BƐBAATÍBƐ̀ 20:7-18

⁷Díndi Isidɑyɛɛribɛ di tìímmu diɛ ndimɔu. Nɑ́kɛ́nɛ̀ kɛ́yɑ̀ di bo yĩ́mɛ̀.

⁸Kɛ̀ bɛ̀ɛ wɛ̃nnɛ́ bɛmɔu kɛ dɔ̀: Ti kóo mɔù í kũnti kɛ bo tɑ o fii yoo o cĩ́ɛ̃̀tɛ̀.

⁹Ti yóó do Kibeɑ kɔbɛ mudoò mmu. Tí tɑ̃ũnnɛ̀ tɛ́tɛ́.

¹⁰Isidɑyɛɛribɛ botí imɔu miɛkɛ kɛ̀ bɛnìtìbɛ̀ bo tɛkɔ̀ùtɛ̀ (100) tí dɛitɛ tɛpíítɛ̀, kɛ̀ bɛ̀ mɛ mbo tɛkɔupíítɛ̀ (1000) tí dɛitɛ tɛkɔ̀ùtɛ̀, kɛ̀ bɛ̀ bo tɛkɔupípíítɛ̀ (10000) tí dɛitɛ tɛkɔupíítɛ̀ (1000), bɛ̀ɛ̀ yó nwɑɑ̀nní tidiitì kɛ duɔ̀ mbɛ̀ɛ̀ kɔ̀ri kɛ bo do Kibeɑ kɛ́pɛitɛ Bɛnsɑmɛɛ botí kɔbɛ dɔ̀ɔ̀ ìì sɔkɛ Isidɑyɛɛribɛ cuokɛ̀.

¹¹Kɛ̀ Isidɑyɛɛribɛɛ wɛ̃nnɛ́ dinùù dìmɑ́ɑ̀ kɛ bo kɔtɛ kɛ́do Kibeɑ.

¹²Kɛ̀ Isidɑyɛɛribɛ botí imɔu kɔbɛɛ tɔ̃ nkɛ̀ bɛ̀ɛ nɑ́kɛ́ Bɛnsɑmɛɛ botí kɔbɛ kɛ dɔ̀: Yé dɛ̀ yĩ́mɛ̀ kɛ̀ di dɔ̀ɔ̀ isɔkɛ iì mbotí di cuokɛ̀?

¹³Tí duɔ́nnɛ̀ Kibeɑ ɛì kó itokperì yɛmbɛ̀, kɛ̀ ti bɛ̀ kùɔ, kɛ́dɛitɛ mɛyɛi nyIsidɑyɛɛribɛ cuokɛ̀. Bɛnsɑmɛɛ botí kɔbɛ mɛ nyí nyie nkɛ kèńtɛ́ bɛ tebìí Isidɑyɛɛribɛ nɑ̀ɑ́ ntì,

¹⁴kɛ́wɛ̃nnɛ́ bɛ ɛkɛ̀ yɛmɔu kɛ́tíí nKibeɑ, kɛ bo dokɛ́nɛ̀ Isidɑyɛɛribɛ.

¹⁵Dɛ yiè kɛ́wɑɑ́ mbɛhɑ̃ɑ̃pɔ̀mbɛ̀ sikɔupípísìdɛ́ nɛ̀ sikɔupísìkuɔ̀ (26000) bɛ ɛkɛ̀ tɛyɛ̀ kɔbɛ kɛ́mbúútí Kibeɑ ɛì kɔbɛ, bɛ̀ɛ̀ nɔ mmudoò mɛsɑ̀ɑ̀ nkɛ̀ bɛmbɛ mbo sikɔusìyiekɛ̀ (700).

¹⁶Dɛ kó bɛhɑ̃ɑ̃pɔ̀mbɛ̀ bɛmɔu kɛ̀ yɛcɑ̃̀nkuyɛ̀ mbo sikɔusìyiekɛ̀ (700) kɛ nɔ mmudoò mɛsɑ̀ɑ̀. Bɑ́ kɛ̀ kuyùrìkù bo kumɑ́ɑ̀ kòò dootɛ́ ditɑ̃́rì ò bɑ́ɑ́ kù nɔ̀ɔ̀.

¹⁷Isidɑyɛɛribɛ kó ditĩ̀nnì kɛ̀ bɛmbɛ mɛ mbo bɛhɑ̃ɑ̃pɔ̀mbɛ̀ sikɔupíkɔ̀ùsìnɑ̀ɑ̀ (400000) bɛ̀ɛ̀ nɑ mudoò kɛ deè.

¹⁸Kɛ̀ Isidɑyɛɛribɛɛ kɔtɛ Betɛɛdi kɛ bo beé nti Yiɛ̀ nKuyie nkɛ́yɑ̀ bɛ̀ botí miɛkɛ kùù dò nkɛ́niitɛ́ kɛ̀ bɛ̀ɛ kɔtɛ kɛ́dokɛ́nɛ̀ Bɛnsɑmɛɛ botí kɔbɛ. Kɛ̀ ti Yiɛ̀ nKuyie ndɔ̀: Sudɑɑ botí kɔbɛ bɛɛ̀ dò nkɛ́niitɛ́.