Exodus 25

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

¹LEUM GOD El fahk nu sel Moses,

²“Fahk nu sin mwet Israel elos in orek mwe sang nu sik. Eis ma nukewa ma mwet uh insewowo in sang.

³Mwe sang inge ku in gold, silver, ac osra bronze;

⁴linen srik eoa; unen sheep ma tuhn folfol, sroninmutuk, ac srusra; nuknuk orekla ke unen nani;

⁵kulun sheep mukul ngosla srusra; kulun kosro fisrasrsrasr; sak acacia;

⁶oil nu ke lam; mwe keng nu ke oil in akmusra ac nu ke mwe kisa keng;

⁷eot onyx ac eot saok pac saya, in sang nawela nuknuk lun Mwet Tol Fulat su pangpang ephod, oayapa nuknuk mwe loeyuk iniwa se.

⁸Mwet uh fah oru sie Lohm Nuknuk Mutal nu sik, tuh nga in ku in muta inmasrlolos.

⁹Orala lohm sac, wi koanon lohm an, in fal nu ke lemlem su nga ac fah akkalemye nu sum.

¹⁰“Orala sie tuptup ke sak acacia, inch angngaul limekosr lusa, inch longoul itkosr sralap ac longoul itkosr fulata.

¹¹Nokomla acn loac ac lik ke gold nasnas, ac kom fah orala sie patun ke gold rauneak.

¹²Orala akosr ring in tou ke gold, ac oakiya nu ke nia akosr kac, ring luo ke kais sie siska lac lac.

¹³Orala srenenu lukwa ke sak acacia ac nokomla ke gold

¹⁴ac isongang nu ke ring ma oan sisken Tuptup an.

¹⁵Srenenu inge fah oanna in ring uh, ac in tiana itukla liki.

¹⁶Na filiya in Tuptup uh eot tupasrpasr luo ma nga ac sot nu sum, su ma sap uh simla oan fac.

¹⁷“Orala sie mwe afyuf ke gold nasnas, inch angngaul limekosr lusa ac longoul itkosr sralap.

¹⁸Orala luo cherub ke gold tuktuki,

¹⁹sie in oan tafu ac ma se ngia oan tafu. Cherub inge in orekla ipin na mwe afyuf sac

²⁰ac in ngetani nu sie fac, ac posohksok laltal in elakelik ac afinya mwe afyuf sac.

²¹Filiya eot tupasrpasr luo uh in Tuptup uh, ac sang mwe afyuf sac nu fac.

²²Nga ac fah osun nu sum ke acn se inmasrlon cherub luo ah ma muta lucng liki mwe afyuf sac, na liki acn se ingan nga ac fah sot nu sum ma sap nukewa luk nu sin mwet Israel.

²³“Orala sie tepu ke sak acacia, inch tolngoul onkosr lusa, inch singoul oalkosr sralap ac inch longoul itkosr fulata.

²⁴Nokomla ke gold nasnas ac sang sie patun gold rauneak.

²⁵Kuhlasak fac ah ke sie patun inch tolu fulata, ac sie mwe naweyuk gold in oan fin patun sac.

²⁶Orala akosr ring in tou ke gold, ac oakeang nu ke sruwasrik akosr, yen ma nia uh oan we.

²⁷Ring ma srumasriyen srenenu ke tepu uh in oakwuki apkuran nu ke patun se fin tepu uh.

²⁸Srenenu nu kac in orek ke sak acacia, ac nokomla ke gold.

²⁹Orala plate, cup, sufa, ac pol in orekmakinyuk ke pacl in kisa wain. Ma inge nukewa in orekla ke gold nasnas.

³⁰Tepu sac fah filiyuki mutun Tuptup in Wuleang, ac bread mutal ma kisakinyuk nu sik fah oan fin tepu uh pacl nukewa.

³¹“Orala sie nien lam ke gold nasnas, in oana luman sak soko. Orala srupo an ac kapu an ke gold tuktuki. Ipin gold se na ma sang orala srupo ah in pa sang orala ros motul ac ros fareng, mwe naweyuk nu kac.

³²Orala lah onkosr kac — tolu ke la, tolu ke la.

³³Kais sie lah onkosr inge fah oasr ros in yun tolu kac, ma oana ros almond. Oru kutu in ros motul ac kutu ros fareng.

³⁴Srupo ke nien lam uh in oasr ros in yun akosr kac ma oana luman ros almond, kutu in ros motul ac kutu in ros fareng.

³⁵Enenu in oasr sie ros motul ke yen kais luo lah inge kupasreni nu ke srupo soko ah.

³⁶Nien lam uh, wi ros motul mwe naweyuk, ac lah kac ah — nufonna in orek ke ipin gold nasnas sefanna ma tuktuki.

³⁷Orala lam itkosr nu ke nien lam uh, ac oakiya in tolak acn meet.

³⁸Oru mwe kosrkosr wik ac ahlu nu kac ke gold nasnas.

³⁹Paun itngoul limekosr ke gold nasnas pa in sang orala nien lam uh wi kufwa inge nukewa.

⁴⁰Karinganang in orala fal nu ke lemlem su nga fahkak nu sum fineol uh.