Duku 21:17-36

¹⁷Bɛnìtìbɛ̀ bɛmɔu bo ndi níí ndi tú mɛ̀ɛ̀ kpɛ́í n kɔbɛ.

¹⁸Di yɔ kó kuyùrìkù kùmɑ́ɑ̀ mɛ mbɑ́ɑ́ feti.

¹⁹Ǹtɛ̃ĩ́nɛ̀, mɛm̀mɛ di bo nɑmɛ̀ kɛ́dɛɛtɛ́ di fòmmu.

²⁰Kɛ̀ di yɑ̀ dìì mɔ̀nnì kɛ̀ bɛhɑ̃ɑ̃pɔ̀mbɛ̀ cɛ̃̀ɛ̃̀tɛ Sedisɑdɛmmu, di bɑntɛ́ kɛ dò nho pɔntimù muù duunní.

²¹Kɛ̀ dɛ̀ sɔ̃́ mbɛ̀ɛ̀ bo Sudee bɛ̀ɛ cokɛ́ kɛ́dekɛ yɛtɑ̃rɛ̀, kɛ̀ bɛ̀ɛ bo Sedisɑdɛmmu miɛkɛ bɛ̀ɛ yɛ̀, kɛ̀ bɛ̀ɛ̀ bo dɛpɑɑ mbɛ̀ bɑ́ɑ́ konní dihɛì.

²²Kuyie nkó tiyɛ̃ĩti kó yɛwe nyɛ, kɛ̀ dɛ̀ bo dɔɔ̀ tì wɑ̃̀ri kɛ yɛ̃mmɛ̀.

²³Dɛ̀ bo nyóùnɛ̀ bɛnitipòbɛ̀ bɛ̀ɛ̀ bo mpúó nnɛ̀ bɛ̀ɛ̀ tɔ ibí, kɛ yɛ̃́ mɛyɛǹcɑɑ̀rìmɛ̀ diɛmɛ̀ yóó mbomɛ̀ dɛ kó dihɛì miɛkɛ kɛ̀ Kuyie mmiɛkɛ ncɔ́ú ndɛ kó kubotí.

²⁴Bɛ̀ bo kuɔ bɛ̀mɑbɛ̀ nɛ̀ disiè, kɛ́pĩ́mmú bɛtɔbɛ̀ kɛ̀ bɛ̀ɛ nɑɑ́ nyibotí imɔu kó tidɑɑtì, kɛ̀ bɛ̀ɛ̀ í tú Sifubɛ kɛ̀ bɛ̀ɛ pɔntɛ Sedisɑdɛmmu kɛ́dɛ́ítɛ́, kɛ̀ dɛ̀ mmɛ ndò nkɛ kémmúnɛ̀ dɛ kó mɛfíè mbo deèmɛ̀.

²⁵Dɛ mɔ̀nnì dɛ̀mɑrɛ̀ cɑ̀nnɛ̀ bo ndɔɔri, diyiè nɛ̀ otɑ̃̀nkù nɛ̀ siwɑ̃̀ɑ̃ dɛ ĩ́nkɛ̀, dɑ̀mɛ́ɛ̀rì kó kunɑmpoo nɛ̀ o kó kutoweku bo nte kɛ̀ yɛbotɛ̀ yɛmɔu yɛ̀mmɛ̀ɛ cɑɑ̀rɛ̀.

²⁶Kufɔ̃wɑɑ́ ndiɛkù bo pĩ́ mbɛnìtìbɛ̀ nɛ̀ dɛ̀ɛ̀ dɔ̀ɔ̀ri dɛ kpɛ́í, nkɛ yɛ̃́ siwɑ̃̀ɑ̃ diɛsì yóó sɑ̃ntɛ̀mɛ̀.

²⁷Dɛ mɔ̀nnì kɛ̀ bɛ̀ɛ yɑ̀ Onìtìbirɛ, kɛ̀ dɛ̀ cutiní yɛwɛtɛ̀ miɛkɛ nɛ̀ muwɛ̃rímú diɛmù nɛ̀ tikpetì.

²⁸Kɛ̀ dɛ kó mɛdɔɔ̀rìmɛ̀ ketɛ́ dìì mɔ̀nnì di tɛ̃́nkɛ bɑ́ nsĩ́ĩ́, cɑ́tìnnɛ di yɛ̀mmɛ̀ kɛ yɛ̃́ Kuyie nyóó di dɛɛtɛ́mɛ̀ bɑ̀mbɑ̀.

²⁹Kɛ̀ Yesu bɛ̀ nɑ̀kɛ́ kɛ dɔ̀: Wéntɛ́nɛ̀ fìkíè kó dɛtie nnɛ̀ dɛtie ntɛrɛ̀ dɛ kó mɛdonnimɛ̀.

³⁰Kɛ̀ dɛ̀ bitɛ́ dìì mɔ̀nnì di ɔ̃ɔ̃ bɑntɛ́mu kɛ dò ndiyɔ̃ɔ̃̀ tɔ̀ɔ́nní.

³¹Mɛɛ̀ botí nku kɛ̀ di yɑ̀ dìì mɔ̀nnì dɛndɛ kó dimɑ̀ɑ̀ di bɑntɛ́ kɛ dò nKuyie nkpɑ̀ɑ̀tìyuu tɔ̀ɔ́nní.

³²N di nɑ́ɑ́ mmɔ́mmuɔ nwe bɛnìtìbɛ̀ bɛ̀ɛ̀ fòù di mmɔ̀nnì bɛ̀ í yóó kú bɛmɔu, kɛ̀ dɛ̀ mu nyí tuɔ̀kɛní.

³³Kɛĩ́nkɛ̀ nɛ̀ kɛtenkɛ̀ dɛ̀ bo pɛ̃ɛ̃tɛ́, n nɑ́ɑǹtì mɛ mbɑ́ɑ́ pɛ̃ɛ̃tɛ́ bìtì.

³⁴Ǹdɑkɛnɛ̀ kɛ̀ dɛ kó diyiè bɑ́ nyóó tuɔkɛní kɛ sɔ̃́ ndi bo yɛbɑɑ mmiɛkɛ kɛ yɑ̃̀ kɛ muɔ́, nkɛ̀ kutenkù kuu nkó iyɛntotí di nɑ, kɛ̀ dì di dɛ́ɛ́tɛ́,

³⁵ticùɔ̀tì ɔ̃ɔ̃ pĩ́ mmɛ̀ɛ̀ botí sinɔɔ dɛ kó diyiè yóó mɛ ndɛ́ɛ́tɛ́ kutenkù kumɔu kɔbɛ.

³⁶Nwúónnɛ̀ kɛ bɑ́ɑ́ nKuyie nsɑ̃́ɑ̃̀ kɛ́mmɔkɛ muwɛ̃rímú kɛ́nɑ kɛ́yentɛ́nɛ̀ dɛ̀ɛ̀ kó dimɑ̀ɑ̀ yóó tuɔkɛní, kɛ́nɑ kɛ́cómmú Onìtìbirɛ ììkɛ̀.