Éxodo 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Bab-Jehová Moisésʼga sunmakded, ega sogded:

²“Israel-dulemarga be sogo, anga-ibmar-ukega be ibmar weemaloye. Bela na e-ulubgi-ibmar-ukbi-itogedba, na ukmaloye.

³We-ibmarmar-uklegoed be abingaoed: Olo, mani, esgoro-gordikid,

⁴nirbadub-arad, nirbadub-suir-akwagiid, nirbadub-ginnid, linoʼdub-nued, sibad-e-absarmar,

⁵sibad-wawaad-machered-e-ukamar-ginnidgi-odolegaled, ibdurgan-uka-nuegan, urgomar-acaciaʼye-nugad.

⁶Olivo-gwallu gwallumar-ogaegar. Ina-wawadikid, olivo-gwallu-nugsalegedgi-ebulegedba oburegar. Ina-wawadikid, ina-wawadikid-obupurmaklegedba oburegar.

⁷Akwamar-nuegan-óniceʼye-nugmalad, degi, akwa-nuegan-bamalad, mor-efodʼye-nugad-birgi nasikegar, degi, mor-binasgargi-nasiklegedgi nasikegar.

⁸Geb anga anse-goled-neg be sobmalo. ”A-abargine an gudii guoed.

⁹Ar igi bela an bega oyogoe, a-sunnagwad be dulemar-anse-goled-neg-sunna-seleged be soboed, degi, a-yagi bela ibmar-ebuleged a-sunnagwad be sobbaloed.”

¹⁰“Deginbali, ulu be sobbaloed. We-ulu-sobega, urgo-acaciaʼye-nugad be ebugoed. E-sugued, achaatar-nika be soboed, e-matardungued, achapaa, degi, e-nibgued, achapaabar.

¹¹Olo-sunnabi uluyaba ebiris be nasikoed, degi, ulu-asgine, olo-sunnabi ebiris egi be nasikbaloed. Deginbali, birgi, bela-ebiris e-mullugwad olobi be nasikbaloed.

¹²”Agala, olua-dummagan-gwabake-sobega or be duoed. Ulu-e-dikar-bergunaid-sogbakegwadgi gwa-gwagwen be nasikoed.

¹³”Urgo-acaciaʼye-nugad-walagana suitii be soboed. We-suarmargi or egi bela be nasikoed.

¹⁴Suarmar-walagana-suid, ulugi-olua-dummagan-nanaid-yaba be odogoed, adi, a-suarmargi ulu nabir selegegar.

¹⁵Suarmar-walagana-suigan, ulu-e-olua-dummagan-nanaid-yaba-dogar-mai degisadegudoed, bar be ungosulid.

¹⁶A-uluyagi Igar-narmakar-an-bega-ukoedi be mesoed.

¹⁷A-sorbali, ulu-eduged or-nuedgi be imakoed. E-sugued, achaatar-nika be imakoed, e-matardungueddi, achapaa-nika be imakoed.

¹⁸”Degine, baliwiturmar-dummagan-querubinʼye-nugmalad-walabo orbi be sobbaloed. Be soboedi, mardogi-binna-binna-sarsoar-sobnai be imakoed. Baliwiturmar-querubinʼmar-warbogwad ulu-eduged-birgi e-duku-dukusik-gwichi be soboed.

¹⁹Degisoggu, querubin-wargwen ulu-eduged-birgi e-dukusik be soboed, degi, baid-querubin-wargwen e-duku-baidsik be sobbaloed. Ulu-edugedba-mesa be querubin-warbogwad soboed.

²⁰Querubin-e-sakanmala ulu-eduged-birgi nallaa gwichioed, adi, e-sakan ulu-eduged-odukunai guegar. We-querubinʼmala asabin-asabin gwisgumaloed, degi, ulu-edugedsik e-wagar-atakgwichi be imakoed.

²¹”Geb a-sorbali, ulu-edugedi, ulu-birgi be mesoed, geb ulu-yagi dulemar-ebo-an-Igar-Mesnaid narmakar-an-bega-ukoedi be mesoed.

