Kessaabaa 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹Baxaali7eeli guuganttaa mittaappe Taabootaa giigissiis. He Taabootai zananaa naa77u waranne baggaa aduqqees; gomppai issi waranne baggaa aakkees; geesaikka issi waranne baggaa xoqqees.

²He Taabootaa giigissidi, suwaanne kariyaa walahi bainna worqqan sheeshshiis; yuushuwaakka worqqa tigettan yuushshi aattiis.

³Qassi oiddu worqqa sagaayota tigidi, Taabootaayyo oiddu gedetun, issi baggaara naa77u sagaayota, qassi hankko baggaara naa77u sagaayota aattiis.

⁴Yaatidi guuganttaappe kasota kessiis. Kessidi etakka worqqan sheeshshiis.

⁵Taabootaa tookkanau, Taabootaa miyyiyan de7iya sagaayotun kasota aattiis.

⁶Walahi bainna worqqaappe naa77u waranne baggaa aduqqiya, issi waranne baggaa aakkiya atto giyo sohuwaa qum77uwaa medhdhiis.

⁷Qum77uwaayyo wurssetta naa77u bagga gaxan naa77u kiruubeta qoxettida worqqaappe medhdhiis.

⁸Issi kiruubiyaa issi bagga gaxan, naa77antto kiruubiyaa hankko bagga gaxan, naa77aakka qum77uwaara gatti oittidi medhdhiis.

⁹Kiruubeti bantta qefiyaa denttidi, atto giyo sohuwaa kammiyo qum77uwaa bantta qefiyan kuwayi wottidosona; qassi issoi issuwaakko simmi uttidi, qum77uwaa xeelloosona.

¹⁰Qassi zananai naa77u wara, gomppai issi wara, geesaikka issi waranne bagga gidido xaraphpheezaa guuganttaappe medhdhiis.

¹¹Medhdhidi walahi bainna worqqan sheeshshiis. Yuushuwaakka worqqa tigettaa yuushshi aattiis.

¹²Hegaadankka, gomppai takkaaro gidiya shaashiyaa a bolli yuushshi aattiis. Yaatidi a bolli worqqaa tigettaa yuushshiis.

¹³Yaatidi Taabootaa tookkanau giigiya oiddu worqqa sagaayota medhdhiis; medhdhidi oiddu gedeti merettido oiddu zoozetuura oittiis.

¹⁴Xaraphpheezaa tookkanau kasota aattiyo sagaayoti xaraphpheezau shaashiyaa lanqqiyan shiiqidi merettidosona.

¹⁵Xaraphpheezaa tookkiyo kasotakka guuganttaappe kessidi, worqqan sheeshshiis.

¹⁶Hegaadankka, xaraphpheezaa bolli wottiyo dumma dumma miishshata walahi bainna worqqaappe medhdhiis; hegeetikka sainetanne cilppata, qassi ushshaa yarshshuwaa tigiyo keretanne xuu7ata.

¹⁷Hegaappe guyyiyan Baxaali7eeli xomppiyaa wottiyo ballaa qoxettida walahi bainna worqqaappe medhdhiis; he ballaa essiyo gediyaakka, giddo toomaakka qoxxido worqqaappe medhdhiis. A qururuusota, a kukkumotanne a ciishshata ubbaa aara issippe oittidi medhdhiis.

¹⁸Miyyiyaara usuppun marata medhdhiis; marata heezzaa issi baggaara, qassi heezzaa hankko baggaara kessiis.

¹⁹Usuppun maratussikka huuphiyan huuphiyan issi issi kukkumoinne ciishshati de7iyo lauziyaa ciishshaa milatiya wanccaa medhdhiis;

²⁰xomppiyaa wottiyo ballaassi giddo toomai, kukkumotinne ciishshati de7iyo lauziyaa ciishshaa milatiya oiddu wanccan alleeqetti uttiis.

²¹Naa77ai naa77ai issippe waattan de7iyo heezzu maratuppe garssaara issi issi kukkumoi meretti uttiis.

²²Kukkumotinne marati ubbai xomppiyaa wottiyo ballaara issippe oiqetti issuwaa gididi, walahi bainna worqqaappe qoxettidi merettidosona.

²³I qassi xomppiyaa wottiyo ballau laappun xomppeta, xomppiyaa toissiyo qaphetanne eta wottiyoobata walahi bainna worqqaappe medhdhiis.

²⁴Xomppiyaa wottiyo ballaanne an go7ettiyo miishshaa ubbaa medhdhanau hasttamanne ichchashu kilo giraame gidiya walahi bainna worqqaa wurssiis.

²⁵Hegaadankka, qassi ixaanaa cuwayiyo saaxiniyaa guuganttaappe medhdhiis. Ayyo oiddu zoozee de7ees; zananai issi wara; gomppai issi wara, geesai naa77u wara. A kacetikka aara issuwaa gididi oiqetti merettidaageeta.

²⁶Ayyo bolla doonaa, oiddu miyye ubbaanne a kaceta walahi bainna worqqan sheeshshidi, a yuushuwaakka worqqaa tigettaa yuushshi aattiis.

²⁷He worqqaa tigettaappe garssaara ixaanaa cuwayiyo saaxiniyaayyo worqqaappe naa77u sagaayota medhdhiis; yaatidi ya baggaaranne ha baggaara naa77aa naa77aa oittiis. Hegeeti tookkiyo wode kasota aattanau maaddanaassa.

²⁸Kasota guuganttaappe kessidi, eta worqqan sheeshshiis.

²⁹Qassi geeshsha tiyettiyo zaitiyaanne sawuwaa tonggu giya lo77o ixaanaa shittuwaa oottiyo eran giigissiis.