Annabi Yeremi firin nde 5

1

2

3

4

5

¹Alatala, muxu xa tɔɔrɛ mato, muxu xa yaagi igbɛ!

²Xɔɲɛe bara muxu kɛ tongo. Mixie bara sabati muxu xa banxie kui, muxu kolonmae mu naxee ra.

³Muxu bara findi misikiinɛ babataree ra, muxu ngae bara lu alɔ kaaɲɛ ginɛe.

⁴Muxu mu nɔma muxu xa ye minde, fo muxu xa a sara kɔbiri ra. Muxu mu nɔma muxu xa yege fan gande, fo muxu xa a sara.

⁵Muxu ɲaxankatamae dɔxɔxi muxu fari. Muxu bara tagan, malabui yo mu na.

⁶Muxu bara muxu bɛlɛxɛ itala Misira nun Asiriya biri ra, alako e xa muxu ki taami ra.

⁷Muxu babae bara yunubi raba, kɔnɔ e mu na duniɲa sɔnɔn. Muxu tan nan fa e xa fe kobie tɔruɲɔɛ xaninfe.

⁸Konyie nan fa tixi muxu xun ma, mixi yo mu na naxan muxu bama e yi ra.

⁹Muxu baloe fenma wula i gaaxui kui, barima santidɛgɛma kanyie na yire birin.

¹⁰Kaamɛ bara muxu suxu.

¹¹Muxu yaxuie bara e waxɔnfe raba Siyon nun Yudaya ginɛdimɛdie ra.

¹²E bara kuntigie gbaku wurie ma, e binyɛ ba forie yi.

¹³Fonikee mɛngi dinma, e yege maxanin han yege kote bara bira e ma.

¹⁴Forie bara ba e malanfe, fonikee fan bara ba ɲaxaɲaxafe.

¹⁵Muxu bɔɲɛe bara ba sɛɛwafe, muxu xa xulunyi bara masara sunnunyi ra.

¹⁶Xunnakeli bara ba muxu yi, muxu bara makinikini muxu xa yunubie xa fe ra.

¹⁷Na nan a toxi, muxu bɔɲɛe tɔɔrɔxi, muxu ya fan bara rafɔɔrɔ.

¹⁸Siyon geya bara findi gbengberenyi ra, a bara findi xulumasee maɲɛrɛde ra.

¹⁹Kɔnɔ i tan, Marigi Alatala, i tan nan mangɛ ra tɛmui birin. Danyi mu na i xa mangɛya ma, keli lanfanmae ma, sa dɔxɔ lanfanmae birin na.

²⁰Munfe ra, i fa nɛɛmuxi muxu ma yi mɔɔli ra, ka i muxu rabɛɲinma nɛ muxu xa simaya birin kui?

²¹Alatala, muxu ragbilen i ma, muxu xa fa i ma alɔ a singe.

²²I mɛɛxi nɛ muxu ra kerenyi ra? I xɔnɔma nɛ muxu ma abadan?