Yohɑɑnɩ 2

1

2

3

4

5

6

7

8

9

10

¹Kʋyɑkʋ tooso nyǝŋkʋ wule pɑ kpɑ pɛɛlɔ kɛ Kɑlilee Kɑnɑ tɑɑ, nɑ Yesu too polo.

²Nɑ pɑ́ yɑɑ Yesu nɑ ɩ ɩfɑlɑɑ tɔtɔɣɔ ɑkpɑɣɑlɛ ńtɛ́ tǝ tɑɑ.

³Tǝnɑɣɑ sʋlʋm tɛmɑ, ɩlɛnɑ Yesu too heeli Yesu sɩ: Pɑ sʋlʋm tɛmɑ.

⁴Ḿpʋ́ɣʋ́ Yesu cɔ ɩ too sɩ: Alʋ nyɑ́, nyɑɑ heelinɑ-m nɑ pǝ́cɔ́ mɑ́ lɑ́ nɑ? Mɑ wɑɑtʋ tɑ tɑtɑ.

⁵Tǝnɑɣɑ Yesu too heelɑ tǝmlɛ nyǝ́mɑ sɩ: Ye ɩ́ heelɑ-mɛɣɛ nti ɩ́ lɑ ntɩ.

⁶Pɛɛ ŋkpɑɑŋ nɑɑtoso wei ɩ tɑɑ Yutɑ nyǝ́mɑ ɑlʋwɑlɑ lʋm kɑ wɛɛ tɔ ɩ kɑ wɛ tǝnɑ, nɑ pɑɑ ɩ tɑɑ ŋku kʋ tɔkɩ ɩsɩɩ liitilinɑɑ nɩɩnʋwɑ (100) kɛ́ mpʋ.

⁷Ḿpʋ́ɣʋ́ Yesu tɔmɑ tǝmlɛ nyǝ́mɑ sɩ: Ɩ́ suuli ŋkpɑɑŋ ɩnǝɣɩ lʋm. Tǝnɑɣɑ pɑ suulinɑ ɩ nɔɔsɩ tǝke tǝke.

⁸Ɩlɛnɑ ɩ́ tɔ-wɛ sɩ: Tɔʋ, pǝnɛntɛ ɩ́ cosi lʋm mpɩ nɑ ɩ́ ponɑ kʋtɔɣɔʋ tɑllʋ ɩlɛ. Ḿpʋ́ɣʋ́ tǝmlɛ nyǝ́mɑ cosɑɑ nɑ pɑ́ ponɑ kʋtɔɣɔʋ tɑllʋ.

⁹Ɩlɛnɑ tɑllʋ tǝŋ lʋm mpi pǝ pǝsɑ sʋlʋm kɛ mpʋ tɔ. Amɑ ɩ tɑ nyɩ timpi sʋlʋm mpɩ pǝ lɩɩnɑɑ tɔ. Ɩlɛ tǝmlɛ nyǝ́mɑ mpɑ pɑɑ cosɑ lʋm tɔ pɛlɛ pɑ nyǝmɑ́. Ḿpʋ́ɣʋ́ tɑllʋ yɑɑ ɑkpɑɣɑlʋ,

¹⁰nɑ ɩ́ tɔmɩ-ɩ sɩ: Sʋlʋm kʋpɑm kɛ yǝlɑɑ tǝnɑ cɑɑlǝɣǝnɑ lǝsʋɣʋ, nɑ pǝ́ kɔmɑ nɑ pɑ tǝnɑ pɑ́ hɑɣɑ ɩlɛ, pɑ tǝkǝnɑ mpi pǝ tɑ tʋlɩ tɔ. Amɑ nyɑ́, nyɑ́ sʋlʋm kʋpɑm nɑ́ wɛ hɑlǝnɑ nɔɔnɔɔ.

¹¹Piti tǝmlɛ kɑncɑɑlɑɣɑ nyǝntɛ nte Yesu lɑpɑ Kɑlilee Kɑnɑ tɑɑ tɔɣɔlɛ. Nɑ piti tǝmlɛ ntɛɣɛ ɩ hʋlǝnɑ ɩ teeli, nɑ ɩ ɩfɑlɑɑ tɛnɑ-ɩ nɑ pɑ tɑɑ.

¹²Pǝlɛ pǝ wɑɑlɩ ɩlɛ, Yesu nɑ ɩ too nɑ ɩ newɑɑ nɑ ɩ ɩfɑlɑɑ pɑ polɑ Kɑpǝnɑhum nɑ pɑ́ cɑɣɑ tǝnɑɣɑ wɛɛ nɑɑlɛ, ɩlɛ pɑ tɑ tɑɑŋɩ.

¹³Yutɑ nyǝ́mɑ Tɛɛʋ ɑcimɑ wʋsɑɑ, ɩlɛnɑ Yesu polo Yosɑlɛm.

