1Yinni Gusunɔ, ɑ yɑɑyo ye n sun deemɑ. A mɛɛrio ɑ wɑ nge mɛ sɑ wɑ̃ɑ sekuru sɔɔ.
2Bɛsɛn tem mɛ ɑ sun wɛ̃ mu kuɑ gɑbugim. Tɔn tukobɑ bɑ wɑ̃ɑ bɛsɛn diɑɔ.
3Bɛsɛn bɑɑbɑbɑ bɑ gu, mɑ bɛsɛn mɛrobu bɑ gɔminiru sɔ̃. Sɑ wɑ̃ɑ tundobu sɑri.
4Gobiyɑ sɑ rɑ kɔsie su sere bɛsɛn tiin dɔkɔn nim nɔ. Gobiyɑ sɑ rɑ mɑɑ kɑ bɛsɛn tem dɑ̃ɑ dwe.
5Wee, bɛsɛn yibɛrɛbɑ bɑ sun yoru diisiɑmɔ. Sɑ wɑsire, bɑ ǹ mɑɑ sun wɛ̃rɑbu wɛ̃ɛmɔ.
6Sɑ Asirigibu kɑ Egibitigibu dĩɑnu kɑnɑ.
7Wee, bɛsɛn bɑɑbɑbɑ bɑ kɔ̃sɑ kuɑ, ɑdɑmɑ bɑ ǹ mɑɑ kɑ sun wɑ̃ɑ. Bɛsɛrɑ sɑ yen wɑhɑlɑ sɔɔwɑ.
8Yobɑ bɑ kuɑ bɛsɛn yinnibu. Goo mɑɑ sɑri wi u koo sun wɔrɑ ben nɔmɑn di.
9Sɑ rɑ bɛsɛn wɑ̃ɑru kɑri bɔriewɑ, domi sɑ rɑ kɑ yibɛrɛbɑ tɑbu kowɑ gbɑburɔ su sere wɑ su di.
10Gɔ̃ɔrun sɔ̃ bɛsɛn wɑsi swĩɑ nge pɛ̃ɛ wɔ̃ɔ yeru.
11Bɑ tɔn kurɔbu kɑ wɔndiɑbɑ gɑbirimɔ Yudɑn tem kpuro sɔɔ kɑ sere Yerusɑlɛmuɔ.
12Bɑ bɛsɛn wirugibu mwɛɛrɑ bɑ soorɑ doke. Bɑ ǹ durɔ tɔkɔnu bɛɛrɛ wɛ̃.
13Bɑ bɛsɛn ɑluwɑɑsibɑ mwɛɛrɑ nge yobu bu kɑ som nɑm. Mɑ bibɑ dɑ̃ɑ gurɑmɔ bɑ wɔrukumɔ yen bunum sɔ̃.
14Bɛsɛn bukurobu bɑ ku rɑ mɑɑ sinɛ bu siribu ko siri yerɔ. Mɛyɑ bɛsɛn ɑluwɑɑsibɑ bɑ ku rɑ mɑɑ womusu ko.
15Bɛsɛn nuku dobu bu kpɑ. Bɛsɛn nuku dobun yɑɑbu gɔsirɑ nuku sɑnkirɑnu.
16Bɛsɛn bɛɛrɛ yɑ kpɑ. Annɑ ɑ wɑhɑlɑ bɑkɑ wɑ torɑ ni sɑ kuɑn sɔ̃.
17Gisɔ sɑ nuki sɑnkire, mɑ sɑ nɔni yĩresu kokumɔ,
18yèn sɔ̃ guu te bɑ mɔ̀ Siɔni tɑ kuɑ bɑnsu, mɑ tɑ kuɑ gbeeku bɔ̃nun wɑ̃ɑ yeru.
19Adɑmɑ wunɛ Yinni Gusunɔ, ɑ sɑ̃ɑwɑ sunɔ. Kɑɑ n bɑndu diiwɑ sere kɑ bɑɑdommɑɔ.
20Kɑɑ n sun deriwɑ n kɑ tɛ? Mbɑn sɔ̃nɑ kɑɑ n sun duɑri sere kɑ bɑɑdommɑɔ.
21Yinni Gusunɔ, ɑ̀ n nɛɛ, su wurɑmɑ wunɛn mi, sɑ ko wurɑmɑ. A de bɛsɛn wɑ̃ɑru tu wurɑmɑ nge yellu.
22Kɑɑ n kɑ sun mɔru bɑkɑ sɑ̃ɑwɑ? Kɑɑ n sun deriwɑ mɑm mɑm?
