1मिनु परमप्रभु यावेमी मोसा कली
2“इस्राएली आन कली ‘आं कली मार मार गेचा मिम्नीनी, मेको गेने’ दे मतो। आन थुंमी गेचा दाक्शो, नेल्ल आन चाक्शो गे नु इ कली वारच पाइबपुकीमी ताक्कीन। प्रस्थान ३५:४-७; १इतिहास २९:५; एज्रा २:६८,६९
3आं कली मार मार ताक्चा माल्नीनी देंशा हना, सुन चांदी नु कांसा,
4नीलो, प्याजी नु लल रङ ङा श्येले, रिम्शो पा किरशो सुती श्येले के प्रोव़शो वा, क्यारश आ चां,
5लल रङ नुप्शो सांड आ कुशुल, नेल्ल क्येङा रिम्शो सेल्शो कुशुल, बोल्यो शी,
6बत्ती दातीक तेल, लुक्तीक तेल नु धूप कली ब्रोव़शो रिना पपाइक्ब थोव़क,
7निसाफ पतीके ऊरीम नु थुम्मीम वोइक्तीक झोला नु कुचु तार वोइक्तीक सेल्चा कली ओनीक्स माइश्शो हीरा नु अरु हीरा ताक्चा माल्नीनी।
8मिनु गो मेको आन दातेमी बाक्चा कली आं बाक्तीक सेल्पतो। इजीकीएल ३७:२६-२८
9गो इ कली कोंइशो खोदेंशो पा ताम्बु सेल्पाइक्चा माल्नेवे। आगाम मार मार वोइक्चा माल्नेवे, मेको आं कोंइशो खोदेंशो पा सेल्पतो। प्रस्थान २५:४०; प्रस्थान २६:३०; प्रस्थान २७:८
10मेकोपुकीमी बोल्यो शी के सन्दोस का सेल्चा माल्नीम। मेको आ पित्थ लाइश्शो कुबीत निक्शी नु आधा, आ ब्रेम्शो कुबीत का नु आधा नु आ ग्येत्थ लाइश्शो कुबीत का नु आधा ङा सेल्चा माल्नीम। कुबीत का ०.५ मिटर खोदेंशो बाक्ब।
11मिनु गे मेको सन्दोस आ खिंङगा नु आ लाङगा नेल्ल क्येख सुनमी गिल्पाइक्चा माल्नेवे। मिनु एर ओंथ सुन के सुर सेल्पाइक्चा माल्नेवे।
12मिनु सुन के ४ ओटा मुन्द्रा सेल्पाइक्चा माल्नेवे। का पटटी निक्शी नु अर्को पटटी निक्शी पा सन्दोस आ ४ सुरमी क्येप्चा माल्नीम।
13मिनु बोल्यो शी के कुरतीक कोक्के निक्शी सेल्पाइश्शा, सुनमी गिल्पाइक्चा माल्नेवे। १राजा ८:८
14मिनु मेको कुरतीक कोक्के निक्शी मेको मुन्द्राम शुइक्चा माल्नेवे। मो पा मेको सन्दोस कली कुरने चाप्नीम।
15मेको कोक्के निक्शी सन्दोसम बाक्शो मुन्द्राम शुइक्चा माल्नीस। मेको आस कली मशोल्चा।
16मिनु गो इ कली गेचा चिक्शो कबल पा अरेशो लोव़ मेको सन्दोसमी कुर पा वोइक्चा माल्नेवे।
17मिनु सन्दोस सुम्तीके क्येख सुन के चेम्शा सेल्चा माल्नेवे। मेकेर परमप्रभु आ शिशी बाक्ब। आ पित्थ लाइश्शो कुबीत निक्शी नु आधा नु आ ब्रेम्शो कुबीत का नु आधा बाक्चा माल्ब। कुबीत का ०.५ मिटर, कुबीत का खोदेंशो बाक्ब।लेवी १६:१२-१५; हिब्रू ४:१६; हिब्रू ९:५
18मिनु गे आं स्वर्ग ङा गेय पाइब खोदेंशो सुन के करूब निक्शी चेम्शा सेल्पाइक्चा माल्नेवे। मेको सुम्तीकेम आ निम्फा पटटी का का करूब चेम्शा सेल्चा माल्नेवे।
19का पटटी करूब का, अर्को पटटी करूब का चेम्शा सेल्चा माल्नेवे। मेको सुम्तीके नु करूब निम्फा मख्रोंइसीशो सुन का केन चेम्शा सेल्चा माल्नेवे।
20मेको करूबम आस फ्रां हाम्शा, सुम्तीके फारचा माल्नीस। आस कुल कोव़मुशा, सन्दोस सुम्तीके गे कोव़चा माल्नीसी।
