Kessaabaa 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹GODAI Muuseyyo hagaadan yaagiis;

²“Taayyo immiyoobaa ehaanaadan neeni Israa7eelatuyyo yoota; taayyo immanau a wozanai a imma imma giyo asa ubbaa imotaa neeni taayyo ekka.

³Intte etappe ekkana imotai hagaa: worqqaa, biraa, nahaasiyaa birataa,

⁴salo milatiya qacinaa, ochchaa teeraa milatiya qacinaa, shololla zo7o qacinaanne liiqo liinuwaa, deeshshaa agoziyaa,

⁵dorssa orggiyaa calaa zo7o qalamiyan yeggi kessidoogaa, irppaniyaa, guuganttaa,

⁶xomppiyaassi wogaraa zaitiyaa, tiyettiyo zaitiyaanne ixaanaa sawettiya qimamiyaa;

⁷eefuudiyaaninne tiran wottiyoogan yeggiyo maragidiyaa geetettiya shuchchatanne hara phooliya al77o shuchchata eho.

⁸“Yaatidi taani eta giddon aqanaadan, eti taayyo goinniyo sohuwaa giigissona.

⁹Likke taani nena bessana leemisuwaadan Xoossaa Dunkkaaniyaanne a giddon de7iya miishshata oottite.

¹⁰“Eti guuganttaa mittaappe zananai naa77u waranne baggaa, gomppai issi waranne baggaa, geesai qassi issi waranne baggaa gidiya Taabootaa medhdhona.

¹¹Suwaanne kariyaa walahi bainna worqqan sheeshsha; a yuushuwaakka worqqa tigettan yuushsha aatta.

¹²He Taabootaayyo oiddu worqqa sagaayota tiga; tigada oiddu gedetun issi baggaara naa77u sagaayota, qassi hankko baggaara naa77u sagaayota aatta.

¹³Hegaappe guyyiyan, guuganttaappe kasota kessa; kessada worqqan sheeshsha.

¹⁴Taabootaa tookkanau, Taabootaa miyyiyan de7iya sagaayotun kasota aatta.

¹⁵Tookkiyo kasoti Taabootaa sagaayotu giddon de7ona; eti hegaappe mulekka kiyoppona.

¹⁶Taabootaa giddon taani neeyyo immiyo, tammu azazoti xaafetti uttido naa77u masettida shuchchata wotta.

¹⁷“Walahi bainna worqqaappe naa77u waranne baggaa aduqqiya, issi waranne baggaa aakkiya atto giyo sohuwaa qum77uwaa medhdha.

¹⁸Qum77uwaayyo wurssetta naa77u bagga gaxan naa77u kiruubeta, qoxettida worqqaappe medhdha.

¹⁹Issi kiruubiyaa issi bagga gaxan, naa77antto kiruubiyaa hankko bagga gaxan naa77aakka qum77uwaara gatta oittada medhdha.

²⁰Kiruubeti bantta qefiyaa denttidi, atto giyo sohuwaa qum77uwaa bantta qefiyan kuwayi wottona; qassi issoi issuwaakko simmi uttidi, qum77uwaa xeellona.

²¹Qum77uwaa Taabootaayyo bolla baggan wotta; qassi taani neeyyo immiyo azazoti xaafettido masettida shuchchata Taabootaa giddon wotta.

²²Maachchaa Taabootaa bolla qum77uwaa bolli de7iya naa77u kiruubetuppe gidduwan taani nenaara gaittana; gaittada Israa7eela asaayyo taani immiyo azazo ubbaa yan neeyyo immana.

²³“Guuganttaa mittaappe zananai naa77u wara, gomppai issi wara, geesai qassi issi waranne bagga gidiyo issi xaraphpheezaa medhdha.

²⁴Yaatada walahi bainna worqqan sheeshsha; qassi a yuushuwan worqqaa tigettaa yuushsha aatta.

²⁵Hegaadankka, qassi gomppai takkaaro gidiyo shaashiyaa a bolli yuushsha aatta. Yaatada a bolli worqqa tigettaa yuushsha.

²⁶He xaraphpheezaayyo oiddu worqqa sagaayota medhdhada, xaraphpheezaa tohoti de7iyo oiddu zoozetun oitta.

²⁷Xaraphpheezaa tookkanau kasota aattiyo sagaayoti xaraphpheezau shaashiyaa lanqqiyan shiiqidi de7ona.

²⁸He tookkiyo kasota guuganttaappe kessada, worqqan eta sheeshsha.

²⁹Hegaadankka, qassi sainetanne cilppata, yarshshuwaa yarshshiyo wode go7ettiyo duuqqiyoobatanne xuu7ata walahi bainna worqqaappe ootta.

³⁰Ta sintti aattiyo geeshsha oittai ubba wodekka xaraphpheezaa bolli xayoppo.

³¹“Xomppiyaa wottiyo ballaa qoxettida walahi bainna worqqaappe ootta; he ballai eqqiyo gedeekka, qassi giddo toomaikka ubbai qoxettida worqqaappe oosettanau koshshees. A qururuusoti, a kukkumotinne a ciishshati ubbai aara issippe oiqetti merettanau koshshees.

³²Miyyiyaara usuppun marati ayyo kiyona; maratuppe heezzati issi baggaara, qassi heezzati hankko baggaara de7ona.

³³Usuppun maratussikka huuphiyan huuphiyan issi issi kukkumoinne ciishshai de7iyo lauziyaa ciishshaa milatiya wanccai de7o.

³⁴Xomppiyaa wottiyo ballaassi giddo toomai, kukkumotinne ciishshati de7iyo lauziyaa ciishshaa milatiya oiddu wanccan alleeqetto.

³⁵Naa77ai naa77ai issippe waattan de7iyo heezzu maratuppe garssaara issi issi kukkumoi de7o.

³⁶Kukkumotinne marati ubbai xomppiyaa wottiyo ballaara issippe, oiqetti issuwaa gididi, walahi bainna worqqaappe qoxettidi oosettona.

³⁷“Hegaappe guyyiyan, xomppiyaa wottiyo ballau laappun xomppeta giigissada, eti sinttaa poo7ana mala xoqqu oottada wotta.

³⁸Xomppiyaa toissiyo qaphetanne eta wottiyoobata walahi bainna worqqaappe ootta.

³⁹Xomppiyaa wottiyo ballainne an go7ettiyo miishsha ubbai hasttamanne ichchashu kilo giraame gidiya walahi bainna worqqaappe oosettona.

⁴⁰Akeeka; taani nena deriyaa huuphiyan bessido leemisuwaa kaallada ootta.