2 Samuwela 9

1

2

4

5

6

7

8

9

11

12

13

14

15

16

17

18

19

20

21

22

23

24

¹Lan etega Deibid i nel wana totuwalali elal i ba, “Tab Sol tubutubunina etega iyoho ya i minamina, inoke na atilomwan-an Diyontan ana awatauwan kaiwena?”

²He Sol wana totuwalali etega alana Siba iyoho i gan, inoke hi yogaan i na kin Deibid elana. Yaka i nel i ba, “Owa alam Siba?” Anana i lahe i ba, “E, nau wam totuwalali alau tei.”

³Inoke kin i nel i ba, “Tab Sol tubutubunina etega iyoho ya i minamina, inoke na atilomwan-an ni ola Yabowaine wana atilomwan.” Anana Siba i lahe i ba, “E, Diyontan natuna melutauina etega i gan iyoho, yaa aena labui hi nak, nige bosowaina ni nawanawa bubun.”

⁴Inoke kin i nel i ba, “He iya ga?” Anana Siba i lahe i ba, “Iya iyoho Amiyel natuna Makil wana limiya panuwa Lo-Debal.”

⁵Inoke kin Deibid wana totuwalali i patunal hi na hi ahem Lo-Debal ge hi pwatanim elana.

⁶Sauga Mepiboset, iya Diyontan natuna ge Sol tubuna, i na Deibid elana, yaka i kululu maninina i pahanalowanek bilibiliya. Inoke Deibid i baek elana i ba, “Ateu owa Mepiboset!” Anana i lahe i ba, “Nau wam totuwalali.”

⁷Yaka Deibid i ba, “Bahi nu lolovakun, kaiwena nasi na atilomwan-agiwa tamwam Diyontan ana awatauwan kaiwena. Inoke bilibili gegewena toto valila i minaa tubum Sol eliyana na pewa eliyam, ge owa sauga gegewena nu aanana no teibola.”

⁸Yaka Mepiboset i kululu ge i baek Deibid elana i ba, “Nau gamagal bwagabwaga ya, ya ola ya te wanuka alialigana, inoke ga i ola ge u atilomwan-agau?”

⁹Inoke kin Deibid Siba i yogaan ge i baek elana i ba, “Bugul gegewena toto valila i minaa Sol ge ana un elal, iyaka ya pek wam tonowak tubuna Mepiboset elana.

¹⁰Owa alomwau natumwau ge wam totuwalali bilibili nuku eyowaan, yaka enowana nuku pwatanim wam tonowak tubuna Mepiboset kaiwena. Ge iya sauga gegewena ni aanana no teibola.” He Siba natunau bolau ali gewi piptin (15) ge wana totuwalali ali gewi tuwenti (20).

¹¹Yaka Siba i baek elana i ba, “No babala ge no kin, nau wam totuwalali hauna ebo nu baunan nasi na ginol.” Inoke sauga o ge i nok Mepiboset i aanana Deibid wana teibola i ola natuna etega.

¹²Mepiboset natuna geman etega i gan alana Mika. Inoke sauga o ge i nok, Siba alonau wana limi ana heniheni gegewel hi totuwalali Mepiboset elana.

¹³Iya i miminaa Yelusalema ge sauga gegewena i aanana kin wana teibola. He aena labui hi nak nige bosowaina ni nawanawa bubun.