1Sar sas o Tiberius imar Cisaris dešupandžto (15.) berš a o Pontsko Pilat vladaris andre Judsko, o Herodes tetrarchas andre Galileja a o Filip, leskero phral, tetrarchas andre phuva Iturea the Trachonitida a o Lyzaniaš tetrarchas andre Abilena
2a sar sas nekbareder rašaja o Annaš the o Kajfaš, prevakerďa o Lav le Devleskero pre pušťa ko Jan, ke le Zachariašoskero čhavo.
3Ov phirelas pal caľi phuv pašal o Jordan a kazinelas: “Odvisaren tumen le binendar a den pes te bolel, hoj o Del te odmukel tumare bini.”
4Avke sar hin pisimen andro zvitkos le prorokoskero Izaiašoskero: “Kada hin o hangos, so vičinel pre pušťa: ‘Pririchtinen o drom le Rajeske, rovňaren avri leskere chodňiki!
5Dojekh dolina ela začhiďi a dojekh verchos the brehos cikňola. Oda, so hin bango, ela rovno a oda drom, so hin pukľato, ela hladko.
6A savore nipi dikhena o spaseňje le Devleskero.’”
7O Jan phenelas le nipenge, save avenas ke leste, hoj len te bolel: “Fajta sapengeri! Ko tumenge sikaďa, sar te denašel le Devleskera choľatar, so avela?
8Dživen avke, hoj o nipi te dikhen, hoj tumen visarďan tumare binendar! A ma phenen tumenge: ‘Se o Abraham hino amaro dad!’ Bo phenav tumenge, hoj o Del kale barendar šaj kerel le Abrahamoskere čhaven!
9O tover imar hino prithodo paš o koreňis le stromengero! Dojekh stromos, so na anel lačho ovocje, čhinen avri a čhiven pre jag!”
10O nipi lestar phučenas: “So amenge akor kampel te kerel?”
11O Jan lenge odphenďa: “Kas hin duj gada, mi del oles, kas nane, a kas hin chaben, mi kerel tiš avke!”
12The o colňika pes avle te bolel a phučle lestar: “Učiťeľina, amenge so kampel te kerel?”
13Ov lenge phenďa: “Ma kiden avri buter, sar tumenge hin phendo!”
14A phučle lestar the o slugaďa: “Amenge so kampel te kerel?” Phenďa lenge: “O love ňikastar ma kiden avri zoraha a pre ňikaste ma ispiden, hoj tumen te prepočinel. Aven spokojne oleha, so zaroden!”
15O manuša užarenas pro Mesijašis a gondoľinenas andre peskere jile pal o Jan, hoj ov hino Kristus.
16Ale o Jan odphenďa savorenge: “Me tumen bolav le paňeha, ale avel mandar vareko bareder, kaske na som hodno te rozphandel o sirimocis pre leskere sandalki. Ov tumen bolela le Sentne Duchoha the la jagaha.
17Andre leskero vast hin o vejaris a ov prežužarela peskero humnos. O prežužardo ďiv (zrnos) sthovela andre peskeri šopa, ale o phus labarela andre jag, so šoha (ňikda) na murdaľola.”
18Mek the andro but aver veci dovakerelas le manušenge a vakerelas lenge o evaňjelium.
19Ale o Jan karhinelas le tetrarchas Herodes vaš e Herodijada, savi sas romňi le Filiposke, leskere phraleske, the vaš savore nalačhipena, so kerelas.
20A ke oda savoro, o Herodes kerďa mek oda, hoj le Jan phandľa andre bertena.
21Akor, sar pes bolenas savore nipi, sas boldo the o Ježiš a sar pes modľinelas, jekhvareste phundriľa o ňebos
22a o Sentno Duchos avľa pre leste andre podoba sar holubica. Andral o ňebos šunďiľa hangos: “Tu sal miro Čhavo, saves kamav, tutar man hin o radišagos.”
23Sar chudľa o Ježiš te kazinel, sas leske vaj tranda (30) berš a o manuša peske gondoľinenas, hoj sas le Jozefoskero čhavo. Le Jozefoskero dad sas o Heli,
24leskero dad sas o Mattat, leskero o Levi, leskero o Melchi, leskero o Jannai, leskero o Jozef,
25leskero o Mattatiaš, leskero o Amos, leskero o Nahum, leskero o Esli, leskero o Nagge,
26leskero o Mahat, leskero o Mattatiaš, leskero o Semein, leskero o Jozech, leskero o Joda,
27leskero o Joanan, leskero o Resa, leskero o Zerubbabel, leskero o Šealtiel, leskero o Neri,
28leskero o Melchi, leskero o Addi, leskero o Kosam, leskero o Elmadam, leskero o Er,
29leskero o Ješua, leskero o Eliezer, leskero o Jorim, leskero o Mattat, leskero o Levi,
30leskero o Simeon, leskero o Juda, leskero o Jozef, leskero o Jonam, leskero o Elijakim,
31leskero Melea, leskero o Menamas, leskero o Mattatas, leskero o Natan, leskero o David,
32leskero o Izaj, leskero o Obed, leskero o Boaz, leskero o Salmon, leskero o Nachšon,
33leskero o Amminadab, leskero o Admin, leskero o Checron, leskero o Perec, leskero o Juda, leskero o Jakob,
34leskero o Izak, leskero o Abraham, leskero o Terach, leskero o Nachor,
35leskero o Serug, leskero o Reu, leskero o Paleg, leskero o Eber, leskero o Šelach,
36leskero o Kainan, leskero o Arpachšad, leskero o Šem, leskero o Noach, leskero o Lamech,
37leskero o Matuzalem, leskero o Enoch, leskero o Jared, leskero o Mahalalel, leskero o Kenan,
38leskero o Enoš, leskero o Šet a leskero dad sas o Adam, savo sas le Devlestar.