¹⁴Ḿpʋ́ɣʋ́ ɩ mɑɣɑnɑ nɑɑŋ nɑ heeŋ nɑ ɑlukukunɑɑ pɛɛtǝlɑɑ cɑɣɑ Ɩsɔ tǝsɛɛlɛ tɑɑ, nɑ liɣitee yɔkǝlɑɑ nɑ́ɑ́ cɑɣɑ pɛlɛ pɑ tɑɑpǝlǝnɑɑ tɛɛ.

¹⁵Tǝnɑɣɑ Yesu kpɑɣɑ ŋmɩɩsɩ nɑ ɩ́ kuntili-sɩ nɑ ɩ́ tɔɣɔnnɑ pɑ tǝnɑɣɑ Ɩsɔ tǝsɛɛlɛ tɑɑ, pɑ nɑ pɑ heeŋ nɑ pɑ nɑɑŋ tɔtɔ. Nɑ ɩ́ ŋmɩɩsɩ liɣitee yɔkǝlɑɑ liɣitee kɛ ɑtɛ, nɑ ɩ́ pǝsɩ pɑ tɑɑpǝlǝnɑɑ kɛ ɑlele.

¹⁶Ɩlɛnɑ ɩ́ holinɑ ɑlukukunɑɑ pɛɛtǝlɑɑ sɩ: Ɩ́ lǝsɩ-wɛɣɛ cǝnɛ. Ɩ́ tɑɑ pǝsɩ mɑ Cɑɑ tǝyɑɣɑ kɛ kʋyɑkʋ kɛ mpʋ.

¹⁷Ḿpʋ́ɣʋ́ ɩ ɩfɑlɑɑ tɔɔsɑɑ sɩ pɑ ŋmɑɑwɑ Ɩsɔ Tɔm tɑɑ sɩ: Hɑɩ Ɩsɔ, mɑ luɣu sʋʋ nyɑ́ tǝyɑɣɑ tǝmlɛ kɛ́ ɩsɩɩ yem nɑ kpɛtɛ.

¹⁸Tǝnɑɣɑ Yutɑ nyǝ́mɑ tǝŋɑ-ɩ tǝkpɩɩ sɩ: Piti tǝmlɛ nteɣe n kɑ lɑ-tʋ nɑ pǝ́cɔ́ tǝ́ nyɩ sɩ pǝ hɑ-ŋ mpɑɑʋ sɩ ń lɑ ɩsǝntɔ ɩnɩ?

¹⁹Ḿpʋ́ɣʋ́ Yesu cɔ-wɛ sɩ: Ɩ́ yɔkɩ Ɩsɔ tǝsɛɛlɛ tǝnɛ, nɑ mɑɑ tɑɣɑnɩ-tɛɣɛ ŋmɑʋ kɛ kʋyɛɛŋ tooso tɑɑ.

²⁰Ḿpʋ́ɣʋ́ Yutɑ nyǝ́mɑ tɔmɑ-ɩ sɩ: Pɩɩsɩ nɩɩlɛ nɑ nɑɑtoso kɛ pɑ ŋmɑ Ɩsɔ tǝsɛɛlɛ tǝnɛ, nɑ nyɑɑ ŋmɑɑ-tɛɣɛ kʋyɛɛŋ tooso tɑɑ?

²¹Amɑ Yesu mɑɣɑmɑɣɑ ɩ tǝɣɩ ɩ yɑɑkɑɣɑ mpʋ sɩ Ɩsɔ tǝsɛɛlɛ.

²²Pǝ tɔɔ kɛ́ wɑɑtʋ wei Yesu kɔmɑ nɑ ɩ́ sɩ nɑ ɩ́ fe tɔ, ɩ ɩfɑlɑɑ tɔɔsɑɑ sɩ ɩ kɑ yɔɣɔtɑ-tɩ. Hɑlǝnɑ pɑ́ tɛ pɑ tɑɑ nɑ Ɩsɔ Tɔm nɑ Yesu kʋyɔɣɔtʋtʋ tɔtɔ.

²³Yesu wɛʋ Yosɑlɛm kɛ Tɛɛʋ ɑcimɑ tɔɔ kɛ́ mpʋ tɔ, yǝlɑɑ pɑɣɑlɛ nɑwɑ piti tǝmɑ nnɑ ɩ lɑkɑɣɑ tɔ nɑ pɑ́ mʋ-ɩ kpɑkpɑɑ tǝkpɑ sɩ ɩnǝɣɩ.

²⁴Amɑ Yesu nɑ́ tɑ́ tɛ-wɛ nɑ ɩ tɑɑ. Pǝ tɑɣɑ pʋlʋ, ɩ nyǝmɑ́ pɑ tǝnɑɣɑ teu kɛ́.

²⁵Pǝ fɛɩ sɩ nɔɣɔlʋ ɩ́ sɛɣɛsɩ-ɩ pɑ tɔm nɑ pǝ́cɔ́. Ɩ mɑɣɑmɑɣɑ ɩ nyǝmɑ́ mpi pǝ wɛ yʋlʋ tɑɑ tɔ.