1Ɠɔoɠɔ GALAGI ɓɔɛni Moize ʋɔ, é ɠɛ ma:
2Bo Izelayɛle nuiti ma, ti ʋa pɔ̀ ga vebɛaniiti. Wa so, é ɠula nui kpein zea, nii faanɛɛ ɠigi bɛ̀.
3Wɛlɛ vebɛanii ʋa, nii wa so, é ɠula ti ya: zanugi, ta walii, ta kɔlu ɓɔigi,
4ta geze ɓiinii, ta ma ɓɔigi, ta ma ɓɔi sɔsɔgi, ta geze ʋagɔi kpaliai, ta boli leɠai,
5ta baala sinɛ ɠɔlɔiti, ti loai ga ma ɓɔigi, ta nuni ɠɔlɔiti, ta akasia wului,
6ta fitina wulɔi, ta tufa maku nɛɛnɛgiti ti ga siɛma wulɔ ɲadegai ta ani maku nɛɛnɛgi ʋɛ,
7ta kɔtu zɔngɔ ɓaagi nii daaseigi ga wɔnikese, ta kɔtu zɔngɔ ɓaa kiligiti zalaɠa ɠula zeɠei ma vaa zu, ta ma ɠakazu zeɠei.
8Ta seizu ɲadegai lo bɛ̀, nà zei ti zaama.
9Wa ti kpein kɛ ga seɠe ʋɛlɛ ɲadegai ɠazaʋi pelei, é ɠɛ ga sɔɔlai kpein kazaʋi pelei, nii gè ʋaazu dɛɛzu ga ɗe.
10Ta kesui ɓɛtɛ ga akasia wului. Sakpai ɠa ɠɛ ga mɛtɛlɛ ɠila taata, kogi ɠɛ ga mɛtɛlɛ ɠaaɠwɛsui, ta sɔligɔi ɠɛ ga mɛtɛlɛ ɠaaɠwɛsui.
11Ɗa zanu kitei ziɛ koozuʋɛ ta poluʋɛ, è daaɓegi ɠɛ ga zanugi, é ɠaku ma.
12Ɗa zanugi ɠaawun, è bala naanigɔiti kpɛtɛ bɛ, è ti ʋili goizu naanigɔiti ba, bala felegɔ gilazu ʋelei ta bala felegɔ zɔɔla ʋelei.
13Ɗa gulu zɔkpɔiti kpɛtɛ ga akasia wului, è zanugi ziɛ ti ma.
14Ɗa gulu zɔkpɔiti dɔ balaiti su, kesui ɠakamaʋɛti, ti kesui ʋa, kesui ɗa zeɠe ga tiye.
15Gulu zɔkpɔiti ta yɛ kesui ná-balaiti su, ti mina ɠula ná.
16Zeele woo zɛʋɛi gè feezu è ya, ɗa da kesui zu.
17Ɗa kesui lakulugi ɓɛtɛ ga zanu kitei. Sakpai ɠa ɠɛ ga mɛtɛlɛ ɠila taata, kogi ɠa ɠɛ ga mɛtɛlɛ ɠaaɠwɛsui.
18Geezuɠeela felegɔiti ti laaseigi ga seeluɓɛin, ɗa naati kpɛtɛ ga zanu doɠai, è ti ʋilɛ kesui lakulugi laaɓe felegɔiti ga.
19Ɗa seeluɓɛin gila kpɛtɛ daaɓegi ɠilazuʋɛ ɠa, seeluɓɛin gila daaɓegi zɔɔla ʋelei ɠa. Ɗa seeluɓɛin felegɔiti ta kesui lakulugi ɓɛtɛ ga ani ɠila nɔ.
20Seeluɓɛinti ta ti-ɠoʋegiti suvie maazuʋɛ, ti kesui lakulugi maalɔɔɠu ga ti-ɠoʋegiti, ta ɠaaʋote ɓɔɠɔ ma. Seeluɓɛinti ta ɠaaʋote kesui lakulugi ma.
21Zeele woo zɛʋɛi gè feezu è ya, ɗa da kesui zu. Ɗa kesui laaɠulu.