21मेको सुम्तीके मेको कबल पशो सन्दोस तार वोइक्चा माल्नेवे। मिनु गो इ कली गेचा चिक्शो कबल पा अरेशो लोव़ मेको कबल पशो सन्दोसम कुर पा वोइक्चा माल्नेवे। प्रस्थान ३४:२९; १राजा ८:९
22मिनु गो मेको सन्दोस सुम्तीके शिशी बाक्तीकेम गे नु ग्रुम्शा, लोव़ पाइनुङ। मेको सुम्तीके आ तारी मेको करूब निक्शी आस दाते रे गो इस्राएली आन कली मार मार अरेचा माल्नुङा, मेको गो इ कली देंनुङ। गन्ती ७:८९; २सामुएल ६:२
23गे बोल्यो शी के टेबल का सेल्पाइक्चा माल्नेवे। मेको आ पित्थ लाइश्शो कुबीत निक्शी नु आ ब्रेम्शो कुबीत का नु आ ग्येत्थ लाइश्शो कुबीत का नु आधा दुम्चा माल्ब। कुबीत का ०.५ मिटर, खोदेंशो बाक्ब।
24मिनु मेको कली क्येख सुनमी गिल्पाइक्चा माल्नेवे। सिरपेच खोदेंशो पा एर ओंथ नेल्ल सुन के सुर सेल्पाइक्चा माल्नेवे।
25मेको एर ओंथ ङा सुर नेल्ल ४ आंइची ब्रेम्शो दुम्चा माल्ब। मेको कली सिरपेच खोदेंशो पा बुटा आप्पाइक्चा माल्नेवे।
26मिनु ४ ओटा सुन के मुन्द्रा चेम्शा, मेको आ ४ ओटा खोइलीम टेबल आगाम क्येप्पाइक्चा माल्नेवे।
27टेबल कुरचा कली मुन्द्रापुकी टेबल आ सुर आ नेक्था क्येप्पाइक्चा माल्नेवे।
28मिनु बोल्यो शी के कोक्के निक्शी सेल्शा, सुनमी गिल्पाइक्चा माल्नेवे। मेको टेबलम बाक्शो मुन्द्राम शुइश्शा कुरने चाप्नीम।
29मिनु टेबलम वोइक्चा माल्शो थाल, लोटा नु बोस नेल्ल नु तूचा थोव़क चढ़ेतीक लुक्चा कली लोटा नेल्ल क्येख सुन के सेल्पाइक्चा माल्नेवे।
30मिनु मेकेर गेना हना यो आं ङोंइती कोंइतीक शोब्ले वोइक्चा माल्नेवे। लेवी २४:५-६
31गे क्येख सुन के बत्ती दातीक का चेम्शा सेल्पाइक्चा माल्नेवे। आ थाम, आ राशी, आ दियारी, आ डल्ला नु फूपुकी ठेयब सुन का केन दुम्चा माल्नीम।
32मिनु मेको बत्ती दातीक आ थाम रे ६ ओटा राशी ग्रूचा माल्नीम। का पटटी रे सां नु अर्को पटटी रे सां ग्रूचा माल्नीम।
33मिनु मेको राशी कामी देसी बदाम आ फू खोदेंशो बुटा पाइश्शो फू सां ग्रूचा माल्नीम। अर्को राशीपुकी यो नेल्ल मोदेंशोन दुम्चा माल्नीम।
34मेको बत्ती दातीक आ थामम चहिं ४ ओटा देसी बदाम आ फू खोदेंशो बुटा पाइश्शो ग्रूचा माल्नीम।
35थाम आ ङोंइती ङा डल्ला, आ दाते ङा डल्ला नु नोले ङा डल्ला रे निम्फा पटटी गे राशी निक्निक्शी गूचा माल्नीम।
36मेको आ राशी नु डल्ला नेल्ल ठेयब क्येख सुन का केन चेम्शो दुम्चा माल्नीम।
37गे क्येख सुन के ७ ओटा दियारी सेल्पाइक्चा माल्नेवे। मिनु सल्दो वोइश्शा, नेल्ल तांइसीचा ङा पा दाचा माल्नेवे। मेको ब्रशा, छेङछेङ दुम्ल।
38मिनु आ कांइची नु आइक्च बोस क्येख सुन के दुम्चा माल्नीम।
39गे मेको नेल्ल टलेन्ट का क्येख सुन के सेल्पाइक्चा माल्नेवे।
40गे मेको नेल्ल गो इ कली डांडाम कोंइशो खोदेंशो पा सेल्पाइक्चा माल्नेवे। प्रस्थान २५:९; प्रस्थान २६:३०; प्रेरित ७:४४; हिब्रू ८:५
