Duku 5:7-38

⁷Kɛ̀ bɛ̀ɛ pɑsìrì bɛ nɛ́pobɛ̀ bɛ̀ɛ̀ bo kudɑbɛkù tɛkù kɛ dɔ̀ bɛ̀ɛ kɔtɛní kɛ́ bɛ̀ teennɛ̀, kɛ̀ bɛ̀ɛ kɔtɛní kɛ́dɛi siyĩĩ kɛ́píɛ ntidɑbɛɛtì tìdɛ́tì kɛ̀ ti ndɔ́ kɛ́diu.

⁸Simɔɔ Piɛri dɛ̀ yɑ̀ dìì mɔ̀nnì kɛ́nínkoo Yesu ììkɛ̀ kɛ dɔ̀: N Yiɛ̀ bɑ́ n tɔ́ɔ́nnɛ̀, n tú onitiyɛiwe nwe.

⁹Kɛ yɛ̃́ kufɔ̃wɑɑ́ nhò ɑutɛ́mɛ̀ nɛ̀ o nɛ́pobɛ̀ bɛ̀ pĩ nsìì yĩĩ kpɛ́í.

¹⁰Kɛ̀ Isɑku nɛ̀ Isɑ̃ɑ̃ Sebedee kó ibí Simɔɔ nɛ́pobɛ̀ kpɛrɛ múnkɛ mmɛ ndò, kɛ̀ Yesu nɑ́kɛ́ Simɔɔ kɛ dɔ̀: Bɑ́ nyĩɛ̃̀kù, di mmɔ̀nnì ɑ yó ntú onitiwɑntì nwe.

¹¹Kɛ̀ bɛ̀ɛ kɔtɛnɛ̀ bɛ dɑbɛɛtì mɛniɛ nnùù kɛ́ dɛ ntì yóu kɛ́tũnnɛ Yesu.

¹²Diyiè mɑrì kɛ̀ Yesu mbo dihɛì miɛkɛ, kɛ̀ dikɔ̀nnì mɑrìi kɔtɛní o borɛ̀, kɛ́nínkóo o ììkɛ̀ kóò bɑ́ntɛ̀ kɛ dɔ̀: Okótì kɑ̀ɑ dɔ́ ɑ bo nɑ kɛ́ m miɛkùnnɛ, kɛ́ n wénkùnnɛ.

¹³Kɛ̀ Yesu youtɛ o nɔ̀ùtɛ̀ kɛ́ dì kɑ̀ɑ́kɛ́ kɛ dɔ̀: N dɔ́mu, ɑ́ wenkɛ. Dɛndɛ bɑ̀mbɑ̀ kɛ̀ tikɔ̀ntìi deè kòo miɛtɛ́ kɛ́wenkɛ.

¹⁴Kɛ̀ Yesu o cɑu nweti weti kɛ dɔ̀: A bɑ́ɑ́ nɑ́kɛ́ òmɔù, ɑ nɛ́ kɔtɛ kɛ́bɛnkɛ ɑmɑ́ɑ̀ ikuɔ́ nìùtì kɛ́dɔɔ̀ Mɔyiisi kuɔ́ pɑ́tíri yɛ̃mmɛ̀, kɛ̀ dɛ̀ɛ bɛnkɛ bɛnìtìbɛ̀ bɛmɔu ɑ miɛtɛ́mɛ̀.

¹⁵Dɛ mɔ̀nnì kɛ̀ Yesu yètìrì nɛ́ dɔkɛ pitɛ́ kɛ̀ bɛnìtìbɛ̀ nkɔrìní o borɛ̀ kɛ bo keè o nɑ́ɑǹtì kòo bɛ̀ miɛkùnnɛ.

¹⁶Kɛ̀ Yesu nɛ́ ítɛ́ kɛ́kɔtɛ omɑ́ɑ̀ borɛ̀ kɛ́mbɑ́ɑ́ nKuyie.

¹⁷Diyiè mɑrì kɛ̀ Yesu ntiè mbɛnìtìbɛ̀, kɛ̀ Fɑdisĩɛ̃bɛ nɛ̀ ikuɔ́ wɑ̃ɑ̃̀bɛ̀ bɛ̀ɛ̀ bo Kɑdidee nɛ̀ Sudee nɛ̀ Sedisɑdɛmmu, kɛ̀ bɛ̀ kɔkɛ́ dɛ miɛkɛ, kɛ̀ Kuyie nkó muwɛ̃rímú ò bonɛ̀ kòo miɛkùnko bɛmuɔmbɛ.

