Eoksra 5

1

2

3

4

5

¹O LEUM GOD, esam ma sikyak nu sesr. Liye kut, ac liye lupan mwekinla lasr.

²Acn sesr uh oan inpoun mwet saya; Ac mwetsac elos muta in lohm sesr.

³Papa tumasr elos anwuki sin mwet lokoalok, Ac inge nina kiasr elos katinmas.

⁴Kut enenu in moli kof nimasr; Ac kut moli pac etong nu ke enenu lasr.

⁵Kumakinyuk kut upa, oana donkey ku camel; Kut totola, a tia lela nu sesr in mongla.

⁶Kut ngusr mongo sin Egypt ac Assyria, In suk moul lasr.

⁷Mwet matu lasr elos tuh orekma koluk, tusruktu inge elos wanginla, Ac akkeokyeyuk kut ke ma koluk lalos.

⁸Mwet ma oana mwet foko uh elos leumi kut, Ac wangin mwet ku in molikutla liki ku lalos.

⁹Mwet akmas oalik yen nukewa; Kut pilesrala sensen lasr ke kut ac suk mongo nasr.

¹⁰Masrinsral lasr oru manosr folla ke fever, Nwe ke na kulun manosr fol oana funyu se.

¹¹Sruinkuiyuk mutan kiasr Fineol Zion sifacna, Oayapa mutan fusr natusr in siti srisrik nukewa in acn Judah.

¹²Mwet kol lasr utukla ac loksakeyuki; Ac mwet matu lasr tiana akfulatyeyuk.

¹³Mukul fusr lasr akkohsyeyuk in ilil wheat, Ac tulik srisrik natusr sringelik ye kahp in etong uh.

¹⁴Mwet matu elos tila muta ke mutunpot in siti uh, Ac mwet fusr elos tila orek on.

¹⁵Wanginla engan ke moul lasr; Pacl in tacn lasr uh ekla pacl in asor.

¹⁶Wangin ma lula ke ma nukewa kut yukin meet ah. Kut orekma koluk, ac inge kut muta in ongoiya lulap.

¹⁷Kut maskunak nunak lun insiasr Ac tia ku in liye wo ke sroninmutasr,

¹⁸Mweyen Eol Zion el mukelana oan ac wanginla mwet we, Ac kosro jackal lemnak uh tiltil fin mahnum in acn we.

¹⁹Tusruktu kom, O LEUM GOD, kom tokosra ma pahtpat, Ac kom fah leumi nwe ke saflaiyen pacl uh.

²⁰Efu ku kom siskutla arulana pahtlac? Ya kom ac tiana sifilpa esam kut?

²¹Folokinkutwot nu yurum, LEUM GOD! Folokinkutwot! Folokonak wolana lasr meet ah.

²²Ku fuka, kom siskutla na nwe tok? Ya wanginna saflaiyen kasrkusrak lom uh?