Luka 21:17-36

¹⁷Imi kamu toiwe bantu bonse ibaka lyezina lyangu.

¹⁸Imi ka kwina nanta lusuki lu mwina lwete nilu shale kumitwi yenu.

¹⁹Kamu haze ihuho zenu kaku kola kwenu.

²⁰Chimwa bona Jerusalema izimbukitwe masole mwizibe kuti kuza kunuka kwayo chiku chunine.

²¹linu, bena kwa Judea batilile ku malundu; Bena mu munzi bazwe mo'imi bena mwi kanda kanji bazwimo, ku bolela ku munzi.

²²Mukuti inako yaku bozekeza bantu bubi bwabo, kuti ziñoletwe zi boneke zose.

²³Bukabo kabwizile banakazi ba lihindite niba nyosa mwao mazuba; ka kuti bukabo bukando ka bube kwa nteni mwi kanda; imi bukali kabu sukile abo bantu.

²⁴Mubawe kabu kali bwe sumo, kaba hapwe batwalwe kubantu bonse, imi jelusalema ka lyatolwe kube kanda mane ba maninine.

²⁵Zisupo kazi boneke hezuba ni mwezi ni nkani; imi mwi kanda mahasi kahwilwe niku njanja kebaka lya mawate ni masunda.

²⁶Bantu kaba zumininine kebaka lyo kutiya niku lindila zete zize mwi kanda; ka kuti zina ziho zo kwi wulu muzi nyanganye.

²⁷Imi kaba bone Mwana wo Muntu heti chokeza mu makope ke ziho ni kanya ikando.

²⁸Izo chizatanga kwiza; mu loleze menso kwi wulu, Imi muinuke; ka kuli kulukululwa kwenu chi kwina hafwihi.

²⁹Cha ba wambila inguli, Chati' mubone i samu lye feiga ni zisamu zimwi.

³⁰Hali tumpa makoba, Imi mwi ziba ni kulemuha kuti imbumbi chiina hafuhi.

³¹Ka mukwa wina bulyo, ne nwe, hamu bona izo chizi keza, mwina no kwi ziba kuti mubuso we Ireeza chi wina hafuhi.

³²Kabuniti ni wamba kwenu, ulu luzubo kete lumane, zonse zi seni ku tendahala.

³³Iwulu kali mane ni kanda bulyo; mi manzwi angu kete ni a mane.

³⁴Imi mu mamele inkulo zenu kanji zi lyanganiswa kulya kwenu, niku kolwa mutoho, niku bilela zo buhalo.

³⁵mane ilyo izuba kali miwane kamu litukise; MU kuti kachiwile bonse bazakite mwi kanda yonse.

³⁶Mi he, mutonde mulapele inako yonse, ili kuti mukole ni kubanduka kwezo zonse zete nizi boneke, ni kwa kwe habusu bwa Mwana Muntu.