Mumutara Ŋic 20:7-18

⁷Manaŋgopieŋ, Israe ŋic sasawa ŋoŋe muc manac ehuc iŋuc me iŋuc ezo i ʒiŋuczia mupaŋkeniŋ.”

⁸Eme ŋic sasawa jaŋe maŋ mocjaha ehuc ʒiŋuc mumbiŋ: “Nâŋâcnaonec moczi fic hae‐ticnao moc mi risie‐jâmbâŋkezejec.

⁹Nâŋâc Gibea hae râsi fisicnenaŋte Anutu wiocnepene eki mutâcne‐nâreocmu irec sâc enʒepeneŋ.

¹⁰Nâŋâc momori 100 jaŋere nânâ roniŋte ŋic 10 â wâŋ tauseŋ jaŋere 100 â 10 tauseŋ jaŋere tauseŋ iŋuc rowosâec‐jopapene ranʒepieŋ. Eme momori jaŋe Benjamiŋte guru jaŋere hae Gibea ira ferâ okacne bazucnenʒepieŋ. Jaŋe Israe guruo hata bâsifuckehuc wiac sindaŋne embiŋ hâcne.”

¹¹Ehame Israe ŋic jaŋe Gibea hae râsi fisicneniŋte tumaŋnehuc maŋ mocjaha embiŋ.

¹²Eme Israe ŋic guru gâcne sâko jaŋe Benjamiŋte guru jaŋerao dâŋ ʒiŋuc muhuc râepie rafârewec: “Wiac mamakâcnezi ŋoŋere ŋondeŋko fuarâ fokac.

¹³Irec ŋoŋe Gibea haeo ŋic hehesicne juŋgopieŋ jaŋere dâŋ mutarapie jopanaŋ. Ehuc Israe guruo wiac repicne fokac i bârârienaŋ.” Iŋuc jazapie Benjamiŋte guru jaŋe Israe ŋic âgofâc‐jeŋic jaŋere dâŋ mi reŋkembiŋ.

¹⁴Iŋuc ehuc Benjamiŋte guru jaŋe hae‐jeŋickonec Israe ŋic guru gâcne sâko jaŋehec ʒika qaniŋte Gibea haeo tumaŋnembiŋ.

¹⁵Eme Benjamiŋte guru jaŋe hae‐jeŋickonec ʒikahec faharekupie ŋic 26 tauseŋ ewec. I Gibea hae rune mi wosec‐jopakicne. Jaŋe ine ŋic qac momorihec 700 rowosâec‐jopambiŋ.

¹⁶Erâ guru‐jeŋickonec ŋic 700 rowosâec‐jopambiŋ jaŋe hâcne mejeŋic qaqana. Jaŋe qânâ moc tacbaŋko râerâ qapie qizec susuc mi ririocmu.

¹⁷Ehame Benjamiŋte guru jaŋe tâmiric Israe ŋic guru gâcne sâko jaŋeraonec sawa momori ŋic ʒika‐jeŋichec 400 tauseŋ baʒawiec‐jopambiŋ.

¹⁸Iŋuc erâ Israe ŋic jaŋe Bete haeo ferâ Anutu wiocnehuc mumbiŋ: “Nâŋeraonec guru wenimoizi bânie‐nâreme Benjamiŋte guru jopazo fenaŋmu?” Eme Wofuŋzi muwec: “Judare guruzi bâniezejec.”