LUKA 5:7-38

⁷Bena e hekalo, bamodia vanaḡi auta ai idurudia baema. Idia ema, bena vanaḡi ruaosi e honu, mokona e mutu.

⁸Simona Petro ese una kara e itaia, bena Iesu tuina badinai e igo diho, eto, Lohiabada e, egu amo ba raka oho, badina be lau na dika taugu.

⁹Badina be ia mai bamona iboudiai ida e hoa dikadika, unu gwarume e ala dainai.

¹⁰Simona ida e haoda hebouva taudia danu, Iakobo bona loane, Sebedeo natuna, e hoa. Bena Iesu ese Simona e hamaoroa, eto, Basio gari; ini amo ba haoda, taunimanima bavabidia.

¹¹Vanaḡi auruaosi na kone badinai e tudia, bena ḡau iboudiai e rakatani, ia murinai e raka.

¹²Ia na hanua ta lalonai, bena tau ta, kopina idoinai lepra mo, ese Iesu e itaia; bena vairanai e goru diho, e noia eto, Lohiabada e, boma ura, boma haḡoevagu.

¹³Iesu ese imana e toia roro, e daua toho, eto, Na uramu, vada a ḡoeva. Bena lepra tauna vada e ḡoeva.

¹⁴Bena e taravaia, tau ta basine hamaoroa. Ma eto, Aola, hahelaḡa tauna baine itamu, bona haheḡoeva ḡauna, Mose ese e gwauraia heḡereḡerena, ba henia, taunimanima ihadibalaidia.

¹⁵To ia ese harina e piua rohoroho; bena hutuma bada e hebou, iena hereva ikamonaidia bona edia gorere ihanamodia totona.

¹⁶A ia na e raka oho, tano ḡaḡaena ai eha ḡuriḡuri.

¹⁷Dina ta ai, ia na e hahedibava; bona Farisea taudia bona taravatu ihadibalaidia taudia, Galilea hanuadia iboudiai amo bona Iudea amo bona Ierusalem amo, ia dekenai e helai. Bena ia ese Lohiabada siahuna ai gorere taudia e hamauridia.

¹⁸Bena haida ese pada tauna geda ai hekurena ai e huaia lao, ivareailaina dalana e tahua, Iesu vairanai bae atoa eto.

¹⁹A hutuma daidiai ivareailaina dalana ta asie davaria, bena pada tauna mai gedana ida e daelaia, guhi matuna amo e tua dobi Iesu vairanai, hutuma bogaragidiai.

²⁰Ia ese edia abidadama e itaia, bena eto, Tau e, emu dika vada eme hegwau tao.

²¹Itorena taudia bona Farisea taudia e hereva heheni, eto, Ina Dirava e hadikaiamu tauna be daika? Daika dika igwau-taodia mai dibana? Dirava mo sibona.

²²A Iesu na edia lalo-hadai dibana, bena eto, Badina be dahaka lalomui ene o hadai tomamu?

²³Edena be haraga, nato “Emu dika vada eme hegwau tao”, eiava bama toma “A tore isi, a raka”?

²⁴A baina hadibamui Taunimanima Natuna na mai siahuna dika baine gwau tao tanobada ai, (ia ese pada tauna e hamaoroa, eto) Na haḡanimumu, a tore isi, emu geda a lokua, emu ruma aola.

²⁵Bena ia na idia vairadiai e tore isi, ena geda e lokua, ena ruma vada ela, Dirava e imodaia.

²⁶Bena iboudiai e hoa, Dirava e heatolaia mai garidia ida, eto, Hoa karadia hari dina ai tame ita.

²⁷Ia na e raka lasi, bena tax gogo tauna ta, ladana Levi, tax rumana ai helaina ai e itaia; bena e boiria, eto, Murigu ai ame raka.

²⁸Bena ena ḡau iboudiai e rakatani, ia murinai e raka.

²⁹Bena Levi ese Iesu irogonina anianina ena ruma ai e dabaraia; tax gogo taudia hutuma mai bamodia ida idia ida e ege diho.

³⁰Bena Farisea taudia bona itorena taudia ese e maumauraidia, ena hahediba e nanadaidia, eto, Dahaka dainai tax gogo taudia bona kara dika taudia ida o aniani heboumu?

³¹Iesu ese e haere henidia, eto, Goada taudia na muramura tauna basie tahua, a gorere taudia hari;

³²lau danu dia kara maoromaoro taudia iboiridia asinama, a kara dika taudia bae helalo kerehai totona nama.

³³Idia ma eto, Badina be dahaka Ioane ena hahediba e anivaga louloumu, bona e ḡuriḡuri louloumu, bona Farisea taudia edia hahediba danu, a oiemu hahediba e anianimu bona e inuinumu.

³⁴Bena ia ese e haere henidia, eto, Headava matamata tauna na turana dekediai e nohomu ai na ba haduadia bae anivaga, bae kamonai eiava?

³⁵A negana baine gini dae, headava matamata tauna na edia amo baine heabi oho, una negana ai bae anivaga.

³⁶Ina hereva heḡereḡerena danu e henidia, eto, Tau ta ese dabua matamatana seana basine darea, dabua gunana ibanilaina; unu bema kara toma, matamatana bema hedare, bona matamatana seana gunana ida basiema heḡereḡere.

³⁷Bona tau ta ese vine ranuna matamata na kopi gunadia ai basine vedaia; unu bema kara toma, vine ranuna matamata ese kopi bema hapou, bena vine ranuna bema hebubu nege bona kopi danu bema dika.

³⁸A vine ranuna matamata na kopi matamatadia ai bae vedaia, bena ruaosi bae namo.