1Fɑlisɑnɑɑ nɩɩwɑ sɩ Yesu hikiɣi tǝŋlɑɑ nɑ ɩ́ sɔɔkɩ-wɛɣɛ Ɩsɔ lʋm nɑ pǝ́ kǝlǝɣɩ Yohɑɑnɩ.
2Pǝ́cɔ́ pǝ tɑɣɑ Yesu mɑɣɑmɑɣɑ sɔɔkɑɣɑnɑ-wɛɣɛ Ɩsɔ lʋm, ɑmɑ ɩ ɩfɑlɑɑ kɛ́.
3Yesu kɔmɑ nɑ ɩ́ nɩɩ sɩ Fɑlisɑnɑɑ nɩɩ mpʋ, ɩlɛnɑ ɩ́ kʋlɩ Yutɑ tɛtʋ tɑɑ nɑ ɩ́ mǝnnɑ Kɑlilee tɛtʋ tɑɑ.
4Nɑ pǝ wɛɛ sɩ Sɑmɑlii nyǝŋkʋ kɛ ɩ́ tǝŋ.
5Ḿpʋ́ɣʋ́ Yesu wʋsǝnɑ Sɑmɑlii ɩcɑtɛ nɑtǝlɩ nte pɑ yɑɑ sɩ Sikɑɑ tɔ, nɑ tǝ kpǝtǝnɑ tɛtʋ nti Yɑkɔpʋ kɑ hɑ ɩ pǝyɑɣɑ Yosɛɛfʋ tɔ.
6Nɑ Yɑkɔpʋ lɔkɔ kɑ wɛ tǝnɑ. Tɔntɛ nɩɩ Yesu ɩlɛnɑ ɩ́ cɑɣɑ lɔkɔ nɔɣɔ, nɑ wɑɑtʋ ɩnɩ ilim sikɑɑ.
7Ḿpʋ́ɣʋ́ Sɑmɑlii ɑlʋ nɔɣɔlʋ kɔmɑ lʋm luɣu, nɑ Yesu sǝlǝmɩ-ɩ sɩ: Hɑ-m lʋm nɑ mɑ́ nyɔɔ.
8Wɑɑtʋ ɩnɩ Yesu ɩfɑlɑɑ kɑ tɛmɑ tɛɛʋ kɛ ɩcɑtɛ tɑɑ kɛ́ kʋtɔɣɔʋ yɑpʋ.
9Sɑmɑlii ɑlʋ cɔ-ɩ sɩ: Pepe tɔɔ kɛ́ nyɑɣɑ Yutɑ tʋ nɑ ń sǝlǝmǝɣɩ-m lʋm sɩ n nyɔɔ. Pǝ́cɔ́ mɑɣɑ Sɑmɑlii tʋ? (Pǝ tɑɣɑ pʋlʋ tɔɔ, Yutɑ nyǝ́mɑ nɑ Sɑmɑlii nyǝ́mɑ pɑɑ suliɣi.)
10Ḿpʋ́ɣʋ́ Yesu cɔ-ɩ sɩ: Ye n kɑ cɛkǝnɑ mpi Ɩsɔ hɑɑkɩ tɔ, nɑ ń kɑ nyǝmɑ́ wei mɑ́ mɑ sǝlǝmǝɣɩ-ŋ lʋm kʋnyɔnyɔɔm kɛ ɩsǝntɔ tɔ, nyɑ́ mɑɣɑmɑɣɑ n kɑ lɑɑlǝnɑ-m sǝlǝmʋɣʋ nɑ mɑɑ hɑ-ŋ weesuɣu lʋm.
11Ḿpʋ́ɣʋ́ ɑlʋ cɔ Yesu sɩ: Mɑ cɛ, n fɛɩnɑ kʋlulunɑʋ ŋku n kɑ́ lunɑ tɔ. Pǝ́cɔ́ lɔkɔ nɑ́ tɩɩ lumɑɑ. Ɩlɛ leɣe n kɑ́ hiki weesuɣu lʋm mpɩ?
12Tɑ́ lɔŋcɛ Yɑkɔpʋ hulinɑ lɔkɔ ɩnɛ nɑ tɑ́ɑ́ mɑɣɑnɑ-ɩ. Hɑlɩ Yɑkɔpʋ nɑ ɩ piyɑ nɑ ɩ kɑlǝkǝŋ pɑ nyɔɔ lɔkɔ ɩnɩ ɩ lʋm. Ɩlɛ n hʋʋ sɩ n kǝlɑ ɩlɛ?
