Matatías, catli eliyaya icone Semei, catli eliyaya icone José, catli eliyaya icone Judá,

²⁷catli eliyaya icone Joana, catli eliyaya icone Resa, catli eliyaya icone Zorobabel, catli eliyaya icone Salatiel, catli eliyaya icone Neri,

²⁸catli eliyaya icone Melqui, catli eliyaya icone Adi, catli eliyaya icone Cosam, catli eliyaya icone Elmodam, catli eliyaya icone Er,

²⁹catli eliyaya icone Josué, catli eliyaya icone Eliezer, catli eliyaya icone Jorim, catli eliyaya icone Matat,

³⁰catli eliyaya icone Leví, catli eliyaya icone Simeón, catli eliyaya icone Judá, catli eliyaya icone José, catli eliyaya icone Jonán, catli eliyaya icone Eliaquim,

³¹catli eliyaya icone Melea, catli eliyaya icone Mainán, catli eliyaya icone Matata, catli eliyaya icone Natán,

³²catli eliyaya icone David, catli eliyaya icone Isaí, catli eliyaya icone Obed, catli eliyaya icone Booz, catli eliyaya icone Salmón, catli eliyaya icone Naasón,

³³catli eliyaya icone Aminadab, catli eliyaya icone Aram, catli eliyaya icone Esrom, catli eliyaya icone Fares, catli eliyaya icone Judá,

³⁴catli eliyaya icone Jacob, catli eliyaya icone Isaac, catli eliyaya icone Abraham, catli eliyaya icone Taré, catli eliyaya icone Nacor,

³⁵catli eliyaya icone Serug, catli eliyaya icone Ragau, catli eliyaya icone Peleg, catli eliyaya icone Heber, catli eliyaya icone Sala,

³⁶catli eliyaya icone Cainán, catli eliyaya icone Arfaxad, catli eliyaya icone Sem, catli eliyaya icone Noé, catli eliyaya icone Lamec,

³⁷catli eliyaya icone Matusalén, catli eliyaya icone Enoc, catli eliyaya icone Jared, catli eliyaya icone Mahalaleel, catli eliyaya icone Cainán,

³⁸catli eliyaya icone Enós, catli eliyaya icone Set, catli eliyaya icone Adán, catli eliyaya icone Toteco Dios.