22Miná ɠa nà ɠɛ ɠulazu ná kɛlɛma è ʋɛ, kesui lakulugi maazuʋɛ seeluɓɛin felegɔiti zɔɠɔzuʋɛ. Ná ɠa gè ʋaazu ɓɔɛzu ná è ʋɔ, é lo nà-deveiti kpein ba, Izelayɛle nuiti faa zu.
23Ɗa taɓalii ɓɛtɛ ga akasia wului. Sakpai ɠa ɠɛ ga mɛtɛlɛ ɠila, kogi ɠɛ ga mɛtɛlɛ lukpɛgi, sɔligɔi ɠɛ ga mɛtɛlɛ ɠaaɠwɛsui.
24Ɗa zanu kitei ziɛ ma, è daaɓegi ɓɛtɛ ga zanugi, é ɠaku ma.
25Ɗa kakamaʋɛti kpɛtɛ ga nu yeaʋɛ liegɔi ɠɛɠala, è naa laaɓegi ɓalaa kpɛtɛ ga zanugi, é ɠaku ma.
26Ɗa zanu bala naanigɔiti to goizu naanigɔiti ba, ti ɠɛ kɔɠɔ naanigɔiti tetegi.
27Balaiti ta ɠɛ kakamaʋɛti ba, gulu zɔkpɔiti ta lɔ ti zu, taɓalii zeɠe vai zu.
28Ɗa gulu zɔkpɔiti kpɛtɛ ga akasia wului, è zanugi ziɛ ti ma, ti ɠɛ ga taɓalii zeɠe aniiti.
29Ɗa diɠiiti kpɛtɛ, ta tazaiti, puya zalaɠai vaa zu, naa ʋɛɛ ziawɔiti ta kokoiti ba. Ɗa ti ɠɛ ga zanu kitei.
30Ɗa ɓuluiti da taɓalii ɠa, niiti ti veai bɛ̀, ti ɠɛ ná gàazu yeenɔpɛ.
31Ɗa fitina zei anii ɓɛtɛ ga zanu kitei doɠaai. Ti pɛ ti ɠɛ ga ani ɠila: kɔɠɔi, ta ma wului, ta ma ɓekegiti, ta maaɠili zɔɔlaiti ti ɠulaai ga gulu ʋuai.
32Fitina zei anii ma ɓeke dɔzitaiti ta ɠula kakamaʋɛti, ma ɓeke saʋagɔ ɠa ɠɛɛzu kakamaʋɛ gilazuʋɛ, ta ma ɓeke saʋagɔ ɠɛ kakamaʋɛ zɔɔla ʋelei.
33Maaɠili zɔɔlai ɠa ɠɛ saʋa ma ɓeke dɔzitai ɠilagilagi pɛ ba, ti ɠulaai ga amandegi ma ʋuai.
34Maaɠili zɔɔla naanigɔ ɠa ɠɛ fitina zei anii ma wului ʋa, ti ɠulaai ga amandegi ma ʋuai.
35Maaɠili zɔɔlai gila ka ɠɛ ma ɓeke felefelegiti todazuʋɛ.
36Fitina zei anii ɠa ɠɛ ga zanu kitei doɠaai. Baalobazuʋɛti pɛ ti ɠɛ ga ani ɠila: ma wului, ta ma ɓekegiti, ta maaɠili zɔɔlaiti.
37Ɗa ná-fitina lɔfelaiti kpɛtɛ, ti zeizu maazuʋɛ, nii a kɛ é ɗa wozaɠala gaazu.
38Ná-salaʋa zo sɔɔlaiti ta ná-salaʋa zeɠe aniɲakaiti, ta ɠɛ ga zanu kitei.
39Ɗa kilo ʋuusaʋagɔ (30) zeɠe zanu kitei zu, è kpɛtɛ ga fitina zei anii ta ma zɔɔlaiti kpein.
40Dama, è kɛ ga naama ɠazaʋigi nɔ, nii é lɛɛni ga ɗe gizei ma.