13Ḿpʋ́ɣʋ́ Yesu cɔ ɑlʋ sɩ: Wei ɩ́ nyɔɔ lɔkɔ ɩnɛ ɩ lʋm lʋkɔtʋ tɑsǝɣɩ-ɩ kpɑʋ kɛ́.
14Amɑ wei ɩ́ nyɔɔ lʋm mpi mɑɑ hɑ-ɩ tɔ, lʋkɔtʋ ɩɩ lɛlǝɣɩ-ɩ kpɑʋ pɑɑ pǝlee. Pǝ tɑɣɑ pʋlʋ, lʋm mpi mɑɑ hɑ-ɩ tɔ pɩɩ lɑ ɩ tɑɑ kɛ́ lʋm sɛɛlʋ wei ɩ cɛtǝɣɩ tɔ. Hɑlǝnɑ ɩ́ hiki weesuɣu ŋku kɩɩ tɛŋ tɔ nɑ ɩ kiŋ.
15Ḿpʋ́ɣʋ́ ɑlʋ cɔ Yesu sɩ: Mɑ cɛ hɑ-m lʋm mpɩ, ɩlɛ lʋkɔtʋ kɑɑ tɑsɑ-m kpɑʋ, nɑ mɑ́ tɑɑ tɑsɑ cǝnɛɣɛ mǝlʋɣʋ kɛ lʋm luɣu.
16Ḿpʋ́ɣʋ́ Yesu tɔmɑ ɑlʋ sɩ: Polo ń yɑɑ nyɑ́ pɑɑlʋ nɑ nyɑ́ nɑ-ɩ ɩ́ kɔɔ cǝnɛ.
17Ḿpʋ́ɣʋ́ ɑlʋ cɔwɑ sɩ: Mɑ fɛɩnɑ ɑpɑlʋ. Ɩlɛnɑ Yesu cɔ ɑlʋ sɩ: Tɑmpɑnɑ kɛ n yɔɣɔtɑɑ sɩ n fɛɩnɑ ɑpɑlʋ.
18Pǝ tɑɣɑ pʋlʋ, n tɛmɑ ɑpɑlɑɑ kɑkpɑsɩ kɛ sɑɑʋ, nɑ wei ɩ tɛ n tɩɩ wɛ kɑɣɑnɑ ɩsǝntɔ tɔ n wɛ yem, pǝ tɑɣɑ nyɑ́ pɑɑlʋ. Pǝ tɔɔ kɛ́ nyɑ́ tɔm wɛnɑ tɑmpɑnɑ.
19Ḿpʋ́ɣʋ́ ɑlʋ cɔ Yesu sɩ: Tɑcɑɑ, mɑ nɑɑ sɩ n kɛ́ Ɩsɔ kʋyɔɣɔtʋtʋ tɛlǝsʋlʋ.
20Tɑ lɔŋcɛnɑɑ sɛɛkɑɣɑ Ɩsɔ kɛ́ pʋɣʋ kʋnɛ kʋ tɔɔ. Amɑ Yutɑ nyǝ́mɑ mɛ mǝ tɔŋ sɩ ye pɑɑ sɛɛ Ɩsɔ Yosɑlɛm kɛ́.
21Ḿpʋ́ɣʋ́ Yesu cɔ ɑlʋ sɩ: Alʋ nyɑ́ nɩɩ mɑ tɔm, pɩɩ kɔɔ tɔ, Tɑcɑɑ Ɩsɔ sɛɛʋ kɑɑ wɛɛ tǝntǝmlɛ tɔm, sɩ pʋɣʋ kʋnɛ kʋ tɔɔ yɑɑ Yosɑlɛm.
22Sɑmɑlii nyǝ́mɑ mɛ ɩ́ tɑ nyɩ wei ɩ́ sɛɛkɩ tɔ. Amɑ Yutɑ nyǝ́mɑ tɑ tɑ́ nyǝmɑ́ wei tɑ́ sɛɛkɩ tɔ. Pǝ tɑɣɑ pʋlʋ, Yutɑ nyǝ́mɑ kiŋ kɛ Ɩsɔ sɛɛʋ mpi pǝ wɑɑsǝɣɩ tɔ pǝ wɛɛ.
