1O Wofuŋ, go fai‐nâŋecko wiac fewec irec manasuc, go ʒâŋe fitec wareme mimi qaqa enârekicne i honec!
2Merâfâc‐nâŋec i ŋic furune jaŋere meo râekicne â fic hae‐nâŋec i ŋic jabane jaŋe rauckembiŋ.
3Nâŋe mamac tâmiric, bekâ mâsiŋ embeŋ juŋgopeneŋ, neŋgocfâc‐nâŋec jaŋe hozec iŋucne.
4Opâ nâeŋgopeneŋ i moneŋzi furine baeŋgopeneŋ â ʒoc wiac‐nâŋec i wâc furinehec.
5Ɋawe‐nâŋecko tagi foha nâpo jâpec eeŋgopieŋ, eme nâŋe docke betaŋ ehuc ŋemanazo mupene mi mana‐nâreeŋgopieŋ.
6Nâŋe nânâ bâfuanaŋte Aigita â Asiria ŋic dape‐jarehuc me sicne‐jarembeŋ.
7Mamacfâc‐nâŋec jaŋe sâqocne barâ omaembiŋ, nâŋe ine kiŋtofa‐jeŋic âsickehuc jueŋgopeneŋ.
8Kiŋaŋ qaqazi ŋicbomboŋ enâreeŋgopieŋ eha moczi moc jaŋere meonec batarac‐nâpoocmu i mi fokac.
9Nâŋe tuhu mâreŋko ʒika fuarâ fokacte juju‐nâŋec qikiŋnezo ehuc nânâ‐nâŋec bâfuarâ roeŋgopeneŋ.
10Eme nânâre hâmo sâqorehuc sahac‐nâŋeczi docke betaŋ efâreekac.
11Râsi jaŋe Zioŋko ŋokac bâsâqorec‐jopambiŋ erâ Juda hae ŋerakac irec naru ʒeŋoŋ jaŋe wâc mâmâc.
12Fekicne jaŋe rocjopahuc bituac‐jopambiŋ â kâcɋene jaŋe ro waha âte ejarembiŋ.
13Ŋicmotec jaŋe ejarepie jacgoŋ babanʒaŋ gie baeŋgopieŋ â motec jaŋe ine ʒoc hâpohapie fâfâc‐jopaekac.
14Micne jaŋe hae ʒoŋao tumaŋnerâ ŋeŋe i behembiŋ â ŋicmotec jaŋe woŋgâŋ mocwâc mi qaeŋgopieŋ.
15Maŋnâŋecte ʒeri bubiaŋ i omaewec â gae wowo‐nâŋeczi rirehame ki mamakuczi fuawec.
16Eridu i qizec‐nâŋeckonec hockerâ wahawec; jei, nâŋe sâqore‐fârembeŋ i!
17Maŋhuc fua‐nârewec â ʒâŋe‐nâŋec hâpozo ewec i wiac kecʒiŋucte:
18Zioŋ tikizi niniŋ siarereŋ fokac â kâte qâto jaŋe ira sicne fotâc eeŋgopieŋ.
19Wofuŋ, go ine guriŋ bapa gie bahuc jucmu sanaŋ, â eri ŋeŋege i ŋic gaŋne gaŋne ŋesanaŋke‐jareocmu.
20Ehame wemocte nâŋere nikecgu sanaŋkekac, erâ wemocte dameŋ ʒora behec‐nâpozo mukomec?
21O Wofuŋ, go gahacnao bârisiec‐nâpoc me! Eme risiepene juju dameŋ‐nâŋec mârâc fowec i heɋâre‐nârec.
22Me go jâmbomac behec‐nâpo sanaŋkemeŋ? Me kimbeŋgezi fai‐nâŋecko boc fofeocte mukic me?
