2. Samueloskero 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Jekh džives o David pes phučľa: “Ačhiľa le Sauloskera famelijatar mek vareko? Kamľomas leske te presikavel prekal o Jonatan o jileskeriben.”

²Le Saul sas sluhas, savo pes vičinelas Cibah. Oles privičinde ko David a phučľa lestar: “Tu sal o Cibah?” Ov odphenďa: “Som tiro služobňikos.”

³O David phučľa: “Na ačhiľa imar le Sauloskere famelijatar ňiko, hoj leske te presikavav le Devleskero jileskeriben?” O Cibah leske odphenďa: “Hin mek ade le Jonatanoskero čhavo, savo hino kaľika pro pindre.”

⁴“Kaj hino?” phučľa o David. “Hino andro Lo-Debar, andro kher le Machiroskero, savo hino o čhavo le Ammieloskero,” odphenďa leske o Cibah.

⁵Akor o David bičhaďa, hoj les te anen andral o Lo-Debar.

⁶Sar avľa ko David o Mefibošet, o čhavo le Jonatanoskero, savo sas čhavo le Sauloskero, banďiľa anglal leste le mujeha. O David zvičinďa: “Mefibošet!” “Ade hino tiro služobňikos,” odphenďa leske.

⁷“Ma dara tut!” phenďa leske o David. “Kamav tuke te presikavel o jileskeriben prekal tiro dad Jonatan. Visarava tuke o maľi pal o Saul tiro papus a furt chaha jekhetane manca pašal miro skamind.”

⁸O Mefibošet banďiľa angle leste a phenďa: “So hino tiro služobňikos, hoj pes visares ke ajso mulo rikono, sar som me?”

⁹Paľis o David vičinďa le Sauloskere sluhas le Cibah a phenďa leske: “Savoro, so sas le Sauloskero the leskera famelijakero, dav le Mefibošetoske, bo hino tiro rajeskero čhavo.

¹⁰Tu, tire čhave the tire sluhi leske kerena buči pre maľa a skidena leske upre o uľipen, hoj te el le Sauloskera famelija, so te chal. Ale o Mefibošet chala pro furt jekhetane manca pašal miro skamind, bo leskero papus sas o Saul.” Le Cibah sas dešupandž (15) čhave the biš (20) sluhi.

¹¹O Cibah phenďa le kraľiske: “Tiro služobňikos kerela sa avke, sar pheneha, rajeja miro the kraľina.” Avke o Mefibošet chalas le Davidoha jekhetane pašal o skamind, avke sar te uľahas jekh le kraľiskere čhavendar.

¹²Le Mefibošet sas terno čhavoro, savo pes vičinelas Michas. Le Ciboskeri calo famelija ačhile služobňika le Mefibošetoske.

¹³O Mefibošet bešelas andro Jeruzalem, bo chalas furt jekhetane le Davidoha pašal o skamind. A ov sas kaľika pro soduj pindre.