23Amɑ pǝ wɛɛ pɩɩ kɔɔ, hɑlɩ pǝ tɩɩ tɛmɑ kɔntɛ te, nɑ mpɑ pɑ sɛɛkɩ Ɩsɔ nɑ tɑmpɑnɑ tɔ pɑɑ sɛɛ-ɩ hɑtoo pɑ tɑɑ kɛ́ nɑ cɛsʋɣʋ fɛɩ. Ɩsɔ sɛɛlɑɑ ɩsɩɩ mpʋ wɛɣɛ Cɑɑ Ɩsɔ sɔɔlɑɑ.
24Ɩsɔ ɩɩ nɑɑ ɩsɛntɔɔ, pǝ tɔɔ kɛ́ mpɑ pɑ sɛɛ-ɩ tɔ, pǝ tɑɣɑ ɩsɛntɔɔ kɛ pɑɑ sɛɛ. Amɑ pɑ tɑɑnɑɑ kɛ́ nɑ cɛsʋɣʋ fɛɩ.
25Ḿpʋ́ɣʋ́ ɑlʋ cɔ Yesu sɩ: Mɑ nyǝmɑ́ sɩ Mesii wei pɑ yɑɑ sɩ Kilisiti tɔ ɩ kɑ́ kɔɔ te, ye ɩ́lɛ́ ɩ kɔmɑ, ɩ kɑ́ kilisi-tʋɣʋ pǝ tǝnɑ.
26Ḿpʋ́ɣʋ́ Yesu cɔ ɑlʋ sɩ: Mɑ wei mɑ yɔɣɔtǝɣǝnɑ-ŋ ɩsǝntɔ tɔ, mɑɣɑlɛ Mesii ɩnɩ.
27Yesu nɑ ɑlʋ pɑ tɔŋnɑ yɔɣɔtɑɣɑ kɛ ḿpʋ́ɣʋ́ ɩlɛnɑ ɩ ɩfɑlɑɑ tɑlɑ, nɑ pǝ́ lɑ-wɛɣɛ piti kɛ́ mpi pǝ tɔɔ ɩ nɑ ɑlʋ tɑkɑ pɑ yɔɣɔtǝɣɩ tɔ. Pɑɑ nɑ mpʋ pɑ tɑɑ nɔɣɔlʋ tɑ pɔɔsɩ sɩ: Pepeɣe n cɑɑ ɩ kiŋ? Yɑɑ ntiɣi nyɑ́ yɔɣɔtǝɣǝnɑ-ɩ?
28Tǝnɑɣɑ ɑlʋ mǝŋnɑ ɩ hǝyɑɣɑ nɑ ɩ́ sɩɩ. Ɩlɛnɑ ɩ́ mǝlɩ ɩcɑtɛ tɑɑ nɑ ɩ́ yɑɑ yǝlɑɑ sɩ:
29Ɩ́ kɔɔ nɑ ɩ́ nɑ́ ɑpɑlʋ nɔɣɔlʋ wei ɩ kpɑɣɑ pǝ tǝnɑ mpi tuu mɑ lɑpɑ tɔ nɑ ɩ́ kɛɛsɩ. Ɩ tɑ kɛ Mesii yee?
30Ḿpʋ́ɣʋ́ yǝlɑɑ lɩɩ ɩcɑtɛ tɑɑ nɑ pɑ́ puki Yesu kiŋ.
31Alʋ ɩnɩ ɩ tɛɛ mpʋ tɔ, nɑ ɩ ɩfɑlɑɑ nɑ́ɑ́ tɔŋnɑ-ɩ tɛɛkʋɣʋ kɛ́ sɩ: Tɑcɑɑ n kɑɑ tɔɣɔ mpʋ?
32Amɑ Yesu cɔ-wɛ sɩ: Tɔɣɔnɑɣɑ ŋkɑ mɑ tɔkɩ tɔ ɩ tɑ nyɩ-kɛ.
33Ḿpʋ́ɣʋ́ Yesu ɩfɑlɑɑ pɔɔsɑ tǝmɑ sɩ: Nɔɣɔlʋ kɔnɑ-ɩ tɔɣɔnɑɣɑ kɛ yee?
