Kessaabaa 40

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Hegaappe guyyiyan, GODAI Muusa,

²“Koiro aginaayyo koiro gallassi, neeni Xoossaa Dunkkaaniyaa tola.

³Maachchaa Taabootaa a giddon wotta; wottada he Taabootaa magalashuwan kamma.

⁴Xaraphpheezaa gelissada, a bolli wodhdhanau koshshiya miishshata ubbaa a bolli wotta. Yaatada xomppeta wottiyo ballaa soo gelissada, a bolli xomppeta wotta.

⁵Ixaanaa cuwayiyo worqqa saaxiniyaa Maachchaa Taabootaa sinttaara wottada, Xoossaa Dunkkaaniyaa geliyo magalashuwaa kaqqa.

⁶“Xuuggiyo yarshshuwaa yarshshiyoosaa Xoossaa Dunkkaaniyaa sinttaara wotta.

⁷Meechcha keriyaa Xoossaa Dunkkaaniyaappenne yarshshiyoosaappe gidduwan wottada, an haattaa tiga.

⁸Xoossaa Dunkkaaniyaappe kareera yuushsha aattada dabaabaa giigissa; giigissada dabaabaa geliyoosan magalashuwaa kaqqa.

⁹“Tiyiyo zaitiyaa ekkada, Xoossaa Dunkkaaniyaanne a giddon de7iya ubbabaa tiya; anne a giddon go7ettiyo miishsha ubbaa dummaya; yaatobare i geeshsha gidana.

¹⁰Hegaappe guyyiyan, xuuggiyo yarshshuwaa yarshshiyoosaanne au go7ettiyo miishsha ubbaa tiya; yarshshiyoosaa dummaya; yaatobare i ubbaappe aadhdhiya geeshsha gidana.

¹¹Meechcha keriyaanne a utissiyo miishshaa tiya; tiyada eta dummaya.

¹²“Neeni Aaroonanne a naata Xoossaa Dunkkaaniyaa geliyo pengge ehaada, haattan eta meecca.

¹³Hegaappe guyyiyan, qeesetettaa maayuwaa Aaroona maizzada, i taayyo qeesetettan oottanaadan, a tiyada dummaya.

¹⁴A attuma naatakka ehaada qoliyaa maizza.

¹⁵Eti taayyo qeesetettan oottanaadan, eta aawaa tiyidoogaadan, etakka tiya. Eta tiyettai etakka eta sintta yeletaa ubbaa qeese oottiyaagaa” yaagiis.

¹⁶Yaagin Muusee ubbabaakka GODAI bana azazidoogaadan oottiis.

¹⁷Hegaa gishshau, Gibxxeppe eti kiyido naa77antta laittan, koiro aginaayyo koiro gallassan Xoossaa Dunkkaanee tolettiis.

¹⁸Muusee Xoossaa Dunkkaaniyaa essiyo wode, gedeta eta sohuwan sohuwan wottiis; xagaagetanne tuussaa aattiis; hiraqotakka gelissiis.

¹⁹Hegaappe guyyiyan, Muusee GODAI azazidoogaadan, ha essidoogaa bollan dunkkaaniyaa toliis; he toliyaa bollan kamuwaa kammiis.

²⁰Yaatidi tammu azazoti xaafettido masettida shuchchatu qaalaa efiidi, Taabootaa giddon wottiis; tookkiyo kasota Taabootan aattiis; atto giyo sohuwaa qum77uwaa Taabootaa bolli wottiis.

²¹Hegaappe guyyiyan, Taabootaa Xoossaa Dunkkaaniyaa gelissiis; genttiyo magalashuwaa kaqqidi, GODAI azazidoogaadan Maachchaa Taabootaa kammiis.

²²GODAI Muusa azazidoogaadan, Muusee xaraphpheezaa Xoossaa Dunkkaaniyaa gelissidi, magalashuwaappe kareera huuphessa baggaara wottiis.

²³Wottidi a bolli GODAA sinttan wottiyo geeshsha oittaa giigissiis.

²⁴GODAI Muusa azazidoogaadan, xomppiyaa wottiyo ballaa Xoossaa Dunkkaaniyaa giddo gelissidi, xaraphpheezaa hefinttaara, Xoossaa Dunkkaaniyau tohossa baggaara wottiis;

²⁵qassi xomppeta GODAA sinttan oittiis.

²⁶GODAI azazidoogaadan, ixaanaa cuwayiyo worqqa saaxiniyaa Xoossaa Dunkkaaniyaa giddon magalashuwaa sintta baggaara wottiis;

²⁷wottidi a bolli sawiya ixaanaa cuwayiis.

²⁸Hegaappe guyyiyan, Xoossaa Dunkkaaniyaa penggiyan magalashuwaa woxaliis.

²⁹Xuuggiyo yarshshuwaa yarshshiyoosaa Xoossaa Dunkkaaniyaa geliyo penggiyaa lanqqen wottiis; a bolli xuuggiyo yarshshuwaanne katta yarshshuwaa GODAI azazidoogaadan yarshshiis.

³⁰GODAI Muusa azazidoogaadan, meechcha keriyaa Xoossaa Dunkkaaniyaappenne yarshshiyoosaappe gidduwan wottiis. Yaatidi meecettanau haattaa an tigiis.

³¹Tigin Muusee, Aarooninne a naati bantta kushiyaanne tohuwaa an meecettoosona.

³²GODAI Muusa azazidoogaadan, eti Xoossaa Dunkkaaniyaa gelido wode woikko yarshshiyoosaakko shiiqido wode audenne meecettoosona.

³³Xoossaa Dunkkaaniyaanne yarshshiyoosaa yuushshi aattidi dabaabaa kessiis; he dabaabaa penggiyan magalashuwaa woxaliis. Hegaadan oottidi, Muusee oosuwaa poliis.

³⁴Hegaappe guyyiyan, shaarai Xoossaa Dunkkaaniyaa kammiis; GODAA bonchchoikka a kumiis.

³⁵SHaarai Xoossaa Dunkkaaniyaa bolli uttido gishshaunne GODAA bonchchoi a giddon kumido gishshau, Muusee a giddo gelanau danddayibeenna.

³⁶Israa7eelati bantta oge ubban, he shaarai Xoossaa Dunkkaaniyaappe denddiyo wode audenne a kaallidi hemetaa doommoosona.

³⁷SHin he shaarai denddana xayikko, i denddiyo gallassai gakkanaassi etikka qaaxxokkona.

³⁸Eta oge ubban GODAA shaarai Israa7eela asai ubbai be7ishin, gallassi gallassi Xoossaa Dunkkaaniyaa kammeesinne qammi qammi qassi tamai he shaaraa bolli eexxees.