¹⁸Kɛ̀ bɛ̀mɑbɛ̀ɛ tuɔkɛní kɛ tɔ kuhɔ̀ùkù, kɛ̀ kù duɔ́ ku dɔ́ù ĩ́nkɛ̀, kɛ̀ bɛ̀ nwɑnti bɛ̀ bo yĩ́mɛ̀ kɛ́ kù tɑnnɛ́ kɛ́dɔú nYesu ììkɛ̀.

¹⁹Bɛ̀ í nnɑ nɛ̀ ditĩ̀nnì, kɛ́yóu, kɛ́dekɛ, kɛ́duutɛ timùmmùntì Yesu berí ndɛ̀, kɛ́ kù cṹũnko bɛnìtìbɛ̀ cuokɛ̀, kɛ́dɔú nYesu ììkɛ̀.

²⁰Kɛ̀ Yesu nwúó mbɛ̀ tɑ̃́mɛ̀ kɛ dò nhò bo kù miɛkùnnɛ, kɛ́ kù nɑ̀kɛ́ kɛ dɔ̀: N dɑ cĩ̀ɛ̃́mmu ɑ yɛi.

²¹Fɑdisĩɛ̃bɛ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ ntoti bɛ yɛ̀mmɛ̀ kɛ tú: Wenni nwe yie nkòo nɑ̀ɑ́ mmiɛ nkɛ cɑɑ̀ri Kuyie nyètìrì? We mbo nɑ kɛ́cĩ́ɛ̃́ mmɛyɛi nkɛ̀ dɛ̀ í tú Kuyie mmɑ́ɑ̀.

²²Kɛ̀ Yesu bɑntɛ́ bɛ yɛ̀mmɛ̀, kɛ́ bɛ̀ bekɛ kɛ dɔ̀: Dɛ̀ dòmmɛ kɛ̀ di toti di yɛ̀mmɛ̀ miɛ mbotí?

²³Ɔ̃ndɛ í yóù nɛ̀ dɛtɛrɛ̀, m bo yĩ́mɛ̀ n dɑ cĩ̀ɛ̃́ nhɑ yɛinɑɑ, kɛ̀ m bo yĩ́mɛ̀ ítɛ́ kɛ́kétɛ́?

²⁴Dɛ̀ nɛ́ bo yiemmɛ̀ kɛ̀ di bɑntɛ́ kɛ dò Onìtìbirɛ mɔkɛ muwɛ̃rímú kɛtenkɛ̀ ĩ́nkɛ̀ kɛ bo nɑ kɛ́cĩ́ɛ̃́ mmɛyɛi m bo yĩ́: Ítɛ́ kɛ́túótɛ́ ɑ dɔ́ù kɛ́kò!

²⁵Kɛ̀ kù pɑ̃̀nkɛɛ ítɛ́ bɛnìtìbɛ̀ ììkɛ̀, kɛ́túótɛ́ ku dɔ́ù, kɛ́nkũnti kɛ sɑ̃ntí Kuyie.

²⁶Kɛ̀ dɛ̀ɛ bɛ̀ di bɛmɔu, kɛ̀ bɛ̀ɛ depɛ Kuyie nkɛ́ nkù sɑ̃ntí, kɛ nɑ́ɑ́ nkɛ tú: Ti yɑ̀ yíe ndɛ̀mɑrɛ̀ cɑ̀nnɛ̀.

²⁷Kɛ̀ Yesu ítɛ́ dɛborɛ̀ kɛ́mpɛ̃nkɛ́ kɛ́yɑ̀ odɑ̀mpóòcɔutíwè mɔù kòo yètìrì tú Defii kòo kɑ̀ri bɛ̀ yietì tɛ̀ɛ̀ cĩ́ɛ̃̀tɛ̀ dɑ̀mpóò kòo ò yu kɛ dɔ̀:

²⁸N tũnnɛ! Kɛ̀ Defii yóu dɛmɔu kɛ́ítɛ́ kóò tũ̀nnɛ.