34Tǝnɑɣɑ Yesu cɔ-wɛ sɩ: Mɑ tɔɣɔnɑɣɑ ntɛ́ wei ɩ tilɑ-m tɔ ɩ luɣu nyǝntʋ lɑpʋ, nɑ ɩ tǝmlɛ nte ɩ hʋlɑ-m sɩ mɑ́ lɑ tɔ tǝ yoosuɣu.
35Mɛ mǝ tɔŋ sɩ: Pǝ kɑɑsɑ ɩsɔtʋnɑɑ liɣiti nɑ kʋmtʋ tɑlɑ. Amɑ mɑ́, mɑ heeliɣi-mɛ sɩ, ɩ́ kʋsɩ mǝ ɩsɛ nɑ ɩ́ nɑ ɩsǝnɑ kʋtɔɣɔʋ sɛɛnɑ tɑwɑ nɑ kʋ tɑŋɑ kʋntɑɑ tɔ.
36Kʋntʋ wei ɩ kʋŋ tɔ, ɩ tɔŋɑ ɩ kʋfɛlʋɣʋ hikuɣu kɛ́, nɑ ɩ́ nyǝkǝɣɩ pee tɔtɔɣɔ ɩ weesuɣu ŋku kɩɩ tɛŋ tɔ kʋ tɔɔ. Mpʋ pǝ lɑkǝnɑ nɑ tuulu nɑ kʋntʋ pɑ́ kpɛntǝɣɩ yɔɔlʋɣʋ.
37Pǝ tɔɔ kɛ́ tɔm nti pɑ yɔɣɔtǝɣɩ tɔ tǝ wɛnɑ tɑmpɑnɑ sɩ: Lɛlʋ tuuki kɛ́ nɑ lɛlʋ nɑ́ɑ́ kʋ.
38Mpʋ tɔtɔɣɔ, mɑ tilɑ-mɛ sɩ ɩ́ kʋ hɑlǝm mpi ɩ́ tɑɑ hɑlɑ tɔ. Lɛlɑɑ nɑ́ hɑlɑɑ nɑ kɑɣɑnɑ pǝ wɑɑsǝɣɩ-mɛ.
39Ɩcɑtɛ ńtɛ́ tǝ tɑɑ Sɑmɑlii nyǝ́mɑ pɑɣɑlɛ mʋ Yesu tɔm kɛ tɔm nti ɑlʋ kɑ yɔɣɔtɑɑ tǝfoo sɩ: Ɩ kpɑɣɑ pǝ tǝnɑ mpi tuu mɑ lɑpɑ tɔ nɑ ɩ́ kɛɛsɩ tɔ tǝ tɔɔ.
40Wɑɑtʋ wei Sɑmɑlii nyǝ́mɑ tɑlɑ Yesu kiŋ nɑ pɑ́ nɑ-ɩ tɔ, pɑ wiinɑ-ɩ sɩ ɩ́ lɑ wɛɛ nɑɑlɛɣɛ pɑ kiŋ. Ɩlɛnɑ ɩ́ cɑɣɑ tǝnɑɣɑ kʋyɛɛŋ nɑɑlɛ.
41Pǝ kɔmɑ nɑ pɑ́ nɩɩ ɩ mɑɣɑmɑɣɑ ɩ kʋyɔɣɔtʋtʋ, ɩlɛnɑ yǝlɑɑ sɑmɑɑ kɛ sɔsɔm tɑsɑ ɩ tɔm kɛ mʋɣʋ.
42Nɑ pɑ́ tɔŋ ɑlʋ sɩ: Pǝnɛntɛ pǝ tɑɣɑ nti n heelɑ-tʋ tɔ tǝ tɔɔ tike kɛ tǝ mʋ ɩ tɔm. Amɑ tɑ́ mɑɣɑmɑɣɑ tǝ nɩɩnɑ tɑ́ ŋkpɑŋŋ nɑ tǝ tɛmɑ tɑ́ tɑɑ sɩ, tɑmpɑnɑ ɩ kɛ́ ɑntulinyɑ Wɑɑsʋlʋ.
43Yesu lɑpɑ kʋyɛɛŋ nɑɑlɛɣɛ tǝnɑ, ɩlɛnɑ ɩ́ kʋlɩ nɑ ɩ́ tɛɛnɑ Kɑlilee.
