1Äm Samol mi Lapalap, kopwe chechemeni mine a fis ngenikem. Kopwe nenengeni o küna äm itengau.
2Fanüem a nonom fän nemenien wasöla, nge ekewe chon ekis ra nom lon leniem.
3Äm aia wiliti chon mäsen, esap wor semem. Inem kewe ra usun chök fefin mi mä pwülüer.
4Äm aia wisen möni ünümem koluk o mönätiu liwinin äm amwüch.
5Ra achouu ngenikem och wosochou o appakem fän wok. Aia malülü, nge resap mwüt ngenikem pwe aipwe asösö.
6Äm aia feila Isip me Asiria o tüngor enem mongö pwe aipwe tongeni manau.
7Äm kewe lewo ra tipis, nge iei resap chüen manau. Nge äm aia mwärelong fän liwinin ar kewe föföringau.
8Chokewe aramas ra nöüniir amanau me lom ra nemenikem. Esap wor eman a angasakem seni fän nemenier.
9Äm aia fangala manauem, lupwen aia kütta enem mongö, pun mi wor chon ni aramas me lon ewe fanüapö.
10Pokiten choun ewe echik ünüchem a pwichikar usun pwichin eu um.
11Ra achomanauei ekewe fefin lon Sion, pwal ekewe föpwül lon ekewe telinimwen Juta.
12Ra forusi ekewe samol, resap meniniti ekewe souakom.
13Ra ariani ekewe alüal pwe repwe föira föün wiich lon ewe lenien föir usun ekewe amanau, nge ekewe ät ra taroporop fän woser mwüch mi chou.
14Ekewe mwän mi chinlap resap chüen mot lon asamalapen ewe telinimw, ekewe alüal resap chüen ettiki ar pisekin ettik.
15Esap chüen wor äm pwapwa lon lelukem. Äm pworuk a wiliti letipeta.
16Esap chüen wor och mine aipwe eingeing won. Feiengauem, pun äm aia tipis.
17Iei popun pwe lelukem a riaföü, nge mesem ra toputopula ren äm kechü,
18pun ewe chuk Sion a tala, ekewe foks ra töfetal won.
19Nge en, äm Samol mi Lapalap, ka King tori feilfeilachök. En kopwe nemenem tori fansoun esemüch.
20Pwota ka manlükikeemila fansoun meinisin? Pwota ka likitikeemila fansoun langatam?
21Äm Samol mi Lapalap, kopwe aliwinikem ngonuk pwe äm aipwe tongeni liwinituk. Kopwe aliwinisefäli lingem usun me lom.
22Ifa usun, ka wesewesen pöütikeemila? Ifa usun, esap wor aükükün om song ngenikem?