²²An besega, querubinʼmar-warbogwad-gwichid-abargi, ulu-eduged-birgi, magarogoed. Agi an bebo sunmakoed. Agi an bega-Israel-dulemarga-ibmar-sogoed, an bela bega sogoed.”

²³“Deginbali, mese be soboed. Urgo-acaciaʼye-nugad be ebugoed. E-sugued, achabake, e-matardungued, achabo, e-nibgueddi, achapaa-nika guoed.

²⁴”Olobi egi be nasikoed, degi, e-dikar-bela-ebilis olo mulluu be mesoed.

²⁵Deginbali, e-dikar-bela-ebilis wis-nibakwaa be imakbaloed. E-matardungued, argan-matagwen be imakoed. We-wis-nibakwaa-be-imakoedgi, or ebiris be nasikoed.

²⁶”Deginbali, oluaduk-dummagan, gwabake be soboed. Mese-e-nag-sogbakegwad-iliba gwa-gwagwen be nasikoed.

²⁷Oluaduk-dummagan-gwabakegwad, mesegi-mulluu-mesilesad-urba nai guoed. A-oluaduk-dummagan-yaba suar-suid dogoed, adi, mese nabir semalagar.

²⁸”Suar-acaciaʼye-nugad-walagana suitii be soboed. A-suar-walagana-ebilis or be matak-matak nasikoed, degi, a-suar-walaganagi mese be semaloed.

²⁹Degine, e-batemar, e-bate-dummagan, degi, e-nog-dummagan, orbi be sobbaloed. ”E-bormomar be sobbaloed, adi, agi Bab-Dummadga-ibmar-uknaid eogegar. Wemala olo-nuedbi be imakoed.

³⁰Madu-Bab-Dummad-asabin-ukleged, mese-birgi-maigu be imakoed.”

³¹“Deginbali, gwallu-sied olobi be soboed. Gwallu-sied mardogi-binna-sarsoar be soboed. E-nag, e-war, e-nogmar, e-abingaed, e-dutumar, bela wemar egi-nanai soggwenna soblegoed.

³²”Gwallu-siedgi, e-sakwa walanergwa-nika (6) be imakoed. Nailik, e-sakwa walapaa be soboed, baidsik, e-sakwa walapaa be sobbaloed.

³³E-sakwa-war-wargwengi nur-matargana-e-dutuyob nog be soboed, dutu-abingaed-gwagwen, degi, e-dutu be soboed. Degine, e-sakwa-baidgi nur-matargana-e-dutuyob nog be sobbaloed, dutu-abingaed, degi, e-dutu be sobbaloed. Gwallu-sigedgi e-sakwa-walanergwagi (6) degibi be imakoed.

³⁴Gwallu-sied-wargi nog-gwabake nur-matargana-dutugii-dakleged be imakoed, e-abingaedmar, degi, e-dutumar egi be sobbaloed.

³⁵E-sakwa-warbogwad e-wargi-yolenaidgi abingaed-gwagwen be soboed, degi, abingaed-baid e-sakwa-warbogwad-baid-urba be sobbaloed, deginbali, abingaed-baid e-sakwa-warbogwad-baid-urba be sobbaloed. Bela deyobi e-sakwa-walanergwad (6) be imakoed.

³⁶E-abingaedmala, degi, e-sakwamala, unnila bela gwennaa be imakoed. Bela-wemala soggwennaa mardogi-binna-sarsoar be soboed, bela we olo-sunnabi be imakoed.

³⁷Geb degine, ega gwallu gwagugle (7) be soboed. A-gwallumala be ogaoed, adi, asabin neg-mee imakegar.

³⁸Deginbali, e-gwillodub-sikmalad, degi, e-bate-burwigana, bela olobi be imakbaloed.

³⁹Gwallu-sied be sobegala, degi, bela e-ibmar-burwigana-sobegala, or-nued nibir-dulapaa-gakambe-gakabake-aidiku (74) be ebugoed.

⁴⁰”Nue be dako, be imakoedi, igi yar-birgi bega e-dakleged oyolesa, a-sunnagwad be imakoed.”