44Yesu mɑɣɑmɑɣɑ kɑ tɛmɑ yɔɣɔtʋɣʋ sɩ: Nɔɣɔlʋ ɩɩ tʋɣʋnɑ Ɩsɔ kʋyɔɣɔtʋtʋ tɛlǝsʋlʋ kɛ ɩ mɑɣɑmɑɣɑ ɩ ɩcɑtɛ tɑɑ.
45Wɑɑtʋ wei Yesu tɑlɑ Kɑlilee tɔ, tǝnɑ nyǝ́mɑ mʋ-ɩ teu kɛ niŋ nɑɑlɛ. Mpi tɔ pɑ mɑɣɑmɑɣɑ pɑɑ polɑ Tɛɛʋ ɑcimɑ tɔɣɔʋ kɛ Yosɑlɛm, nɑ pɑ nɑwɑ pǝ tǝnɑ mpi ɩ lɑpɑ Tɛɛʋ ɑcimɑ ɑnɩ ɑ tɔɔ tɔ.
46Ḿpʋ́ɣʋ́ Yesu mǝlɑ Kɑlilee Kɑnɑ timpi ɩ kɑ pǝsɑ lʋm kɛ sʋlʋm tɔ. Akewe sɔsɔ nɔɣɔlʋ ɩ kɑ wɛ tǝnɑ, nɑ ɩ pǝyɑɣɑ wɛ Kɑpǝnɑhum nɑ pǝ wɩɩkɩ-kɛ.
47Akewe nɩɩwɑ sɩ Yesu lɩɩnɑ Yutɑ nɑ ɩ́ kɔɔ Kɑlilee, ɩlɛnɑ ɩ́ polo nɑ ɩ́ sǝlǝmɩ-ɩ sɩ: Mɑ pǝyɑɣɑ wɛ Kɑpǝnɑhum nɑ kɑ́ cɑɑ sǝpʋ, polo ń wɑɑsɩ-kɛ.
48Yesu cɔ-ɩ sɩ: Anɩ tɑmm mɩɩ tɑ nɑ piti tǝmɑ nɑ kɔkɔlɔ nyǝm, ɩɩ tisiɣi.
49Ḿpʋ́ɣʋ́ ɑkewe ɩnɩ ɩ cɔ-ɩ sɩ: Hɑɩ mɑ cɛ, tǝ tɛɛ pǝ́cɔ́ mɑ pǝyɑɣɑ ɩ́ tɑɑ kɔɔ nɑ kɑ́ sɩ.
50Ḿpʋ́ɣʋ́ Yesu cɔ ɑkewe sɩ: Kpe, nyɑ́ pǝyɑɣɑ kɑɑ sɩ. Ḿpʋ́ɣʋ́ ɑpɑlʋ ɩnɩ ɩ mʋ Yesu kʋyɔɣɔtʋtʋ nɑ ɩ́ tʋ mpɑɑʋ.
51Akewe kpeŋɑɣɑ, ɩlɛnɑ ɩ tǝmlɛ nyǝ́mɑ sǝŋɩ-ɩ nɑ pɑ́ heeli-ɩ sɩ: Nyɑ́ pǝyɑɣɑ hikɑ ɑlɑɑfǝyɑ.
52Ḿpʋ́ɣʋ́ ɑkewe pɔɔsɑ-wɛɣɛ ɩsǝnɑ wɑɑtʋ pǝ cɛpɑ pǝyɑɣɑ tɔɔ tɔ. Ɩlɛnɑ tǝmlɛ nyǝ́mɑ cɔ-ɩ sɩ: Tete ilim kpilɑ pǝcɔ tɔɣɔ wɑtʋ cɛpɑ kɑ tɔɔ.
53Ḿpʋ́ɣʋ́ pǝyɑɣɑ cɑɑ tɔɔsɑ kpɑkpɑɑ sɩ, tete mpʋ ɩnɩ pǝ tɑkɑ teitei kɛ́ Yesu kɑ heelɑ-ɩ sɩ: Nyɑ́ pǝyɑɣɑ kɑɑ sɩ. Ɩlɛnɑ ɩ́ nɑ ɩ tǝyɑɣɑ tǝnɑ pɑ́ tɛ Yesu nɑ pɑ tɑɑ.
54Yesu piti tǝmɑ kpɛntɑ nɑɑlɛɣɛlɛ ɩ lɩɩʋ Yutɑ nɑ ɩ́ kɔɔ Kɑlilee tɔ.
