Soukapwüng 20:7-18

⁷Ämi aramasen Israel meinisin mi mwichfengen ikei, oupwe pwüngüpwüngfengen o apasätä pwüngün ei mettoch.”

⁸Iwe, ekewe aramas meinisin ra ütä fän tipeeu o apasa, “Esap wor eman leich epwe feila lon imwan, esap fokun wor eman leich epwe liwiniti lenian.

⁹Iei usun mine sipwe föri ngeni Kipea: Sipwe feila o maun ngeni Kipea fän pwüngün üttüt.

¹⁰Iwe, sipwe filätä engol mwän seni ipükü me lein ekewe ainangen Israel meinisin, pwal ipükü mwän seni engeröü, nge engeröü mwän seni engol ngeröü, repwe uwato mongö fän iten ekewe aramas mi feila pwe repwe maun ngeni chon Kipea lon Peniamin, pokiten ewe föför mi fokun ngau ra föri lon Israel.”

¹¹Iei usun ekewe re Israel ra chufengen fän tipeeu pwe repwe maun ngeni ewe telinimw.

¹²Iwe, ekewe ainangen Israel ra tinala ekoch mwän ren unusen ewe ainangen Peniamin pwe repwe üreniir, “Met ei sokun föföringau a fis me leimi?

¹³Oupwe fangewu ekewe mwän mi manauangau seni Kipea, pwe aipwe nirela o atowu ewe mi ngau seni lon Israel.” Nge chon ewe ainangen Peniamin resap mochen aüselinga alon pwiir kewe aramasen Israel.

¹⁴Iwe, chon ewe ainangen Peniamin ra feito seni ar kewe telinimw o chufengen lon Kipea, pwe repwe feila maun ngeni ekewe aramasen Israel.

¹⁵Iteiten chon ewe ainangen Peniamin mi kö ngeni maun ra feito seni ar kewe telinimw lon ewe ränin ükükün rüe me wonungeröü mwän mi sile maun fän ketilas. Mi pwal wor ükükün füpükü mwän seni Kipea mi kefil.

¹⁶Iwe, me lein ekewe mwän meinisin mi wor füpükü tamöng mi kefil. Iteiten eman me eman a tongeni monei eföü fau ngeni emet meten mökür, nge a küw.

¹⁷Nge lükün ekei re Peniamin mi wor ükükün föpükü ngeröü mwän seni ekewe re Israel, ir meinisin sounfiu mi sile maun fän ketilas.

¹⁸Iwe, ekewe aramasen Israel ra feila Petel o aisini Kot, “Iö me leim epwe akomwen feila maun ngeni chon Peniamin?” Nge ewe Samol mi Lapalap a pälüeniir, “Chon ewe ainangen Juta repwe akomwen feila.”