1He Nengazen, is-isipa nu ke hengkey is nehitavù kenami. Ahàa nu is nepengkusan dey he kegkepeel-elezi kenami.
2Is menge tanè dey wey is menge valey zey, migkuwa te menge lumelengyawà.
3Nengeilu key, ne nengevalu is menge iney zey.
4Kinahanglan pa he ebpemesahan dey is wahig he ed-inumen dey wey is kayu he idtavun dey.
5Impeterebahu key he iring te menge uyaǥen he mid-eyuǥuwan. Ne kenè key en ibpehimeley.
6Mibpesakup key te menge tig-Ehipto wey menge tig-Asiria su para lang mekekaan key.
7Mibaal te salà is menge kepuun dey he nemematey en guntaan, ne iyan key nerasey tenged te salè dan.
8Menge uripen is midumala kenami ne wazà ebpekepeǥawas kenami puun te ǥehem dan.
9Dutun te kebpen-ehè dey te keenen nemiligru key te ermadu he menge etew ziyà te sibsivayan.
10Edetengen key tenged te subra he kegkevitil, ne is menge lawa zey henduen be te keinit te rapug is keinit din.
11Mibpenlayug is menge esawa zey wey menge anak dey he menge vahi ziyà te Zion wey is diyà te menge inged diyà te Juda.
12Imbitey pinaaǥi te menge velad dan is menge pengulu zey, ne wazè en tehuza is menge meǥurang dey.
13Is menge vetan-en dey he menge maama mibpeǥes ipepenggaling he henduen be te menge uripen, ne is menge vatà ebpemekeurambak en te kebpetianga kandan te meveǥat he menge kayu.
14Is menge meǥurang wazè en mekepinuu ziyà te pultahan te inged te kebeǥey te sambag, ne is betan-en he menge maama wazè en meketukar te menge sunata.
15Wazè dey en kelipey. Kenè key en ebpekesayew, kekenà, ebpekelalew key zà.
16Naawè en is dengeg dey. Mekehizuhizu key su geina te nekesalà key.
17Tenged kayi mibmesakit is gehinawa zey ne mibmerusirem is ked-ehè dey.
18Su mekevulungbulung en is Buvungan he Zion, ne iyan dà edriǥuriǥu kayi is leew he menge asu.
19He Nengazen, midhadì ka te wazà pidtemanan. Is kedhadì nu ebpedayun minsan keenu.
20Maan is layun key kenikew edlipati? Maan is neuǥet en is kedselikwaya nu kenami?
21He Nengazen, ipelikù key ziyà te kenikew ne edlikù key. Ilikù nu zini te kenami is meupiya he kebpekesavuk dey zutun te nehuna he timpu.
22Subre en be is kegkepeuki nu kenami su maan is inselikwey key en kenikew?