²⁹Dɛ kó difɔ̃nkúò kɛ̀ Defii bénnɛ́ tidiitì kɛ́yú Yesu kɛ̀ bɛdɑ̀mpóòcɔutíbɛ̀ nɛ̀ bɛnìtìbɛ̀ tɔbɛ̀ pɛ́u kɛ̀ bɛ̀ nwɛ̃ nkɛ yo.

³⁰Kɛ̀ dɛ̀ɛ yonkɛ Fɑdisĩɛ̃bɛ nɛ̀ ikuɔ́ wɑ̃ɑ̃̀bɛ̀ kɛ̀ bɛ̀ɛ bekɛ Yesu tɑncɔ́ùmbɛ̀ kɛ dɔ̀: Dɛ̀ dòmmɛ kɛ̀ di wɛ̃ńnɛ̀ bɛdɑ̀mpóòcɔutíbɛ̀ nɛ̀ mufòmmu yɛimu yɛmbɛ̀ kɛ̀ di yo nkɛ yɔ̃?

³¹Kɛ̀ Yesu bɛ̀ tɛ̃̀ńnɛ́ kɛ dɔ̀: Dɛ̀ í tú bɛ̀ɛ̀ kɔ̃̀ntì nɑɑti bɛɛ̀ wɑɑ̀ nhotɑ̀ntì, bɛmuɔmbɛ bɛɛ̀ ò wɑɑ̀.

³²N yí kɔ̀tɛní kɛ bo yú bɛ̀ɛ̀ yɛ̀mmɛ̀ dò mbɛ̀ wenni, n kɔ̀tɛní kɛ bo yú bɛnitiyɛibɛ mbɛ kɛ̀ bɛ̀ɛ ceetɛ bɛ fòmmu.

³³Kɛ̀ bɛnìtìbɛ̀ mɑbɛ̀ɛ bekɛ Yesu kɛ dɔ̀: Dɛ̀ dòmmɛ kɛ̀ Isɑ̃ɑ̃-Bɑtiisi tɑncɔ́ùmbɛ̀ nɛ̀ Fɑdisĩɛ̃bɛ kɔbɛ bou dinùù kɛ bɑ́ɑ́ nKuyie nsɑ̃́ɑ̃̀ kɑ̀ɑ kɔbɛ biɛ yo nkɛ yɔ̃̀?

³⁴Kɛ̀ Yesu bɛ̀ tɛ̃̀ńnɛ́ kɛ dɔ̀: Onìtì tòú dìì mɔ̀nnì o pokù o nɛ́pobɛ̀ bo nɑ kɛ́boú dinùù o bɛ̀ bonɛ̀ dìì mɔ̀nnɑ̀ɑ̀?

³⁵Dɛ kó diyiè kpɑɑnímu kɛ̀ bɛ̀ bo dɛitɛ wèè tòú o pokù, dɛ mɔ̀nnì bɛ̀ bo boú dinùù.

³⁶Kɛ̀ Yesu yíɛ́ kɛ́ bɛ̀ nɑ̀kɛ́ nɛ̀ dinɑ́ɑǹhɑ̃ntírì kɛ dɔ̀: Bɛ̀ ɔ̃ɔ̃ í nkèétɛ́ kuyɑɑ̀pɑ̀nkù kɛ́yɑ́ nkukótíkù ĩ́nkɛ̀, kɑ̀ɑ mɛ̀ dɔ̀ɔ̀, ɑ cɑ̀ɑ̀rɛ̀mu kuyɑɑ̀pɑ̀nkù, dɛ kó dikéè mɛ mbɑ́ɑ́ yie nkɛ́tɑunnɛ̀ kukótíkù.

³⁷Bɛ̀ ɔ̃ɔ̃ í ncũɔ̃́ mɛnɑɑ̀ mbɛ́mmɛ̀ tidɔutì kótì miɛkɛ, kɑ̀ɑ mɛ̀ dɔ̀ɔ̀ tidɔutì bo potɛ kɛ̀ mɛnɑɑ̀ ncɑkɛ nɛ̀ tidɔutì dɛmɔu.

³⁸Mɛnɑɑ̀ mbɛ́mmɛ̀ dò nkɛ́ncũɔ̃̀ tidɔutì pɑ̀ntì miɛkɛ nkɛ.